سوداگري
د سوداګرۍ او صنایعو وزارت د ۷ میلیون ډالرو پر ارزښت د هوکړهلیکونو له لاسلیک خبر ورکړ
د صنایعو او سوداګرۍ وزارت ويلي، چې نن (پنجشنبه د غويي ۱۶نېټه) د دغه وزارت سرپرست نورالدین عزیزي له ۱۱ بنسټونو سره هوکړه لیکونه لاسلیک کړل.
د صنایعو او سوداګرۍ وزارت د څرګندونو له مخې؛ د دغه وزارت چارسمبالي د اړوند بنسټونو له رییسانو سره په خپل کاري دفترونو کې وکتل.
په دې کتنه کې د صنعت او سوداګرۍ وزارت چارسمبالي د دغو بنسټونو له رییسانو څخه د هېواد په پرمختګ کې د هغو د هحو او رول له کبله مننه وکړه.
هغه زیاته کړې: د افغانستان اسلامي امارت د پانګوالو او بنسټونو د اسانتیاوو لپاره هر اړخیز پروګرامونه لري او ملاتړ ترې کوي.
همدا راز نورالدین عزیزي د اړوند ادارو له رییسانو وغوښتل؛ د هغو مهاجرینو، چې تازه هېواد ته راستانه شوي، روزنې او کارموندنې ته لومړیتوب ورکړي.
د غونډې په بهیرکې د یو شمېر بنسټونو استازو د صنعت او سوداګرۍ وزارت له هراړخیزو همکاریو مننه وکړه او وایي: ټول بنسټونه له دولت سره همکارۍ ته ژمن دي او د هېواد د سوکالۍ او هوساینې لپاره کار او هڅې کوي.
د سوداګرۍ او صنایعو وزارت د څرګندونو له مخې: دغه هوکړهلیکونه د هېواد په ۱۵ ولایتونو کې د مهارتونو او مسلکي خدمتونو په اړه د څه باندې اووه میلیون ډالرو پر ارزښت له زیانمنو کورنیو سره د مرستې، له کوچنیو متشبثینو څخه د ملاتړ او اومه توکو ته د لاسرسي، د کوچنیو پانګونو او سوداګرۍ، د ټیلیفون له لارې د سوداګرۍ وده او پراختیا، د باثباته ژوند لپاره له زیان منونکو ځوانانو ملاتړ، د کوچنیو کچو دندو او سوداګریزو کاري فرصتونو له لارې د بېوزلو او اړو کورنیو ځواکمنتیا، ښځو ته لاسيصنایع او حرفوي پروګرامونو او ټغراوبدنې د ورکشاپونو پر جوړولو کوچنۍ سوداګرۍ ته د ودې او پراختیا ورکولو لپاره؛ لاسلیک شوي دي.
سوداگري
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
د افغانستان د ټرانسپورټ او هوايي چلند وزارت څرګنده کړې، چې افغانستان او پاکستان د بار وړونکیو موټرو د ورداخلېدو پر لنډمهالي سند ورکولو هوکړه کړې ده.
دغه وزارت نن (یکشنبه د غویی درویشتمه ) په یوه خبرپاڼه کې ویلي، هغه موټر چلوونکي او کلینران، چې له افغانستان او پاکستان څخه سوداګریز توکي لېږدوي؛ باید دغه سند له ځانه سره ولري، چې وکولی شي له دې لارې تېر شي.
د دغې خبرتیا پر بنسټ، یاد سند به په کابل کې د پاکستان سفارت او په کندهار کې د قونسلګرۍ لهخوا پر اړوند افغانانو ووېشل شي.
د پاکستانیانو لپاره دا سند په پېښور او کوټه کې د افغانستان د ټرانسپورټي اتشې لهخوا ورکول کیږي.
د ټرانسپورت وزارت د بار وړونکیو وسایطو له خاوندانو او چلوونکیو څخه غوښتي، چې د غبرګولي میاشتې تر لومړۍ نېټې پورې دې د اړتیا وړ اسناد خپلو اړوند ټرانسپورټي شرکتونو ته وسپاري.
دغه وزارت دا خبرداری هم ورکړی، چې د غبرګولي میاشتې له لومړۍ نېټې وروسته به له نويو اسنادو پرته باروړونکې لارۍ پاکستان او افغانستان ته تګ راتګ ونشي کولی.
سوداگري
ازبکستان او پاکستان د افغان ټرانس اوسپنېپټلۍ پروژې پر پیلېدا ټینګار څرګند کړ
د ازبکستان او پاکستان د بهرنیو چارو وزیرانو د ازبکستان، افغانستان او پاکستان د اوسپنې پټلۍ پروژې پر ژر عملي کېدو ټینګار کړی دی.
د پاکستان د بهرنیو چارو وزیر له خپل ازبک سیال بختیار سیدوف سره په لیدنه کې د ازبکستان، افغانستان او پاکستان یا افغان ټرانس اوسپنې پټلۍ پروژې د چټکتیا غوښتنه کړې ده.
د دې وزارت خبرپاڼې له مخې؛ په دې ليدنو کې د دوه اړخيزو سوداګريزو اړيکو د پراختيا، د پانګونې او مخابراتي پروژو په اړه بحثونه وشول.
په خبرپاڼه کې راغلي، چې دواړو لوریو د “افغان ټرانس” پروژې عملي کېدل د سیمې د هېوادونو پر ګټه وګڼل او څرګندوي، چې دا پروژه به د جنوبي او مرکزي آسیا ترمنځ د سوداګرۍ پر لنډې او ډاډمنه لار بدله شي.
په دې کتنه کې د ازبکستان د بهرنیو چارو وزیر د افغان ټرانس اوسپنې پټلۍ پروژې د ژر تر ژره عملي کېدو لپاره د هڅو پر چټکتیا ټینګار څرګند کړ.
د پاکستان بهرنیو چارو وزارت اعلان کړی، چې د دغه هېواد د بهرنیو چارو وزیر په اسلامآباد کې له خپل ازبک سیال بختیار سیدوف سره په کتنه کې د ازبکستان، افغانستان او پاکستان د اوسپنې پټلۍ پروژې د چټکتیا غوښتنه وکړه. دواړو لوریو د “افغان ټرانس” پروژې پلي کېدل د سیمې د هېوادونو په ګټه وګڼل.
د دغې خبرپاڼې له مخې؛ د پاکستان بهرنیو چارو وزیر محمد اسحاق ډار د ازبکستان د بهرنیو چارو له وزیر بختیار سیدوف سره د پراخو دوه اړخیزو سوداګریزو اړیکو، پانګونې، امنیت، د خلکو تر منځ د اړیکو او ارتباطي پروژو پر ټولو اړخونو خبرې وکړې او د ازبکستان د ژر تر ژره تطبیق لپاره یې د افغانستان او پاکستان د اوسپنې پټلۍ پر پروژې ټینګار وکړ.
له دې مخکې د ازبکستان چارواکو داسې ټینګار کړی و: د افغانستان له لارې د اوسپنې پټلۍ، چې منځنۍ آسیا د افغانستان له لارې له پاکستان سره نښلوي، د ۲۰۲۷ کال تر پایه بشپړه شي.
تمه ده، چې دا ۷۶۰ کیلومټره د اوسپنې پټلۍ به د ازبکستان او پاکستان ترمنځ د کارګو د لېږد وخت هم راکم کړي. د “افغان ټرانس” پروژې یوه بله ګټه د توکو د لېږد رالېږد په لګښت کې ۴۰ سلنه کموالی دی.
اقتصادي شنونکي شبیر بشیري ویلي؛ د ازبکستان، افغانستان او پاکستان ترمنځ د اوسپنې پټلۍ جوړول د سیمې د هېوادونو ترمنځ د سوداګریزو او اقتصادي اړیکو په پراخولو او اسانتیا کې اغېزمن رول لري.
د يادونې وړ ده، چې د افغانستان، پاکستان او ازبکستان تر منځ د اوسپنې پټلۍ د جوړولو پلان په ۲۰۱۸ کال کې طرحه شو، چې څه باندې څلور نيم ميليارډ ډالر لګښت لري. په دې وروستیو کې اسلامي امارت ویلي، چې قطر هم د دې پروژې مالي ملاتړ اعلان کړی دی.
سوداگري
د تاتارستان سوداګر په افغانستان کې پر تېلو او ګازو پانګونې ته لیواله شول
د کانونو او پټرولیم وزارت ویلي، چې د دې وزارت چارسمبالي شهاب الدین دلاور په کابل کې د تاتارستان جمهوریت له یو شمېر سوداګرو، د تېلو او ګازو د پروسس کمپنیو له استازو سره وکتل.
د تاتارستان سوداګرو د کانونو او پټرولیم وزارت له رهبرۍ سره په لیدنه کې د تېلو او ګازو د استخراج او پروسس په برخه کې د خپلو کاري تجربو په اړه د معلوماتو وړاندې کولو ترڅنګ ویلي، چې افغانستان پر یو منظم سیسټم سربېره د بشپړ امنیت درلودونکی دی او د پانګونې لپاره په کې ښه زمینه برابره شوې ده. دوی وایي؛ زمونږ کمپنۍ لیواله ده، چې د افغانستان د تېلو او ګازو د سروې، اکتشاف او استخراج په برخه کې پانګونه وکړي.
د کانونو او پټرولیم وزارت چارسمبالي د دوی د پانګونې له لیوالتیا هر کلی کړی او وایي، چې له نېکه مرغه افغانستان په بېلابېلو برخو کې د تېلو او ګازو پراخې زېرمې لري، چې په ځانګړي توګه اوس د هرات ولایت د تېلو او ګازو بلاکونه هم اعلان ته سپارل د تاتارستان مسلمان هېواد سوداګر هم کولی شي د هېواد د تېلو او ګازو په زېرمو کې پانګونه وکړي او دا وزارت به د خپلو اړوند قوانینو له مخې پوره همکاري وکړي.
دا په داسې حال کې ده، چې نوموړي نن په کابل کې د ټاپي پروژې له اجرائیوي رییس او مل پلاوي سره د دې پروژې پر بېلابېلو خواوو هم بحث او خبرې کړې دي.
-
تازه خبرونه5 days ago
د پاکستان خاوره د افغانستان پر ضد کارول کیږي
-
نړۍ5 days ago
حماس او اسرائیل کولی شي په غزه کې د اوربند په اړه واټن راکم کړي – امریکا
-
تازه خبرونه4 days ago
د سې شنبې پر ورځ خراسان او سرخ پوشان لوبډلو لوبه وګټله
-
سوداگري3 days ago
ازبکستان او پاکستان د افغان ټرانس اوسپنېپټلۍ پروژې پر پیلېدا ټینګار څرګند کړ
-
تازه خبرونه5 days ago
دولتي بنسټونه د برښنا له شرکت څخه یو نیم میلیارډ افغانۍ پوروړي دي
-
لوبی3 days ago
ابو مسلم او عدالت فراه مساوي شول او میوند لوبډلې جوانان واحدي ته ۲ ګولونه ورکړل
-
تازه خبرونه4 days ago
په بدخشان ولایت کې ماین چاودنې ۸ کسانو ته مرګ او ژوبله اړولې
-
تازه خبرونه4 days ago
تېر کال پر زړه د سوريو ۷۰۰ ماشومانو درملنه وشو – سره میاشت