تازه خبرونه
مونږ پر پاکستان د تي تي پي په بریدونو کې د افغانستان بې تفاوتي زغملی نهشو
د پاکستان د لنډمهالي حکومت لومړي وزیر یو ځل بیا له افغانستان غوښتي، چې یا دې د تحریک طالبان پاکستان غړي اسلامآباد ته وسپاري او یا یې باید پر ضد اقدام وکړي.
انوارالحق کاکړ له پاکستانيو رسنیو سره په خبرو کې اسلامي امارت د پاکستانيو طالبانو د غړیو پر وړاندې پر بې غورۍ تورن کړ او څرګندوي، چې پر پاکستان د دې ډلې بریدونه د منلو نهدي.
اسلامي امارت یو ځل بیا په افغانستان کې د پاکستانيو طالبانو شتون ردوي او وایي، چې د افغانستان خاوره د پاکستان پر ضد نه کارول کیږي.
اسلامي امارت په څه باندې دوه کلنه واکمنۍ کې تل ټینګار کړی، چې د افغانستان له خاورې هیچاته پر نورو هېوادونو د بریدونو اجازه نهدهورکړ شوي او نه به یې پر وړاندې وکارول شي؛ خو پاکستان یوازنی هېواد دی، چې د افغانستان له خاورې د بریدونو ادعاوې کوي.
په دې وروستیو کې د پاکستان لنډمهالي لومړي وزیر له جیونیوز تلویزوني شبکې سره په خبرو کې ویلي؛ د پاکستان پر خلکو او امنیتي ځواکونو د تحریک طالبان پاکستان د بریدونو په اړه به د اسلامي امارت بې پروايي او بې تفاوتي ونه زغمي.
د پاکستان لنډمهالي حکومت لومړی وزیر انوارالحق کاکړ د خپلو خبرو پر مهال ویلي؛ دا د افغانستان د حکومت خوښه ده، چې تي تي پي مونږ ته سپاري او که پر ضد یې اقدام کوي. مونږ ته دا د منلو نهده، چې تي تي پي پر ملکي وګړیو او پاکستانيو امنیتي ځواکونو بریدونه کوي او افغان حکومت یې په اړه بې تفاوته پاتې وي. مونږ باید ځواب ورکړو؛ مونږ باید پر پاکستان د تي تي پي د بریدونو په اړه د افغانستان بې پروايي ونه زغمو.
انوار الحق کاکړ ادعا کړې، چې د افغانستان اوسني واکمن پوهېږي، چې تحریک طالبان پاکستان په کوم ځای کې د پاکستان پر ضد د خپلو بریدونو پلان عملي کوي.
په دې اړه د اسلامي امارت ویاد ذبیح الله مجاهد په افغانستان کې د تحریک طالبان پاکستان شتون او فعالیت رد کړی او څرګندوي، چې دا د پاکستان خپله کورنۍ ستونزه ده او افغانستان د پاکستان د امنیت ضامن نهدی.
د پاکستان د عالمانو شورا مشر محمد طاهر محمود اشرفي هم د استوګنې له قانوني اسنادو پرته د افغان مهاجرینو له شړلو او ایستلو دفاع کړې او وایي، چې د مهاجرینو د ایستلو موخه د پاکستان د امنیت تامینول دي.
محمد طاهر محمود اشرفي دا ادعا هم کړې، چې د پاکستان په ناامنیو کې یو شمېر افغانان لاس لري؛ خو نوموړي د دې ادعا لپاره کوم ثبوت نهدی وړاندې کړی.
دا مهال د کابل او اسلامآباد اړیکې د تحریک طالبان پاکستان او د افغان کډوالو د جبري شړلو له کبله ترینګلې شوې دي. که څه هم د پاکستان د بهرنیو چارو وزارت ویلي، چې له افغانستان سره یې ارتباطي چینلونه ساتلي دي.
تازه خبرونه
شهاب الدین دلاور او ورسره مل پلاوي د مس عینک کان له اړوند سیمو لیدنه وکړه
د کانونو او پټرولیم وزارت چارسمبالي او ور سره مل پلاوي د چارشنبې پر ورځ د غویی نولسمه د مس عینک کان له بېلابېلو سیمو او د عینک سیمې له لرغونو آثارو لیدنه وکړه.
لوګر ولایت ته په دې سفر کې د کانونو او پټرولیم وزارت له چارسمبالي شهاب الدین دلاور سره د اطلاعاتو او کلتور وزارت چارسمبالي ملا خیرالله خیرخواه، په کابل کې د چین هېواد سفیر ژاو شینک، د MCC شرکت چارواکو، والي ضیاءالرحمن مدنی او د انرژۍ او اوبو وزارت مرستیال ملتیا کوله.
د کانونو او پټرولیم وزارت د څرګندونو له مخې؛ په دې اړه یوه ناسته هم تر سره شوه، چې په کې د MCC شرکت چارواکو د مس عینک کان د سړک جوړولو، د لرغونو آثارو ساتنې د پلان د وروستي کېدو او د عملي کار د پیل په اړه هر اړخیز معلومات وړاندې کړل.
د یاد شرکت چارواکو ویلي، چې د مس عینک کان د پروژې له عملي پیل سره به په سیمه کې لرغونو آثارو ته زیان ونه رسیږي.
دغه راز د اطلاعاتو او کلتور وزارت چارسمبالي هم د دغې سيمې د لرغونو آثارو او د هغو د ساتنې په اړه خبرې وکړې او د پروژې د کار د ګړندي کولو لپاره يې د همکارۍ ژمنه وکړه.
د انرژۍ او اوبو وزارت مرستیال هم د مس عینک کان د برښنا او اوبو رسولو په برخه کې د دې وزارت له همکاریو ډاډ څرګند کړ.
ویل کیږي، چې د لوګر مس عینک کان تړون له یوې چینايي کمپنۍ سره ۱۶ کاله پخوا لاسلیګ شوی دی؛ خو د دغه کان استخراج اوس هم ندی پیل شوی.
تازه خبرونه
سعودي عربستان ته د افغان حاجیانو د لېږد بهیر پیل شو
د ارشاد، حج او اوقافو وزارت چارسمبالي نور محمد ثاقب ويلي، چې له افغانستان څخه سعودي عربستان ته د حاجیانو د لېږد بهیر پیل شوی دی.
د نورمحمد ثاقب د څرګندونو له مخې؛ تېره شپه (چارشنبه د غویي نولسمه) شاوخوا ۲۳۰ حاجیان په لومړۍ الوتنه کې مدینې منورې ته ولېږدول شول.
نوموړي د افغان حاجيانو د لومړي کاروان د لېږد په مراسمو کې ويلي، چې سږ کال يې حج کوونکیو ته د غوره خدمتونو د وړاندې کولو لپاره د نورو کلونو په پرتله د کاري کمیټې کارکوونکي سعودي عربستان ته مخکې لېږلي دي.
دغه راز د ریاست الوزراء اداري مرستیال عبدالسلام حنفي په دې مراسمو کې حاجیانو ته په خطاب کې ویلي: ګرانو حاجیانو! تاسې په سعودي عربستان کې د افغانانو استازي یاست؛ نو دغه استازیتوب په ښه توګه ترسره کړئ.
عبدالسلام حنفي زیاته کړې؛ د ارشاد، حج او اوقافو وزارت په هلو ځلو تېرو کلونو ته ورته سږ کال هم د حج ټول فعالیتونه په منظم ډول ترسره شوي دي.
له دې مخکې د حج او اوقافو وزارت اعلان کړی و، چې سږ کال سعودي عربستان افغان حاجیانو ته ۳۰ زره سهمیه ورکړې ده.
ویل کیږي، چې آریانا افغان او کام ایر شرکتونو ته سږکال هم د افغان حاجیانو د لېږد او راستنولو مسوولیت سپارل شوی دی.
تازه خبرونه
تېر کال پر زړه د سوريو ۷۰۰ ماشومانو درملنه وشو – سره میاشت
د افغانستان په سویل لویديځ کې سره میاشت ادارې ويلي؛ تېر کال يې پر زړه سوريو ٧٠٠ ماشومانو درملنه کړې او په پام کې ده، چې سږ کال د ١٥ زره اړوند ماشومانو درملنه وکړي.
سره صلیب او سرې میاشتې ټولنې نړیواله ورځ د بشریت ژوندي ساتلو تر سرلیک لاندې ولمانځل شوه. په دې مراسمو کې د رییس الوزار سیاسي مرستیال له نړیوالې ټولنې وغوښتل، چې افغانستان هېر نه کړي، ځکه دا هېواد له اقتصادي ستونزو، زلزلو، طبیعي پېښو او کډوالو جبري شړلو سره مخ دی او اسلامي امارت نشي کولی دا ستونزې په یوازې سر حل کړي.
د رییس الوزرا سیاسي مرستیال مولوي عبدالکبیر ويلي؛ نړیواله ټولنه باید افغانستان له بشري اړخه هېر نکړي؛ ځکه، چې بشري همکارۍ ته اړتیا لري.
هغه وایي؛ بانکي بنديزونو او د مرستو کمېدو د افغانستان اقتصادي وضعيت پېچلى کړى او د اسلامي امارت فعاليتونه يې محدود کړي دي، نو باید د افغانستان شتمنۍ ازادې شي.
د مولوي عبدالکبیر د څرګندونو له مخې؛ د مرستو کمښت او د بانکي بندیزونو دوام د اسلامي امارت پر فعالیتونو منفي اغېز کړی دی.
د اسلامي امارت دغه چارواکي زیاته کړې، چې اسلامي امارت له نړۍ سره د متقابل احترام له مخې دوه اړخیزې اړیکې غواړي.
په افغانستان کې د سره صليب کمیټه هم د افغانستان له خلکو سره د دې بنسټ د فعاليتونو او همکاريو پر دوام ټينګار کوي.
په افغانستان کې د سره صلیب نړیوالې کمیټې رییسه کترینا ریتز ویلي: د سره صليب نړيواله کمیټه او افغاني سرې مياشتې ټولنه په ګډه کار کوي او غواړي، چې له زيانمنو شويو ټولنو سره مرستې وکړي، د دوی اساسي اړتياوې پوره او هغوی ته بنسټیز خدمتونه وړاندې کړي.
افغانني سرې میاشتې ټولنې ویلي، چې د مرستندویه بنسټونو پر وړاندې کومه ستونزه نشته او دوی کولی شي مرستې د هېواد لرې پرتو سیمو ته ورسوي.
-
تازه خبرونه4 days ago
په غور کې د سېلابونو له کبله سلګونه خلک بې ځایه شول
-
نړۍ2 days ago
حماس او اسرائیل کولی شي په غزه کې د اوربند په اړه واټن راکم کړي – امریکا
-
تازه خبرونه5 days ago
اسلامي امارت په بدخشان کې د اعتراضي لاريون د څېړلو لپاره یو پلاوي وټاکه
-
تازه خبرونه2 days ago
د پاکستان خاوره د افغانستان پر ضد کارول کیږي
-
تازه خبرونه4 days ago
په افغانستان کې پر کوکنارو د بندیز له کبله کروندګرو خپل عاید له لاسه ورکړی – نړیوال بانک
-
تازه خبرونه1 day ago
د سې شنبې پر ورځ خراسان او سرخ پوشان لوبډلو لوبه وګټله
-
نړۍ4 days ago
اسرائیلي ځواکونو بیت المقدس ته نږدې د الجزیرې پر رسنیز دفتر چاپه ووهله
-
تازه خبرونه2 days ago
دولتي بنسټونه د برښنا له شرکت څخه یو نیم میلیارډ افغانۍ پوروړي دي