تازه خبرونه
پاکستان د افغانستان په اړه د سیمهییزو اړیکو ډلې د جوړېدو خڼد شو
د پاکستان “ایکسپرس ټریبیون” ورځپاڼې څرګنده کړی، چې د افغانستان په اړه د سیمهییزو اړیکو ډلې د جوړولو وړاندیز د ځینو هېوادونو د شاملېدو پر سر د اختلافاتو له کبله له خنډونو سره مخ شوی دی.
په فبرورۍ میاشت کې د افغانستان په اړه د دوحې له کنفرانس وروسته د سیمهییزو اړیکو ډلې د جوړولو وړاندیز د ملګرو ملتونو د عمومي منشي انټونیو ګوټرش لهخوا وړاندې شوی و.
یاده ډله د افغانستان له نږدې ګاونډیانو او نورو اړوند اړخونو جوړېږي؛ خو ایکسپرس ټریبیون ورځپاڼې د یوشمېر سرچینو د څرګندونو له مخې راپور ورکړی، چې په سیمهییزو اړیکو ډله کې د هند له ګډون سره د پاکستان مخالفت د کړکېچ لامل شوی دی.
د تاریخ په اوږدو کې پاکستان او هند په افغانستان کې د یو بل رول ته د شک پر سترګه کتلي دي.
په سیمهییزو اړیکو ډله کې د نوي ډیلي له شاملیدو سره د اسلامآباد مخالفت د هغه د اوږدې مودې له اندېښنو سرچینه اخلي، چې ګویا هند په افغانستان کې ثبات ته زیان رسوي.
د یادې ورځپاڼې د څرګندونو له مخې؛ په داسې حال کې، چې له اسلامي امارت سره د پاکستان اړیکې ترینګلې شوي، هند په وروستیو میاشتو کې له کابل سره خپلې اړیکې زیاتې کړې دي.
د سیمهییزو اړیکو ډلې د جوړولو وړاندیز د ملګرو ملتونو د پراخو هڅو د یوې برخې په توګه له اسلامي امارت سره د تعامل او همغږۍ د ټینګښت لپاره وړاندې شوی دی.
د ملګرو ملتونو یو پلاوی به ډېر ژر کابل ته سفر وکړي، چې د دوحې د کنفرانس پر پایلو د ټینګار لپاره له اسلامي امارت څخه وغواړي، چې خپل نړیوالې ژمنې تر سره کړي.
ایکسپرس ټریبیون ورځپاڼې خبر ورکړی، چې یاد پلاوی به کابل ته د خپل سفر پر مهال د اسلامي امارت د سخت دریځ په اړه خبرداری ورکړي.
د یادونې ده، چې اسلامي امارت له دې مخکې د سیمې او نړۍ سره پر متوازنو سیاسي او اقتصادي اړیکو ټینګار څرګند کړی دی.
تازه خبرونه
د تورخم لار لنډمهاله تړل کیږي
د تورخم کمیشنر عبدالجبار حکمت ويلي؛ د تورخم لار به د پاکستان له لوري د ۳ ورځو لپاره د ناروغانو او مسافرو د تګ راتګ پر مخ تړلې وي.
عبدالجبار حکمت ویلي، چې دغه لار به د جمعې له ورځې ( د غویی اتویشتمه) څخه تر یکشنبې ( د غویی دېرشمه ) پورې د ناروغانو او مسافرو پر مخ تړلې وي.
هغه زياته کړې، چې دغه سوداګريزه لار به ٢٤ ساعته پرانيستې وي او د باروړونکیو موټرو تګ راتګ او د سوداګريزو توکو لېږد رالېږد به روان وي.
حکمت زياته کړې، چې د ناروغانو او مسافرو پر مخ د دې لارې د بندېدو لامل له پخوانۍ ودانۍ څخه نوې ودانۍ ته د پاکستان د سرحدي دفترونو لېږدول دي.
تازه خبرونه
د سولې په چارو کې د ملګرو ملتونو د عمومي منشي مرستیال کابل ته راغلی
د سولې په چارو کې د ملګرو ملتونو د عمومي منشي مرستیال ژان پیر لاکروا به د دوه ورځني سفر په بهیر کې له جګړې څخه د پاتې چاودیدونکیو توکو د خطرونو په اړه د پوهاوي پر لوړولو راوڅرخیږي.
د سولې په چارو کې د ملګرو ملتونو د عمومي منشي مرستیال ژان پیر لاکروا له یوه پلاوي سره کابل ته راغلی دی.
د ملګرو ملتونو د ویاند مرستیال فرحان له دې مخکې په یوه خبري غونډه کې ویلي وه، چې ین پییر لاکروا به افغانستان ته په خپل سفر کې د چاودېدونکیو توکو د اغېزو په اړه د اسلامي امارت له چارواکو سره خبرې وکړي.
په دغه سفر کې له نوموړي سره د ملګرو ملتونو د ماین پاکۍ د څانګې مشره هم مل ده.
هغه زیاته کړې، چې لاکروا به د مې تر اووهلسمې پورې په کابل کې وي او په دې سفر کې به د ملګرو ملتونو د ماین پاکۍ د څانګې مشره ایلین کوهن هم ورسره مل وي.
د ملګرو ملتونو دغه چارواکي ویلي، چې د افغانستان خلک د ماینونو له خطر سره مخ دي او د ۲۰۲۳ کال له جنورۍ څخه د ۲۰۲۴ کال تر مارچ پورې په افغانستان کې د ۸۲۱ چاودېدونکیو توکو د وژل شویو ۸۱ سلنه ماشومان ول.
تر اوسه اسلامي امارت په دې اړه جزئیات ندي ورکړي.
د سولې په چارو کې د ملګرو ملتونو د عمومي منشي مرستیال په داسې حال کې افغانستان ته سفر کوي، چې ټاکل شوې د روان کال په جون میاشت کې د افغانستان په اړه په دوحه کې درېیمه غونډه جوړه شي.
دا په داسې حال کې ده، چې د ملګرو ملتونو د څرګندونو پر بنسټ، له دې مخکې د سولې په چارو کې د ملګرو ملتونو د عمومي منشي مرستیال قطر ته د سفر پر مهال د دغه هېواد له چارواکو سره د سولې د ټینګښت او د ستونزو په اړه خبرې کړې وې.
تازه خبرونه
په غور ولايت کې د ژغورنې د عملیاتو پر مهال يوه پوځي چورلکه رالوېدلې
نن سهار (چارشنبه د غویی شپږویشتمه ) د غور ولایت په مرکز فیروزکوه ښار کې د ملي اردو یوه چورلکه راغورځېدلې، چې په کې ۱ کس مړ او ۱۲ نور ټپیان دي.
د ملي دفاع وزارت ویاند عنایت الله خوارزمي زیاته کړې؛ د هوايي ځواک «MI 17» ډوله چورلکه غور ولایت د یوه فلانکوچ موټر د هغو کسانو د جسدونو د راایستلو لپاره لېږل شوې وه، چې د هریرود سیند ته لوېدلی و. د ژغورنې له عملیاتو وروسته دغه چورلکه له تخنیکي ستونزې سره مخ او په فیروزکوه ښار کې د بېړنۍ ناستې پر مهال له یوه دیوال سره ولګېده او راوغورځېده.
آریانانیوز ته د دې چورلکې د رارسېدلې ویډیو له مخې؛ په اوبو کې د چورلکې د راغورځېدو پر مهال یو شمېر کسان هم لیدل کیږي.
ویل کیږي، چې یوه ورځ مخکې د فیروزکوه په غازي دره سیمه کې فلانکوچ موټر له سړکه واوښت او په هریرود سیند کې ډوب شو، چې له کبله یې دوه کسان مړه او یو بل ټپي شوی و.
-
تازه خبرونه4 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
تازه خبرونه3 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
سوداگري4 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
د یوناما استازې د ایران له بهرنیو چارو وزیر سره وکتل
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
تازه خبرونه2 days ago
په ننګرهار کې د ناکامورا کانال پروژه بشپړه شوه