تازه خبرونه
د غویی لسمه د افغان خبریالانو لپاره خونړۍ ورځ ونومول شوه
د افغانستان د خبریالانو فدراسیون د کابل په شش درک کې پر خبریالانو د برید د غندلو تر څنګ د یو پرېکړه لیک په لوستلو د غویی لسمه د افغان خبریالانو لپاره خونړۍ ورځ ونوموله.
د کابل په شش درک سیمه کې د دوشنبې پر ورځ( د غویی ۱۰) د داعشیانو دوه خونړیو بریدونو د ۹ خبریالانو خوږ ژوند واخیست او شپږ نور ټپیان شول، چې نن یې په کابل کې جنازې وشوې او خاورو ته وسپارل شول.
دا لومړی ځل دی، چې خبریالان د یوې پېښې د پوښښ پر وخت د یوې ترهګریزي پېښې ښکار کیږي. په دې برید کې ۹ خبریالانو خپل ژوند له لاسه ورکړی او شپږ نور ټپیان شوي، چې وژل شوي هر یو؛ غازي رسولي د یک تلویزیون خبریال د پروان په سیدخېلو کې خاپوړې کړې وې او د ژونالیزم پوهنځي یې لوستې و او له څلور کلونو راپدیخوا یې د خبریال په توګه په کې کار کاوه، نوروز علي رجبي د یک تلویزیون انځور اخیستونکی شپږویشت کلن تنکی ځوان و، چې له ۵ کلونو راپدیخوا یې د کمرې پر مټ د روانو حالاتو انځور وړاندې کاوه؛ په یک تلویزیون کې یې د دندې یو کال کیده او یو کال مخکې یې واده کړی و، عبادالله حنانزي د آزادۍ رادیو خبریال د زهرو کاروان خپرونه چلوله؛ ژورنالیزم یې لوستی، واده یې کړی و او له ۴ کلونو راپدیخوا یې په آزادۍ رادیو کې دنده تر سره کوله، محرم درانۍ د آزادۍ راديو خبریالې د کابل پوهنتون شرعیاتو محصله وه او تازه یې د خبریالې په توګه دنده پیل کړې وه، سباوون کاکړ د آزادۍ رادیو تصویر اخیستونکي له څو کلونو راپدیخوا په آزادۍ راديو کې دنده تر سره کوله، چې په ټپي حالت کې د وزیر محمد اکبر خان روغتون ته ولیږدول شو؛ خو ژوند ور سره یاري ونکړه او په روغتون کې ساه ورکړه، یار محمد توخي د طلوع نیوز تکړه انځور اخیستونکی او له کلونو راپدیخوا یې په دې تلویزیون کې دنده تر سره کوله، شاه مری فیضي د فرانسې خبري آژانس انځور اخیستونکي دوه کاله د مسلکي انځور اخیستونکي په توګه دنده تر سره کړې او ۶ اولادونه ترې پاتې شول، سلیم تلاش د مشعل تلویزیون خبریال د افغانستان د آزادو خبریالانو ملاتړ بنسټ د دوه کلنو زدکړو پروګرام لوستی و؛ له یو کال راپدیخوا یې د خبریالۍ دنده تر سره کوله او یوه میاشت مخکې یې کوژدنه کړې وه او علي سلیمي له کلونو راپدیخوا یو ښه انځور اخیستونکی پاتې شوی و؛ خو په مشعل تلویزیون کې یې د کار یوازې یوه اوونۍ تېره شوې وه.
نن دوشنبه د سهار اته بجې د کابل د شش درک په اړوند سیمه کې دوه بېلابېلو چاودنو دا شنه سیمه ولړزوله، چې د دغو ۹ خبریالانو په ګډون یې لږ تر لږه له ۲۵ کسانو خوږ ژوند واخیست او له۴۰ ډېر یې ټپیان کړل.
دغه راز نن په خوست ولایت کې د بي بي سي خبریال احمد شاه هم ترور شو او تېره ورځ په کندهار کې يو خبریال وژل شوی و.
د خبریالانو ملاتړو بنسټونو په کابل کې پر خبریالانو شوی برید بشري جنایت وباله او پر امنیتي ارګانونو نیوکه کوي، چې د خبریالانو د ژوند خوندي کولو لپاره جدي هڅې نه کوي.
خبریال: فواد ناصري
تازه خبرونه
له افغانستان سره د روغتیا نړیوالې ټولنې همکاري اړینه ده – عبدالسلام حنفی
د ریاست الوزراء اداري مرستیال په کابل کې د روغتیا نړیوالې ټولنې له یوه لوړپوړي چارواکي سره په کتنه کې د لریو پرتو سیمو د کلینیکونو د جوړولو او د څانګوالو یا متخصصینو د روزنې په ګډون په بېلابېلو برخو کې د دې ټولنې د همکاریو غوښتنه وکړه.
د ریاست الوزراء د رسنیو له دفتره په خپره شوې خبرپاڼه کې راغلي، چې په دې کتنه کې عبدالسلام حنفي د اسلامي امارت له واکمنۍ سره د مخدره توکو له توليد او قاچاق سره د مبارزې په ګډون په ټول هېواد کې پر نشهیی توکو د روږدو کسانو د راټولولو او درملنې، د اداری فساد د له منځه وړلو او د امنیت د خوندي کولو پرمختګونو ته په نغوته کې له دې ټولنې وغوښتل، چې د افغانستان څوکۍ دې د اسلامي امارت استازي ته وسپاري او د مدیترانې سیمې د اجرائیوي بورډ او رهبرۍ په غونډو کې د افغانستان غړیتوب بېرته خوندي کړي.
عبدالسلام حنفي دغه راز د کوکنارو د کښت د بدیل برابرولو او له سیلاب ځپلیو سره د مرستې په برخه کې د نړیوالو بنسټونو د همکارۍ غوښتنه وکړه.
دغه راز نوموړي د پولیو پر له منځه وړلو د ټینګار تر څنګ د روغتیا له نړیوالې ټولنې وغوښتل، چې د پولیو د تشخیص لابراتوارونه فعال او واکسین ورکړي، د سرطان د درملنې مرکز جوړ کړي، په ماشومانو کې د خوارځواکۍ مخه ونیسي او د پاکو اوبو د زمینې په برابرولو کې همکاري وکړي.
د اسلامي امارت د اداري مرستيالۍ د خبرپاڼې له مخې، د روغتيا نړيوالې ټولنې د ختيځې مديترانې سيمې مشرې حنان حسن بلخي په دې غونډه کې ويلي، چې د دې ټولنې لپاره روغتيايي موضوع غير سیاسي او د دې ټولنې یو له لومړیتوبونو څخه ده.
نوموړې په بېلابېلو برخو کې د اسلامي امارت لاسته راوړنو ته نغوته وکړه او هیله څرګندوي، چې د روغتیا او پوهنې په برخه کې به د افغانانو لپاره ښه شرایط برابر شي.
میرمن بلخي وایي؛ د روغتيا نړيوالې ټولنې له نورو نړيوالو ټولنو او اروپايي ټولنې سره په ګډه درې کلنه پروژه لري، چې د افغانستان په بېلابېلو ولايتونو کې د روغتيايي مرکزونو جوړول هم په کې شته.
نوموړې دغه راز د پوليو پر وړاندې د مبارزې په برخه کې د اسلامي امارت له هلو ځلو قدردانی وکړ او زياتوي، چې د افغان بزګرانو لپاره د بديل معيشت د برابرولو په اړه به له نړيوالې روغتيايي ټولنې او نورو اړوندو ادارو سره خبرې وکړي.
دا په داسې حال کې ده، چې دې پلاوي په تېرو دوه کلونو کې د عامې روغتیا وزارت د لاسته راوړنو، د افغان روغتیايي پرسونل د ظرفیت لوړولو، د ولسوالۍ کچې روغتونونو د جوړېدو، د روغتیایي سیسټم د پیاوړتیا، دوامداره همکارۍ، د ساري ناروغیو د کنټرول او غوره همغږۍ په اړه د عامې روغتیا له چارسمبالي سره هم بحث او خبرې کړې دي.
تازه خبرونه
د اسلامي همکاریو ټولنې سرمشریزې په افغانستان کې د نجونو پر زدهکړو ټینګار څرګند کړ
په ګمبیا کې د یکشنبې پر ورځ د اسلامي همکاریو ټولنې د پېنځلسمې سرمشریزې ګډونوالو د افغانستان له اسلامي امارت وغوښتل، چې د افغان نجونو او ښځو د زدهکړو او کار کولو حق ته درناوی وکړي.
د دې غونډې په پای کې دوی د زدهکړو او کار حق د افغان نجونو او ښځو له اساسي حقونو څخه وباله او په دې اړه یې د اسلامي امارت له چارواکو سره د نورو ډېرو بحثونو غوښتنه وکړه.
دغه راز د غونډې ګډونوالو په افغانستان کې د هر اړخیزې حکومتولۍ او تلپاتې سولې او ثبات د خوندي کولو لپاره د قومي ډلو، نشهیي توکو، تروریزم او ټولنیزو ستونزو مخنیوي ته د هڅو پر اړتیا ټینګار څرګند کړ.
د اسلامي همکاریو ټولنې د ۵۷ غړیو هېوادونو استازو په دغه کنفرانس کې، چې د تلپاتې پراختیا لپاره د خبرو له لارې د یووالي او پیوستون پیاوړتیا تر سرلیک لاندې جوړه شوې وه، ګډون کړی و.
د یادونې ده، چې په دې غونډه کې د اسلامي امارت یوه پلاوي ګډون درلود.
تازه خبرونه
د ملګرو ملتونو د بشري حقونو شورا د افغانستان د بشري حقونو ملي راپور تصویب کړ
په ژنیو کې د افغانستان دایمي استازي نصیر احمد اندیشه ويلي، چې د ۷۰ هېوادونو ۲۴۳ سپارښتنو له هر اړخیزو کتنو وروسته د ملګرو ملتونو د بشري حقونو شورا د افغانستان د بشري حقونو ملي راپور تصویب کړ.
نوموړي زیاته کړې؛ دغو هېوادونو په افغانستان کې د بشري حقونو پر وضعیت اندېښنه ښودلې او وړاندیز یې کړی، چې په افغانستان کې دې د بشري حقونو د سرغړونو په اړه بې پرې او خپلواکه څېړنه وشي.
نصیراحمد اندیشه وایي: د افغانستان د بشري حقونو ملي راپور په افغانستان کې د بشري حقونو د خرابېدو د بحران په اړه د اساسي حقایقو د هر اړخیز او بشپړ راپور د وړاندې کولو په هدف چمتو شوی دی. دا راپور د بشري حقونو د مخ پر خرابېدونکي وضعیت د ټینګار ترڅنګ د بشري حقونو د بحران په اړه د خلکو عاجلو اړتیاوو او اندېښنو ته هم نغوته کوي.
اسلامي امارت تل بشري حقونه د هېواد داخلي مسله بولي او ټینګار کوي، چې بشري حقونه په ځانګړي توګه د ښځو حقوق تر بل هر وخت ډېر خوندي دي.
د اسلامي امارت د ویاند مرستیال حمدالله فطرت وایي: د ټولو افغانانو اسلامي او شرعي حقوق تضمین شوي او اسلامي امارت د خپلو اتباعو د حقوقو خوندي کولو ته ژمن دی.
په افغانستان کې د بشري حقونو د وضعیت په اړه دا اندېښنې په داسې حال کې راپورته کېږي، چې د تېرې دوشنبې پر ورځ د ملګرو ملتونو د بشري حقونو شورا په یوه غونډه کې د بشري حقونو وضعیت د اندېښنې وړ وباله؛ خو اسلامي امارت یې په غبرګون کې څرګنده کړې، چې نړیواله ټولنه د بشري حقونو له موضوع څخه د یوې سیاسي وسیلې په توګه توګه کار اخلي.
-
تازه خبرونه1 day ago
اسلامي امارت په بدخشان کې د اعتراضي لاريون د څېړلو لپاره یو پلاوي وټاکه
-
تازه خبرونه24 hours ago
په غور کې د سېلابونو له کبله سلګونه خلک بې ځایه شول
-
لوبی4 days ago
سرخ پوشان خوافي او خدیم د خپلو اړوند سیالیو ګټونکي شول
-
تازه خبرونه1 day ago
په افغانستان کې پر کوکنارو د بندیز له کبله کروندګرو خپل عاید له لاسه ورکړی – نړیوال بانک
-
تازه خبرونه4 days ago
داعش له تېرو دوه میاشتو راپدیخوا ۱۵۴ کسانو ته مرګ او ژوبله اړولې ـ راپور
-
سوداگري1 day ago
د ترکمنستان د سوداګرو او صنایعو اتحادیې مشر هرات ته سفر وګړ
-
نړۍ9 hours ago
اسرائیلي ځواکونو بیت المقدس ته نږدې د الجزیرې پر رسنیز دفتر چاپه ووهله
-
تازه خبرونه5 days ago
ولس دې د اسلامي نظام د شرعي احکامو د پلي کولو لپاره همکاري وکړي – محمد خالد حنفي