د کلیو د بیارغونې او پراختیا وزیر عبداللطیف منصور پر افغانستان د پاکستان د پوځي رژیم د بریدونو په غبرګون کې ویلي، چې اسلامي امارت د افغانانو او پاکستانيانو بې‌ځایه وینه تویول ناروا ګڼي؛ ځکه دواړه لوري مسلمانان دي.

منصور د بدخشان په واخان کې د ۱۲۱ کیلومټره سړک د پرانیستې په مراسمو کې ویلي، چې ځینې کسان د «ورځني بمبارډ» په غبرګون کې احساساتي کېږي؛ خو افغانستان باید د ځان‌بساینې داسې کچې ته ورسېږي، چې له خپلو وګړو دفاع وکړی شي.

نوموړي ویلي:« مونږ باید دا نظام داسې پیاوړی کړو، چې ځان‌بساینې ته ورسېږو او له هر افغان څخه داسې دفاع وکړی شو، چې زیان‌رسوونکی کس په خپل هېواد کې شنډ کړو.»

منصور زیاته کړې، اوسنی نظام اوس هم په بشپړه توګه پر ځان‌بسیا شوی نه‌دی؛ خو هڅه کېږي، هم له افغانانو دفاع وشي او هم وضعیت دې پړاو ته ونه‌رسېږي، چې «وینه تویېږي، جنازې روانې وي او موخه معلومه نه‌وي.»

د کلیو د بیارغونې او پراختیا وزیر ویلي:« مونږ د خپلو خلکو بې‌ځایه وینه تویول ناروا ګڼو او د پاکستانيانو وینه تویول هم ناروا ده؛ ځکه هغوی هم مسلمانان دي.»

د پاکستان پوځي چارواکي تل ادعا کوي، چې په دې هېواد کې د وسله‌والو بریدونه په افغانستان کې تنظیمېږي؛ خو اسلامي امارت دا ادعا رد کړې او څرګندوي، چې افغانستان د پاکستان د «امنیتي ناکامۍ» مسوول نه‌دی.

نن یکشنبه(د تلې دولسمه) د بدخشان د واخان ولسوالۍ له بروغیل سرحدي سیمې څخه د چین تر پولې پورې د ۱۲۱ کیلومټره سړک کار بشپړ او ګټې اخیستنې ته وسپارل شو.

د کلیو د بیارغونې او پراختیا وزیر عبداللطیف منصور د دغه سړک د ګټې اخیستنې په مراسمو کې ویلي، سړک ۶۶ پلچکونه او څلور لوی پلونه لري او د لارې په بېلابېلو برخو کې یې ټولټال ۳۱۰۰ مټره استنادي دېوالونه جوړ شوي دي.

د نوموړي د څرګندونو له مخې، د دغه سړک د جوړولو او جغلاچولو چارې د ۳۶۵ میلیون افغانیو پر لګښت د اسلامي امارت له پراختیايي بودجې بشپړې شوې دي.

عبداللطیف منصور د واخان لارې د پرانستې په مراسمو کې د وینا پر مهال ويلي، دا سړک د افغانستان لپاره سټراټیژیک سیاسي او اقتصادي ارزښت لري.

نوموړي زیاته کړې: سره له دې، چې پاکستان د واخان سړک د جوړولو مخالف و؛ خو د دې پروژې د بشپړولو هوډ یې درلود.

منصور زیاته کړې؛ د پاکستان د هوايي بریدونو غچ به په داسې ډول واخیستل شي، چې د وینې تویېدو او سپکاوي لامل نه‌شي.

دغه راز د بدخشان والي رحمت‌الله نجیب ویلي، په دې ولایت کې امنیت ټینګ دی او د بدخشان په هیڅ سیمه کې امنیتي ستونزه نشته.

رحمت‌الله نجیب ویلي؛ د اسلامي امارت پر ضد به هر ډول حرکت شنډ شي او عاملان به یې یا نیول کیږي او یا به ووژل شي.

د واخان یو شمېر اوسېدونکي هم د دغه سړک له جوړېدو خوښ دي او وايي، د دې سړک له جوړېدو سره به یې ګڼې ستونزې حل شي.

د واخان سړک ۱۲۱ کیلومټره اوږدوالی لري او د جغل اچونې چارې یې په درې کلونو کې بشپړې شوې دي.

ویل کیږي، چې دغه سړک د بدخشان له لارې افغانستان له چین سره نښلوي او د چین او د سیمې له هېوادونو سره د افغانستان د ټرانزیټي او اقتصادي اړیکو د پراختیا لپاره مهمه لار هم ده.

هند ویلي؛ هغه تښتېدلی قاچاقبر، چې له افغانستان څخه هند ته د هیروین او مت‌آمفټامین پر لېږد تورن دی، د ترکیې له‌خوا له دغه هېواد څخه ایستل شوی او هند ته وسپارل شو.

د هند کورنیو چارو وزیر امیټ شاه د شنبې پر ورځ ویلي: ناوپریټ سینګهـ، چې په «ناو» مشهور دی؛ د هندي ادارو له‌خوا له پېژندنې او څارنې وروسته له ترکیې وایستل شو او هند ته بېرته ولېږدول شو.

شاه ویلي، سینګ  «ناواب ویرک» پر جعلي هویت د ترکیې تابعیت ترلاسه کړی و او له افغانستان څخه یې هند ته هیروین او مت‌آمفټامین لېږدول.

دغه ۳۴ کلن کس، چې د هند د پنجاب اوسېدونکی دی؛ د نشه‌يي توکو له څو قضیو سره د تړاو له کبله تر څار لاندې و او له دوه کلونو ډېر وخت تښتېدلی و.

هندي چارواکي ادعا کوي، چې نوموړي د نشه‌يي توکو د قاچاق د یوې نړیوالې شبکې مشري کوله او په هند کې د دغې شبکې چارې یې د تره زوی پرابډیپ سینګهـ سمبالولې.

پرابډیپ سینګهـ، چې «هري» یادیږي؛ په می کې له آذربایجان څخه هند ته بېرته ولېږدول شو. نوموړی په ۲۰۲۱ز.کال کې د ۳۵۸ کیلوګرامه هیروین د موندل کېدا له یوې قضیې سره د تړاو له کبله تر څار لاندې و.

د دې قضیې په اړه باخبره سرچینو ویلي، هند په ۲۰۲۳ او ۲۰۲۴ز.کلونو کې له ترکي چارواکو څخه د ناوپریټ سینګهـ د سپارلو غوښتنه کړې وه.

امیټ شاه له ترکیې څخه د سینګهـ ایستل« تاریخي لاسته راوړنه» بللې او ویلي یې دي، چې د هند حکومت د نشه‌يي توکو د قاچاق د شبکو د له منځه وړلو لپاره ژمن دی.