د افغانستان لپاره د اروپايي ټولنې ځانګړي استازي توماس نیکولسون او د قطر بهرنیو چارو وزارت سفیر او ځانګړي استازي فیصل بن عبدالله الحنزاب د افغانستان پر روان وضعیت بحث او خبرې وکړې.

د هغې خبرپاڼې له مخې، چې تېره ورځ د غبرګولي نهمه ناوخته د قطر بهرنيو چارو وزارت په ایکس پاڼه کې خپره کړې؛ راغلي، چې دغه ليدنه د قطر په پلازمېنه دوحه کې ترسره شوې او دواړو چارواکو په کې د افغانستان پر روانو حالاتو او سولې او ثبات ته د رسېدو لپاره د ګډو نړیوالو هڅو په اړه خبرې وکړې.

دا غونډه په داسې حال کې ترسره شوې، چې قطر به په نږدې یوه میاشت کې د افغانستان په اړه د درېیمې غونډې کوربه وي.

په دې غونډه کې د افغانستان د چارسمبالي حکومت استازي هم بلل شوي دي.

د افغانستان د چارسمبالي حکومت استازو د دوحې په دوه‌یمه ناسته کې د افغانستان لپاره د ملګرو ملتونو د ځانګړي استازي له ټاکل کېدو سره د مخالفت له کبله ګډون ونکړ؛ خو په درېیمه ناسته کې د ګډون لپاره د اندونو پر وړاندې کولو غور روان دی.

د خوړو نړيوال پروګرام (WFP) څرګنده کړې، چې اروپايي ټولنه به د افغان زده‌کوونکیو د خوړو د خونديتوب پياوړتيا لپاره له دې پروګرام سره ۱۰ ميليون يورو ځانګړې کړي.

د خوړو نړيوال پروګرام د چارشنبې پر ورځ (د غبرګولي نهمه) په يوه خبرپاڼه کې څرګنده کړې، چې دغه مرسته د فراه، غور، جوزجان، ننګرهار، نورستان، پکتيکا، روزګان او زابل ولايتونو له ۱۰ زره څخه زيات د ښوونځيو زده‌کوونکي تر پوښښ لاندې راولي.

دغې ادارې زیاته کړې، چې د اروپايي ټولنې د اضافي مالي مرستو په لړ کې به د لس زره ښوونځیو پر زده‌کوونکیو غني خوراکي بسکیټ یا ځواکمن تولید شوي غذايي خوراکونه ووېشل شي.

د یادې خبرپاڼې له مخې؛ د څلورم او شپږم ټولګیو نجونو زده‌کوونکیو ته به هم د نباتي غوړیو او نغدو پیسو مرسته ورکړ شي.

په افغانستان کې د خوراکي توکو د نړیوال پروګرام مشرې هسیائو ویلی وايي؛ دې بنسټ څه باندې دوه لسیزې وړاندې د ښوونځیو د تغذیې پروګرام پیل کړ، چې د خوړو خوندیتوب او ښه تغذیه له پوهنې سره ونښلول شي.

د نوموړې د څرګندونو پر بنسټ، د خوړو نړيوال پروګرام تېر کال په ښوونځيو کې له یو اعشاریه پېنځه ميليون ماشومانو سره مرسته کړې او اروپايي ټولنه د دې مرستې مهم ونډ‌وال شمېرل شوى دى.

دا په داسې حال کې ده، چې اروپايي ټولنې له دې مخکې هم د افغانستان د ښوونځیو د ښوونیز چاپېریال په ښه کولو کې مرسته کړې ده.

د روسیې ولسمشر پرون (سې شنبه د غبرګولي اتمه) په تاشکند کې یوې خبري ناستې ته ویلي، چې د افغانستان له اوسني حکومت سره د اړیکو ټینګول اړین دي.

 ولادیمیر پوتین زیاتوي، چې اسلامي امارت اوس د افغانستان پر وله خاوره واکمن دی؛ نو اړینه ده، چې اړیکې ورسره سمې او پراخې شي.

د روسیې ولسمشر زیاته کړې، اسلامي امارت په افغانستان کې واقعي ځواک دی او په افغانستان کې له شته ستونزو سره – سره روسیه باید واقعیت ته پر کتو مخ پر وړاندې ولاړه شي.

پوتین ټینګار کړی، چې له اسلامي امارت سره د اړیکو په اړه به د منځنۍ آسیا هېوادونو په ګډون له سیمه‌ ییزو شریکانو سره مشوره او همغږي وکړي.

د روسیې ولسمشر ولادمیر پوتین وایي: له طالبانو سره اړیکي ټینګول اړین دي؛ ځکه هغوی افغانستان چلوي. مونږ باید د دې حقیقت له مخې عمل وکړو او له مخې یې خپلې اړیکې تنظیم کړو.

دا څرګندونې په داسې حال کې کېږي، چې تېره ورځ د روسیې بهرنیو چارو وزیر سرګي لاوروف ویلي وه، چې د روسیې د ممنوعه ډلو له نوملړه د اوسنیو واکمنو د نومونو د ایستلو پر وړاندیز د دغه هېواد له ولسمشر سره خبرې شوې دي.

د سپینې ماڼۍ د ملي امنیت شورا د مسکو له لوري د ترهګرو ډلو له نوملړه د افغانستان د اوسنیو واکمنو د نومونو د ایستلو په تړاو د روسیې بهرنیو چارو د وزیر څرګندونو په غبرګون کې ويلي، چې دا کار ناسم دی؛ ځکه، چي د افغانستان اوسني واکمن له تور نوملړه ایستل سم کار ندی.

د سپینې ماڼۍ ویاند جان کربي وایي: زه فکر کوم، چې دا یو وحشتناک پیغام دی؛ طالبانو خپلې ژمنې نه دي پوره کړي، مونږ په داسې دریځ کې نه یوو، چې طالبان د افغانستان د رسمي حکومت په توګه په رسمیت وپېژنو او روسیه هم باید دا کار وکړي. زه نه غواړم فرضیاتو ته داخلم شم؛ خو دا یو ناسم اقدام دی.

د اسلامي امارت ویاند ذبیح الله مجاهد ويلي، چې افغانستان یو واحد حکومت او نظام لري او د سیمې او نړۍ له ټولو هېوادونو سره د ښو اړیکو او تعامل غوښتونکی دی.

د افغانستان بهرنیو چارو وزارت د روسي چارواکو د دې خبرو هرکلی کړی دی.

د کابل او مسکو اړیکې په داسې حال کې د پراخېدو په حال کې دي، چې د افغانستان لپاره د روسیې ځانګړي استازي ضمیر کابلوف ویلي، چې د روسیې له‌خوا د افغانستان اوسنی حکومت پر رسمیت پېژندلو امکان تر بل هر وخت ډېر دی.