د کرنې او مالدارۍ وزیر ولسي جرګې ته په ډاګه کړې، چې په هېواد کې له وچکالۍ سره د مبارزې لپاره پېنځه سوه پنځوس میلیون دالرو ته اړتیا ده، چې کولی شي پرې د نهه میاشتو لپاره زیانمن وګړي او حیوانات وژغوري.

په هېواد کې د وچکالۍ د زیانونو له پراخیدو سره ولسي جرګې د کرنې او مالدارۍ وزیر او له طبیعي پېښو سره د مبارزې په برخه کې د دولت وزارت مرستیال عمومي غونډې ته رابللي وه.

د ولسي جرګې غړي وايي، چې د هرې ورځې په تېریدو د وچکالۍ له کبله د خلکو او حیواناتو ژوند له ګواښ سره مخ کیږي؛ خو حکومت د دغې ستونزې د مخنیوي لپاره هیڅ پلان نلري.

په ولسي جرګه کې د جوزجان استازی عبدالستار درزابي وایي: د جوزجان مرکز ته له نورو سیمو او ولایتونو خلک بې ځایه شوي؛ نه اوبه لري او نه ډوډۍ. دلته یوه بشکه د څښاک اوبه زر- دوه زره پلورل کیږي. د خواشینۍ ځای دی، چې خلک اوبه په پور اخلي.

د ولسي جرګې د کندوز استازې فاطمه عزیز وایي: شمال ولایتونه وچکالي ګواښي او له ناامنیو څخه آبدان دښتې ته له ۵۰۰۰  ډېرې کورنۍ بې ځایه شوي، چې اوبه او ډوډۍ نلري.

د کرنې وزیر وايي، چې له وچکالۍ څخه د اغېزمنو خلکو او سیمو لپاره یې د مرستې تابیا نیولې؛ خو ټينګار کوي، چې د وچکالۍ له کبله د پېښیدونکي زیان د بشپړ مخنیوي لپاره پېنځه سوه پنځوس میلیون دالرو ته اړتیا ده.

د کرنې او مالدارۍ وزیر نصیر احمد درانی وایي: په افغانستان کې د حیواناتو شمېر ډېر دی او مونږ د حیواناتو د تلفاتو د مخنیوي لپاره ۵۵۰ میلیون دارو ته اړتیا لرو، چې تر نهه میاشتو به پرې له مرګه وژغورل شي. په هر حال مونږ هڅه کوو، چې د وچکالۍ ستونزو ته لاسرسی ومومو.  

له طبعي پېښو سره د مبارزې په برخه کې د دولت وزارت مرستیال محمد اسلم سیاس وایي: له یو میلیون ډېر کسان د اوبو او خوراکي توکو له لږوالي سره مخ دي او له درې میلیون ډېر حیوانات د له منځه تلو له خطر سره مخ شوي دي. د ملګرو ملتونو دفترونو د دغې ستونزې د حل لپاره د مرستو ژمنې کړې دي.  

د ولسي جرګې غړي وايي، چې له روانې جګړې سره په یوه وخت کې خلک وچکالۍ هم له رامنځته کیدونکي ناورین سره مخ کړي دي. دوی اندېښنه ښيي، چې که سر له اوسه د زیانمو سیمو له خلکو سره مرستې پیل نه شي، د خلکو ژوند به له دې هم له سختو کړاوونو سره مخ شي.

خبریال: رفیع صدیقي