تازه خبرونه
امریکا دې د افغانستان پر هوایي حریم له تېري دډه وکړي – ا.ا
اسلامي امارت خبرداری ورکړی، چې که واشنګټن د افغانستان په خاوره کې د بې پېلوټه الوتکو الوتنې ژر ونه دروي؛ له منفي عواقبو سره به مخ شي.
امریکا په دې اړه لا تر اوسه غبرګون ندی ښوودلی؛ خو مخکې یې ویلي وه، چې د افغانستان په خاوره کې د داعش او القاعده پر ضد د بریدونو لپاره له اسلامي امارت سره همغږۍ ته اړتیا نه ویني.
له افغانستان څخه د امریکایي ځواکونو له وتو څه باندې یوه میاشت وروسته اوس هم ویل کیږي، چې د امریکا بې پیلوټه الوتکې د افغانستان په فضا کې الوتنې لري.
اسلامي امارت په یوه اعلامیه کې دا د افغانستان له هوایي حریم سرغړونه بولي او وایي، چې امریکا له دې کار سره ټول حقونه، نړیوال قوانین او د دوحې هوکړه نقض کړې ده.
د اسلامي امارت په اعلامیه کې راغلي: امریکا په افغانستان کې له بې پیلوټه الوتکو څخه پر ګټه اخیستنې ټول حقونه او نړیوال قوانین او دا راز له طالبانو سره د دوحې هوکړه نقض کړې ده. مونږ له ټولو هېوادونو په ځانګړي توګه له امریکا څخه د داسې تعامل غوښتونکي یوو، چې ټول نړیوال قوانین په کې رعایت شوي وي، چې له منفي عواقبو یې مخنیوی وشي.
د اسلامي امارت د فرهنګي کمیسیون غړی انعام الله سمنګاني ویلي؛ امریکا باید د افغانستان پر هوایي حریم له تېري لاس واخلي، چې له بدو پایلو یې مخه ونیول شي.
که څه هم اسلامي امارت وعده کړې، چې د افغانستان له خاورې به هیچا ته د نورو هېوادونو په کورنیو چارو کې د لاسوهنې اجازه ورنکړي؛ خو امریکایي ځواکونو ویلي، چې دوی له لرې څخه د افغانستان د څارلو وړتیا لري، چې ترورستي ډلې ونشي کولی له دې خاورې څخه د امریکا پر وړاندې بریدونه وکړي.
د امریکا د پوځ د سترو درستیزانو د کمېټې مشر جنرال مارک میلي ویلي: د دې شونتیا ډېره ده، چې په افغانستان کې بیا سر راپورته او امریکا ته ګواښ رامنځته کړي؛ خو مونږ امریکا او امریکایان له دغه راز ګواښونو ژغورو.
ویل کیږي، چې امریکا او اسلامي امارت دواړه د داعش خراسانۍ ډلې ته د دښمن پر سترګو ګوري، چې په دې اړه یې همکارۍ له شونتیا لرې نده.
د امریکا څارګرو الوتکو تېره میاشت د وتلو پرمهال په ننګرهار او کابل کې دوه خونړي بریدونه تر سره کړل، چې یوازې په کابل کې یې د یوې کورنۍ لس غړي ووژل؛ خو تېره اوونۍ یې خپل دا برید پوځي تېروتنه ونوموله.
تازه خبرونه
د بغلان ولایت د غوري سمنټو تولید زیات شوی
د بغلان ولایت د غوري سمنټو شرکت چارواکو ويلي، چې په ۱۴۰۲ لمریز لېږدیز کال ۱۵۰ زره ټنه غوري سمنټ تولید شوي او هڅه کوي، چې سږ کال یې د تولید کچه ۱۸۰ زره ټنو ته ورسوي.
په بغلان ولايت کې د غوري سمنټو شرکت د چارواکو د څرګندونو له مخې؛ په دې شرکت کې د سمنټو توليد زيات شوى دى.
د بغلان غوري سمنټو د شرکت مالي او اداري مرستیال عبدالوکیل قیومي ویلي؛ تېر کال مو ۱۵۰ زره ټنه سمنټ تولید او بازار ته وړاندې کړل. له نېکه مرغه په ۱۴۰۲ لمریز لېږدیز کال کې مونږ له ۲۰۰ میلیون افغانیو څخه زیاتې پیسې درلودې.
د بغلان د غوري سمنټو شرکت د بسته بندۍ څانګې مدیر محمد طاهر د تولیدي وړتیاوو لوړولو لپاره هڅې روانې دي، چې له لوړېدو سره به یې هره ورځ ۱۰۰۰ بورۍ سمنټ تولید شي.
محمد طاهر وایي: اوسمهال، زمونږ څلور داشونه فعال دي او په څلیریشت ساعتونو کې نږدې له ۱۰۰۰ څخه تر ۱۲۰۰ ټنو سیمنټ تولیدوو او ۷۵۰ کسانو ته د کار زمینه برابره شوې ده.
د دې شرکت کارکوونکی حکیم وایي؛ له پانګوالو غواړو، چې په هېواد کې پانګونه وکړي او ځوانانو ته د کار زمینه برابره کړي.
د بغلان غوري سمنټو شرکت يوه بلف کارکوونکي محمد يوسف ويلي: بايد په هېواد کې څو نورې کارخونې جوړې شي، چې د سمنټو واردات لږ شي او له خپلو توليداتو ګټه واخلو.
د بغلان ولایت د غوري سمنټو شرکت شاوخوا ۴۰ کاله مخکې جوړ شوی او په افغانستان کې د سمنټو د تولید له سترو شرکتونو څخه شمېرل کیږي، چې د مدیریت چارې یې د ملي پرمختیايي شرکت لهخوا ترسره کیږي.
تازه خبرونه
څار: د افغانستان په اړه پاکستان او قطر ته د امریکایي ډیپلوماټ سفرونه
تازه خبرونه
د سیمې هېوادونه باید په ګډه ثبات او پرمختګ ته زمینه برابره کړي – مولوي عبدالکبیر
د ریاست الوزراء سیاسي مرستیال په کابل کې د قزاقستان د لومړي وزیر له مرستیال سره په کتنه کې ویلي، چې د سیمې هېوادونه باید په ګډه د سترو سیمهییزو پروژو په پلي کولو کې ونډه واخلي.
د ریاست الوزراء سیاسي مرستیالۍ د خبرپاڼې له مخې؛ په دې ناسته کې مولوي عبدالکبیر د قزاقستان پانګوالو ته بلنه ورکړه، چې په افغانستان کې پانګونه وکړي.
نوموړي زیاته کړې؛ اسلامي امارت د افغانستان پولې په بشپړ ډول کنټرول کړي، نشهيي توکي او فساد یې له منځه وړی او خپلواک ملي حاکمیت ټینګ شوی دی.
د قزاقستان د لومړي وزیر د مرستیالۍ د خبرپاڼې له مخې؛ په افغانستان کې د اسلامي امارت له لوري د شویو پرمختګونو قدرداني کړې او څرګندوي، چې هېواد یې له افغانستان سره اوږد مهاله سوداګریزو اړیکو، ټرانزیټ او اوږدمهاله پانګونې ته چمتو دی.
ژومانګارين افغان ځوانانو ته د تحصيلي بورسونو د ورکړې د چمتوالي ترڅنګ زياته کړې، چې افغانستان اوسمهال په سيمه کې د يوه سولهييز هېواد بېلګه ده او له همدې کبله له اسلامي امارت سره په بېلابېلو برخو کې د اړيکو ټينګول غواړي.
د قزاقستان لومړي وزير مرستيال دغه راز د کابل او الماتا ترمنځ د مستقيمو الوتنو د پيل غوښتنه وکړه او څرګندوي، چې هېواد يې له افغان حکومت سره په فرهنګي برخه کې دوه اړخيزو همکاريو ته چمتو دى.
اسلامي امارت په تېرو درې کلونو کې پرلهپسې ټینګار کړی، چې په ټول افغانستان کې د امنیت له رامنځته کیدو سره د سترو اقتصادي پروژو پلي کېدا ته له بل هر وخت ډېره ښه زمینه برابره شوې او اړتیا ده، چې افغانستان د سیمې هېوادونه سره ونښلوي.
-
نړۍ4 days ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
لوبی4 days ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
تازه خبرونه15 hours ago
د بغلان ولایت د غوري سمنټو تولید زیات شوی
-
سیمه ییز خبرونه1 day ago
په عراق کې به همجنسبازان پر۱۵ کاله بند شي –پارلمان
-
سیمه ییز خبرونه5 days ago
د غزې په شمال کې د قحطۍ خطر ډېر دی
-
سیمه ییز خبرونه4 days ago
امریکا دې د بشري حقونو په اړه دوه ګوني سیاست ودروي – ترکیه
-
تازه خبرونه1 day ago
ترکمنستان د ټاپي پروژې بشپړولو ته ژمن دی – امانوف
-
لوبی5 days ago
ابو مسلم فراه اوومه لوبه له خراسان فاریاب لوبډلې څخه ۶ د صفر پر توپیر وګټله