له افغان طالبانو څخه د یوې بېلې شوې ډلې يوه مشر په لومړي ځل نغوته کړې، چې کیدی شي له افغان حکومت سره مخامخ خبرې وشي.

د اسوشیتید پرس د راپور له مخې؛ د ملا رسول تر مشرۍ لاندې  ډلې مرستيال ملا عبدالمنان نيازی وايي، که په افغانستان کې اسلامي شريعي نظام او د بهرنيو ځواکونو د وتلو ضمانت ورکړشي د افغانانو تر منځ خبرو اترو ته چمتوالی لري.

له طالبانو څخه د بېلې شوې ډلې دغه مشر د افغانانو تر منځ د سولې په خبرو باور لري او غواړي د افغانستان کړکېچ د بهرنيانو له منځګړيتوب پرته حل شي.

ملا عبدالمنان نیازي په ډاګه کړې، چې تر دې دمه له دولت سره د سولې خبرې پيل شوي نه دي؛ يوازې د جګړې او سولې پر وړاندې یې سياسي دريځ ښودلی دی.

دغې ډلې ويلي، له جګړې د لاس اخيستو شرطونه د يوه داسې نظام جوړول دي، چې د شريعت پر قوانينو ولاړ وي او له افغانستان څخه د بهرنيو عسکرو وتل یې یوه برخه وي. هغه شرط، چې تل پرې ټولو طالبانو ټینګار کړی او په کې بدلون ته یې کومه اړتيا نه لیدل کیږي.

دغې ډلې دا هم ويلي، چې مشر يې په افغانستان کې فعال دی او د افغانستان له پولو بهر د طالبانو د مشر له ټاکلو خوښ نه دي.

دې ډلې د طالبانو د نوي مشر ملا هبت ټاکل هم رد کړي دي.

دغه ډله، د طالبانو د مشر ملا محمد عمر له مړينې او د طالبانو د نوي مشر په توګه د ملا اختر محمد منصور له ټاکلو وروسته د ملا داد الله تر مشرۍ لاندې راټوله شوه. کله ، چې ملا دادالله د ملا اختر محمد منصور پلویانو په یوه نښته کې وواژه؛ د دې ډلې مشري ملا رسول ته پاتې شوه.

څو مياشتې وړاندې هم په هرات کې د ملا محمد رسول اخند او اختر محمد منصور د پلویانو ترمنځ په جګړو کې د لسګونه کسانو د وژل کیدو رپوټونه ورکړشول، چې له کبله يې ولسي وګړیو ته درانده زیانونه اوښتي وه.

ويل کیږي؛ د دغې ډلې مشر ملا رسول اوس لادرکه شوی او اټکل دی، چې په پاکستان کې به بندي وي؛ خو د دغې ډلې مرستيال عبدالمنان نيازی يې پر خونديتوب ټینګار کوي او وایي، چې د اړتيا په وخت کې به څرګند شي.

د افغانستان د دولت يوه وياند شاه حسين مرتضوي د طالبانو د دغې ډلې د مشر د خبرو په تړاو ويلي؛ هره ډله، چې د ولسي وګړیو له وژلو لاس واخلي، اساسي قانون ومني او خپلې اړيکي له ترهګرو ډلو سره پرې کړي؛ د سولې دروازې يې پر مخ پرانيستې دي، چې په کې بدلون ته کومه اړتیا نه لیدل کیږي.