د عراق امنیتي او پوځي سرچینو ویلي، د چارشنبې پر ورځ د بغداد نړیوال هوايي ډګر ته نږدې کاتیوشا نومی توغندي د عراق پر کوربتوب د امریکایي ځواکونو پر پوځي اډه لګېدلی دی.

د رویټرز څرګنده کړې؛ د عراقي پوځ په خبرپاڼه کې ویل شوي، چې د بغداد په لویدیځ کې د الجهاد په اړوند سیمه کې هوايي ډګر ته نږدې یو توغندی ویشتونکی له توغندي سره موندل شوی دی.

سرچينې زياته کړې، چې په دې پېښه کې چا ته زيان ندى اوښتى.

امریکايي چارواکو په وروستیو اوونیو کې خبرداری ورکړی، چې دوی په عراق او سوریه کې د امریکايي ځواکونو پر ضد د بریدونو د زیاتېدو تمه لري؛ ځکه، چې د ایراني جنرال قاسم سلیماني د وژل کېدو دوه یم تلین پوره شوی دی.

د دې برید مسوولیت سمدستي چا پر غاړه ندی اخیستی؛ خو له ایران سره تړلیو عراقي ملیشو  ژمنه کړې، چې د سلیماني او عراقي ملیشو د قومندان ابو مهدي المهندس د وژلو غچ به اخلي.

د چهارشنبې پر ورځ برید په روانه اوونۍ کې دوه یم برید دی، چې د دوشنبې پر ورځ د دوه بې پیلوټه الوتکو د برید له شنډېدو وروسته د بغداد نړیوال هوایي ډګر ته څېرمه پر پوځي اډه لګیږي.

د عراق د هوايي مدافع ځواکونو لخوا د سې شنبې پر ورځ هم له چاودېدونکیو توکو ډکې دوه ډرون الوتکې د عین الاسد هوايي اډې ته، چې د بغداد په لویدیځ کې د امریکایي ځواکونو کوربتوب کوي، ووېشتل شوې.

سلیماني د ۲۰۲۰ کال د جنورۍ په ۳ د بغداد هوايي ډګر ته څېرمه د امریکا د ولسمشر ډونالډ ټرمپ په امر د بې پیلوټه الوتکې په برید کې ووژل شو.

د ایران ولسمشر ابراهیم رییسي د دوشنبې پر ورځ ویلي، چې ټرمپ باید د نوموړي د وژنې په خاطر محاکمه شي که نه تهران به یې غچ واخلي.