Connect with us

تازه خبرونه

یوناما د پاکستان د هوایي ځواک په بریدونو کې افغانانو ته د اوښتي ځاني زیان څېړنه کوي

خپور شوی

د

(Last Updated On: وری ۲۸, ۱۴۰۱)

په افغانستان کې د ملګرو ملتونو مرستندویه پلاوی (یوناما) د پاکستانيو پوځیانو لخوا په هوايي او راکټي بریدونو کې ملکي افغانانو ته پر اوښتې مرګ او ژوبلې ژوره اندېښنه ښیي او په دې اړه یې د څېړنې ډاډ څرګند کړی.

د افغانستان اسلامي امارت سیمه ییزو چارواکو پرون (شنبه د وري ۲۷ ) په خوست ولایت کې تائید کړه، چې پاکستانيو ځواکونو د دغه ولایت د سپېرې ولسوالۍ په ځینو سیمو بمبارد کړی، چې له کبله یې لږ تر لږه ۳۶ ملکي وګړي وژل شوي او لسګونه نور ټپیان دي.

دغه راز سیمه ییزو چارواکو ويلي؛ د کونړ ولایت پر شلتن ولسوالۍ هم د پاکستان په راکټي بریدونو کې د ښځو او ماشومانو په ګډون د یوې کورنۍ شپږ غړي وژل شوي دي.

یوناما د یکشنبې پر ورځ (د وري ۲۸ ) ټویټ کړی، چې ملکي وګړي باید هیڅکله پر نښه نشي. یوناما هڅه کوي، چې حقایق روښانه او د دې پېښو له کبله د اوښتې مرګ او ژوبلې کچه په ډاګه کړي.

د افغانستان د بهرنیو چارو وزارت په کابل کې د پاکستان سفیر منصور احمد خان احضار کړ او دواړه پېښې یې وغندلې.

یاد وزارت پاکستاني لوري ته څرګنده کړې، چې په راتلونکي کې باید د دغه ډول کړنو مخه ونیول شي.

د اسلامي امارت ویاند ذبیح الله مجاهد پر کونړ او خوست ولایتونو د پاکستان د راکټي او هوايي بریدونو په غبرګون کې خبریالانو ته د شنبې پر ورځ په یوه غږیز پیغام کې پاکستان ته خبرداری ورکړ، چې د افغانانو زغم دې نه امتحانوي او د دواړو هېوادونو ترمنځ ستونزې بايد له سياسي لارې اوارې شي.

د اسلامي امارت ویاند ذبیح الله مجاهد په یوه ټویټ کې ویلي، چې برید پر کډوالو شوی دی.

 اسلامي امارت تل ویلي؛ هیڅ هېواد او ډلې ته به اجازه ورنکړي، چې له افغانستان څخه په بل هېواد کې د بریدونو لپاره زمینه برابره کړي.

د اسلامي امارت د څرګندونو له مخې؛ په خوست او کونړ ولایتونو کې د پاکستان پر بریدونو اویا ملکي وګړيو ته مرګ و ژوبله اوښتې ده.

 

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!