Connect with us

تازه خبرونه

پاکستان دې د افغان کډوالو ایستل او سپک چلند ودروي – د بشري حقونو د څار اداره

خپور شوی

د

(Last Updated On: لړم ۹, ۱۴۰۲)

د بشري حقونو د څار ادارې ویلي؛ د پاکستان حکومت د افغان کډوالو د ستنولو لپاره له ګواښونو، سپک چلند او نیولو کار اخلي، چې باید پای ته ورسیږي.

دغې ادارې د سې شنبې پر ورځ په یوه اعلامیه کې څرګنده کړې: ډېري افغانان، چې د شړلو له خطر سره مخ دي؛ امریکا، بریتانیا، جرمني او کانادا ته د انتقال لارې څاري.

د پاکستان لنډمهالي حکومت د اکتوبر پر درېیمه څرګنده کړه؛ ټول هغه کډوال، چې په پاکستان کې له قانوني حیثیت پرته ژوند کوي ۲۸ ورځې وخت لري، چې پخپله خوښه ووځي او که نه له شړلو سره به مخ شي.

د بشري حقونو د څار ادارې ويلي، د پاکستانيو چارواکو له‌خوا د ډله ييزو شړلو غوښتنه د افغانانو پر وړاندې د پوليسو د تاوتريخوالي د زياتوالي لامل شوی، چې په کې ځورول، وهل ټکول او پخپلسري توګه بندي کول هم شته.

د بشري حقونو د څار په اداره کې د افغانستان څېړونکې فرشته عباسي وايي: د افغانانو د بېرته ستنېدو لپاره د پاکستان د ضرب الاجل ټاکل د نيولو، وهلو- ټکولو او نیولو لامل شوی او زرګونه افغانان يې د خپل راتلونکي په اړه له وېرې سره مخ کړي دي.

په اسلام‌آباد کې یوه افغان کډوال، خالق عاطفي ويلي، ان هغه افغانان، چې د کډوالو لپاره د ملګرو ملتونو له عالي کمیشنرۍ سره راجستر شوي، له نیولو او شړلو خوندي نه‌دي.

هغه وایي؛ هرځای د پولیسو پوستې پرتې دي. ان که تاسې د اعتبار وړ ویزه هم ولرئ؛ تاسې به بیا هم د پولیسو مرکز ته وړل کیږئ او په ډېرو مواردو کې به تاسې د خوشې کیدو لپاره رشوت ورکړئ.

هغه زياته کړې، چې په ډېرو مواردو کې افغان کډوالو پاکستاني پوليسو ته له لس زره څخه تر څلوېښت زره پورې پاکستانۍ کلدارې رشوت ورکړی دی.

د بشري حقونو د څار ادارې ويلي، د افغانانو شړل د ځورونې پر وړاندې د ملګرو ملتونو د کنوانسیون او د نه منلو د دودیز نړیوال قانون له اصولو څخه د یوه اړخ په توګه د پاکستان له مکلفیتونو سرغړونه ده.

د بشري حقونو د څار ادارې ويلي، د پاکستان حکومت باید د افغان کډوالو پر وړاندې د پولیسو ناوړه چلند پای ته ورسوي، د نومبر د لومړۍ نېټې د ایستلو او شړلو موده دې لغو شي او له UNHCR سره دې د افغان کډوالو د راجستریشن د بیا پیل لپاره کار وکړي.

دې ادارې د امريکا، بريتانيا، جرمني او کانادا له حکومتونو غوښتي، چې په پاکستان کې د هغو افغانانو د میشتېدو لړۍ چټکه کړي، چې په ځانګړي ډول له خطر سره مخ دي.

تازه خبرونه

په غور ولايت کې د ژغورنې د عملیاتو پر مهال يوه پوځي چورلکه رالوېدلې

Published

on

(Last Updated On: غویی ۲۶, ۱۴۰۳)

 نن سهار (چارشنبه د غویی شپږویشتمه ) د غور ولایت په مرکز فیروزکوه ښار کې د ملي اردو یوه چورلکه راغورځېدلې، چې په کې ۱ کس مړ او ۱۲ نور ټپیان دي.

د ملي دفاع وزارت ویاند عنایت الله خوارزمي زیاته کړې؛ د هوايي ځواک «MI 17» ډوله چورلکه غور ولایت د یوه فلانکوچ موټر د هغو کسانو د جسدونو د راایستلو لپاره لېږل شوې وه، چې د هریرود  سیند ته لوېدلی و. د ژغورنې له عملیاتو وروسته دغه چورلکه له تخنیکي ستونزې سره مخ او په فیروزکوه ښار کې د بېړنۍ ناستې پر مهال له یوه دیوال سره ولګېده او راوغورځېده.

آریانانیوز ته د دې چورلکې د رارسېدلې ویډیو له مخې؛ په اوبو کې د چورلکې د راغورځېدو پر مهال یو شمېر کسان هم لیدل کیږي.

ویل کیږي، چې یوه ورځ مخکې د فیروزکوه په غازي دره سیمه کې فلانکوچ موټر له سړکه واوښت او په هریرود سیند کې ډوب  شو، چې له کبله یې دوه کسان مړه او یو بل ټپي شوی و.

Continue Reading

تازه خبرونه

جاپان د لویدیځو هېوادونو پر مستقیمو اړیکو خپل ټینګار څرګند کړ

Published

on

(Last Updated On: غویی ۲۶, ۱۴۰۳)

په افغانستان کې د جاپان سفیر تاکایوشي کورما د اسلامي امارت د ریاست الوزراء له سیاسي مرستیال مولوي عبدالکبیر سره په لیدنه کې ویلي، چې په افغانستان کې د لویدیځو هېوادونو د ډیپلوماټیک حضور نشتوالی د دې لامل شوی، چې دوی په افغانستان کې له مثبتو پرمختګونو بې خبره پاتې شي او پر وینا یې دا مناسبه ده، چې نړیواله ټولنه مستقیماً له اسلامي امارت سره اړیکې ولري.

تاکایوشي کورما زیاته کړې، چې جاپان له افغانانو سره د طبیعي پېښو د مخنیوي، پر نشه‌یي توکو د روږدو کسانو د درملنې او د افغان کروندګرو لپاره د بدیل کښت په برخو کې همکارۍ ته ژمن دی.

دغه راز مولوي عبدالکبیر په دې لیدنه کې ویلي؛ د ولسونو د ملاتړ له کبله اسلامي امارت بریالی شوی، چې ملي سوله رامنځته، سترې پروژې پیل او ګڼ نور اصلاحات رامنځته کړي.

ویل کیږي، چې اسلامي امارت د خلکو د اقتصادي ستونزو د اواري هڅه کوي او له نړۍ سره مثبت تعامل او پراخې اړیکې غواړي.

Continue Reading

تازه خبرونه

روسیې په افغانستان کې له سیلاب ځپلیو سره مرستې ته چمتووالی څرګند کړ

Published

on

(Last Updated On: غویی ۲۶, ۱۴۰۳)

د روسیې د بهرنیو چارو وزارت ویاندې څرګنده کړې، چې هېواد یې د افغانستان په شمال کې له سیلاب ځپلیو سره مرستې ته چمتو دی.

د ماریا زاخارووا په خبرپاڼه کې راغلي؛ روسیه چمتو ده، چې د افغانستان د چارسمبالي حکومت د غوښتنې په صورت کې به له افغانستان سره مرستې وکړي.

د روسیې بهرنیو چارو وزارت د دوشنبې پر ورځ (د غویی څلیریشتمه) په بغلان او د افغانستان په شمالي ولایتونو کې د سختو بارانونو له کبله د ویجاړوونکي او مرګوني سیلابونو د قربانیانو له کورنیو سره خپله خواخوږي څرګنده کړه.

ماریا زاخارووا ویلي: د دې طبیعي ناورین په مناسبت د افغانستان خلکو ته د خپلې ژورې خواخوږۍ مراتب وړاندې کوم. مونږ د قربانیانو له خپلوانو او دوستانو سره خپله خواخوږي څرګندوو.

له دې مخکې ایران، ترکیې، قطر او یو شمېر مرستندویه بنسټونو د افغانستان له سیلاب ځپلیو سره مرستې ته چمتووالی ښودلی دی.

د راپورونو له مخې، سیلابونو او سختو بارانونو د افغانستان په شمال کې یو شمېر کلي ویجاړ کړي او تر اوسه یې له ۳۱۵ ډېر کسان وژلي دي.

ویل کیږي، چې د ماشومانو د ژغورنې بنسټ اعلان کړی، چې په بغلان کې وروستیو سیلابونو د ۸۰ زره کسانو ژوند اغېزمن کړی او ۱۲ زره کورونه یې ویجاړ کړي دي.

Continue Reading

Trending

Copyright © 2022 Ariana News. All rights reserved!