تازه خبرونه
پخوانی ولسمشر مجددی په کابل کې خاورو ته سپارل کیږي
پخوانی ولسمشر او د ملي نجات جبهې جهادي رهبر د ۹۳ کلونو په عمر تېره ورځ له ورپېښې ناروغې له کبله په کابل کې ومړ او سبا چارشنبه( د سلواغې ۲۴) به په کابل کې خاورو ته وسپارل شي.
د ملي نجات جبهې او د ارواښاد کورنۍ په ډاګه کړې، چې د ارواښاد حضرت صبغت الله مجددي د جنازې لمونځ سبا ( چارشنبه د سلواغې ۲۴/ د فبرورۍ ۱۳) د کابل په غازي لوبغالي کې ادا او بیا په خپله کورنۍ ادیره کې خاورو ته سپارل کیږي.
د کار او ټولنیزو چارو وزارت سبا( چارشنبه د سلواغې ۲۴) عمومي رخصتي اعلام کړې ده.
ارواښاد حضرت صبغت الله مجددي د ۱۳۵۷ ل. ل کال د غویي له کودتا وروسته پاکستان ته ولاړ او د وخت د حکومت په وړاندې یې د ملي نجات جبهه جوړه او خپلې سیاسي او وسلوالې هڅې یې پیل کړې.
حضرت صبغت الله مجددي پر دیارلس سوه پېنځم لمریز کال په یوه روحاني کورنۍ کې وزیږید او د پخوانیو جهادي رهبرانو تر منځ منځلاری یادیده. صبغت الله مجددي د مجاهدینو د بریا پر مهال له دیارلس سوه اته شپیته ـ نهه شپیته پورې د افغانستان د اسلامي دولت د رييس په توګه دنده پرمخ یوړه؛ خو د مجاهدینو د واکمنۍ له ړنګیدو وروسته پاکستان ته ولاړ او په دوه زره لومړي کال بیرته کابل ته راستون شو.
ولسمشر محمد اشرف غني وایي، چې صبغت الله مجددي د یوه سوله خوښوونکي په توګه د اساسي قانون په لویه جرګه کې او د هېواد د یو لړ ستونزو په اوارۍ کې یې د یادونې وړ هڅې ترسره کړې.
صبعت الله مجددي د بن په غونډه کې ګډون وکړ او د هېواد په سیاسي تحولاتو کې یې مهم رول ولوباوه. صبغت الله مجددی له امریکا سره د افغانستان د امنیتي تړون پر لاسلیک ډېر ټينګار کاوه؛ خو هغه وخت ولسمشر حامد کرزي له امریکا سره د امنیتي تړون له لاسلیک څخه ډډه وکړه.
اجرائیه رییس عبدالله عبدالله ویلي، چې ارواښاد حضرت صبغت الله مجددي د افغانستان د معاصر تاریخ یوه اغېزمنه سیاسي او مذهبي څېره وه، چې د هېواد په وروستیو بدلونونو کې یې پراخ لاس درلود.
اجرايي رييس زیاتوي؛ نوموړي ۷ لسیزې د افغانستان د خلکو ارمانونو ته کار وکړ او د عمر تر پایه د خلکو د هوساینې په فکر کې و.
حضرت صبغت الله مجددي په دوه زره درې میلادي کال د افغانستان د اساسي قانون د لویې جرګې ریاست په غاړه درلوده او د سولې د ټينګښت د کمیسیون دنده یې هم په مخ وړه. دغه راز د مشرانو جرګې رييس هم پاتې شوی او په وروستیو کې یې د جهادي او ملي ډلو د عالي شورا ریاست دنده پر مخ غاړه درلوده.
د صبغت الله مجددي زوی ذبیح الله مجددي وایي، چې ستره مبارزه یې تر سره کړه؛ سوله او هوساینه یې هیله وه او په وروستیو وختونو کې یې ویل، چې ټول عمر یې هېواد ته وقف کړ، خو جوړ نشو.
په کابل کې د ایران سفارت د یوې اعلامیې په خپرولو د مجددي پر مړینه خواشینې ښودلې ده.
تازه خبرونه
تېر کال د ۳۵ میلیون ډالرو پر ارزښت پراختیايي او بشري پروژې ترسره شوي
د اسلامي پرا ختیا بانک اړوند چارواکو په خپل تازه راپو کې څرګنده کړې، چې په تېر میلادي کال کې یې له افغانستان سره د ۳۵ میلیون ډالرو پر ارزښت بېلا بېلي پراختیايي او بشري پروژې عملي کړې دي.
د اسلامي پراختیايي بانک د چارواکو د څرګندونو له مخې؛ د دې مرستو ډېره برخه پر بشري مرستو لګېدلې ده.
دوی زیاتوي، چې دا مرستې له اړو افغانانوسره شوي دي.
د اسلامي پراختیا بانک په راپور کې راغلي؛ دغه مرستې د خوراکي توکو له کمښت سره د مبارزې، د ماشومانو د تغذیې پروګرامونو د برابرولو، روغتیا پالنې، نوښتګرو زدهکړو، پاکو اوبو او روغتیايي خدمتونو په برخو کې شوې دي.
د اقتصاد وزارت مسوولینو هم په تېر میلادي کال کې له افغانستان سره د اسلامي پرا ختیا بانک د مرستو له بهیر هرکلی کړې او د دې بانک له رهبرۍ څخه يې غوښتني، چې په افغانستان کې د بشردوستانه مرستیو ترڅنګ په اقتصادي پروژو کې هم پانګو نه وکړي.
د اقتصاد وزارت مرستیال عبداللطیف نظري وایي: له افغانستان سره د اسلامي پراختیا بانک له لوري مرستې شوي او مونږ يي له همکاریو هرکلی کوو.
نوموړي زیاته کړې زمونږ غوښتنه داده، چې په افغانستان کې دې پر بنسټویزو اقتصادي پروژو پانګونه تر سره کړي، چې په هېواد کې د منظم اقتصادي خوځښټ لپاره زمینه برابره شي.
د اقتصادي چارو یو شمېر کار پوهان په افغانستان کې د مرستندویه بنسټونو مرستي مهمې بولي او څرګندوي؛ حکومت باید د مرستیندویه بنسټونه د قانع کولو هڅه وکړي، چې په افغانستان کې پر بنسټیزو پروژو اوږدمهاله پانګونه تر سره کړي، چې د هېواد اقتصادي حالت له بدلون سره مخ کړي.
د اقتصادي چارو شنونکي نذیر احمد خلیل ویلي: زما له انده بشري مرستي ښې دي او اړتیا ورته شته؛ خو مونږ باید د خپل بشري ناورین د ختمولو لپاره پر بنسټیزو پروژو تمرکز وکړو، چې اقتصادي پراختیا لپاره زمینه سازي وشي.
د اقتصادي چارو یو بل شنونکی شمس احمدزی وایي: زما له نظره د هېواد اوسنیو اقتصادي ستونزو ته پر کتو بشري مرستې ډېرې مهمې دي؛ خو حکومت باید ټول مرسیتندویه بنسټونه د هېواد پر بنسټیزو پروژو پانګونې ته ولسموي، چې د اقتصادي ثبات لپاره زمینه برابره شي.
د اسلامي پراختیا بانک د راپور له مخې؛ اوسمهال هم دوی د افغانستان د بشري مرستو د صندوق له لارې د ۱۶ پروژو د پلې کولو بهیر روان دی.
ویل کیږي، چې د افغانستان د بشري مرستو صندوق اوس د نړیوال مشارکت او ملاتړ څانګې او د اسلامي پراختیایي بانک د منابعو د تحرک ریاست له لوري د انقرې له سیمهییزمرکز سره پر همغږۍ اداره کیږي.
تازه خبرونه
ملا برادر د هرات پاشدان بند پروژې د پاتې کار پرانیسته وکړه
د اسلامي امارت د ریاست الوزراء اقتصادي مرستیال ملا عبدالغني برادر هرات ولایت ته د سفر پر مهال د پاشدان اوبو او برښنا بند د پاتې کار پیل اړین یاد کړ او څرګندوي، چې پخپل وخت به بشپړ او ګټې اخیستنې ته وسپارل شي.
د رییس الوزراء اقتصادي مرستيال ملا عبدالغني برادر وايي؛ د پاشدان بند پروژه يوه اړینه ملي پروژه ده، چې هڅه کیږي په خپل وخت بشپړه او ګټې اخيستنې ته وسپارل شي.
د اوبو د دغه بند د جوړېدو چارې له څه باندې یوې لسیزې راپدیخوا روانې دي، چې په دې موده کې یې د کار بهیر له ګڼو خنډونو سره مخ شوی؛ خو اوس له درې کلن ځنډ وروسته د دغې پروژې چارې پیل شوې.
د رییس الوزرا اقتصادي مرستیال ملا عبدالغني برادر د دې پروژې د پرانستلو پر مهال ویلي؛ د اوبو بندونه جوړول د اسلامي امارت کاري لومړیتوب دی.
د دغه بند پر جوړولو څه باندې ۱۱۷ میلیون ډالره لګښت راځي، چې نږدې ۸۵ سلنه چارې یې بشپړې شوي او د روان کال تر پایه به په بشپړ ډول ګټې اخیستنې ته وسپارل شي.
د دې پروژې له بشپړېدو سره به شاوخوا ۶۵ زره جریبه کرنیزه ځمکه خړوبه او زرګونه کسانوته د کار زمینه برابره شي.
د اوبو دغه بند د هرات د کرخ ولسوالۍ پر سیند جوړیږي، چې له څه باندې یوې لسیزې راپدیخوا یې کار ځنډنې روان دی. اوس اسلامي امارت هوډ کړی، چې د دغې ملي پروژې چارې بشپړې کړي.
د پاشدان اوبو او برېښنا بند د جوړېدو چارې د یوه کورني شرکت له لوري د آذربایجاني شرکت پر همکارۍ پر مخ وړل کېږي.
د دې پروژې انجنیر عبدالله غازي زاده ويلي، د اوبو او برښنا دغه بند تر ډېره د کرنې او څښاک د اوبو لپاره جوړېږي، چې د اوبو د زیرمو د ښه مدیریت لپاره به شاوخوا ۷۳ کیلومټره واړه او لوی کانالونه هم ولري.
اوسمهال په دې پروژه کې شاوخوا ۴۰۰ کسان په مستقیم ډول کار کوي.
ویل کیږي، چې دغه بند ۵۴ میلیون مټرمکعب اوبه زیرمه کوي، چې د کرنې او څښاک صحي اوبو لپاره به وکارول شي.
تازه خبرونه
د تېرو ۴ ورځو بارانونو له کبله ۸ کسان مړه شوي
د طبیعي پېښو پر وړاندې د مبارزې وزارت ویاند ملا جانان سایق ويلي؛ په تېرو ۴ ورځو کې د بارانونو او سېلابونو له کبله ۸ کسان مړه شوي، درې ټپیان دي او شل هکتاره کرنیزه ځمکه ویجاړه شوې ده.
ملا جانان سایق دا هم ویلي، چې په هېواد کې د وروستیو اورښتونو له کبله ۱۴۰ کورونه بشپړ او یا څه ناڅه ویجاړ شوي او ۲۰ کیلومټره سړکونه سیلابونو وړي دي.
د نوموړي د څرګندونو له مخې؛ ٣٠ څاروي هم له منځه تللي دي.
د طبیعي پېښو پر وړاندې د مبارزې وزارت ویاند زیاته کړې: له نېکهمرغه وروستیو اورښتونو په هېواد کې د اوبو کچه لوړه کړې، د ځمکې لاندې اوبه راپورته شوي او کروندګر خوښ دي.
ویل کیږي، چې د طبیعي پېښو پر وړاندې د دولت وزارت په ولايتونو کې خپلو ټولو رياستونو ته سپارښتنه کړې، چې د پېښې قربانيانو ته د لاسرسي لپاره له خپلو ټولو امکاناتو کار واخلي.
-
نړۍ4 days ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
تازه خبرونه21 hours ago
د بغلان ولایت د غوري سمنټو تولید زیات شوی
-
لوبی4 days ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
تازه خبرونه1 day ago
ترکمنستان د ټاپي پروژې بشپړولو ته ژمن دی – امانوف
-
سیمه ییز خبرونه1 day ago
په عراق کې به همجنسبازان پر۱۵ کاله بند شي –پارلمان
-
سیمه ییز خبرونه4 days ago
امریکا دې د بشري حقونو په اړه دوه ګوني سیاست ودروي – ترکیه
-
لوبی1 day ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل
-
تازه خبرونه1 day ago
له پاکستان څخه دې د افغان کډوالو د جبري ایستلو چټکتیا راکمه شي