ملي دفاع وزارت اعلان کړی، چې د اسلامي ملي اردو په لیکو کې د شاملېدا لپاره د امنیتي او تصفیوي کمیسیون له‌خوا د تائید شویو کسانو د نوم‌لیکنې بهیر رسمي پیل شوی دی.

د دې وزارت د څرګندونو له مخې؛ په مرکز او ولایتونو کې د جلب او جذب مرکزونه د غوښتونکو د منلو لپاره چمتووالی لري.

د دفاع وزارت د څرګندونو له مخې، د ځواکونو نوم‌لیکنه د تابعیت تذکرې او د امنیتي او تصفیوي کمیسیون له‌خوا د تائید شوې فورمې پر وړاندې کولو ترسره کېږي.

د دې بهیر د پیل امر ملي دفاع وزیر محمد یعقوب مجاهد صادر شوی دی.

پوځي شنونکي وایي؛ دا اقدام د امنیتي ځواکونو د وړتیا د پیاوړتیا او د هېواد د امنیت د ښه خوندي ساتلو لپاره ترسره شوی دی.

د هغوی پر باور، د روزل شویو ځواکونو د شمېر زیاتوالی کولی شي هم د کورنیو ګواښونو پر وړاندې اغېزمن وي او هم د ملي اردو عملیاتي وړتیا لوړه کړي.

همدارنګه ځینې باخبره کسان ټینګار کوي، چې د اسلامي امارت د ځواکونو تر څنګ باید د نورو وړ ځوانانو د جذب لپاره هم زمینه برابره شي.

له دې مخکې د اسلامي امارت ویاند ویلي وه، چې په ۲۰۲۵ کال کې د اسلامي ملي اردو د روزل شویو ځواکونو شمېر ۱۸۱ زره ته رسېدلی او له ۱۰۰ زره زیات پولیس هم په بېلابېلو برخو کې روزل شوي دي.

د اسلامي امارت بهرنیو چارو وزارت د ډیپلوماسۍ اندتون(انسټیټیوټ ) د قطر پر همکارۍ د «ډیپلوماسۍ نښلوونکې شبکې» تر سرلیک لاندې یو پېنځه ورځنی روزنیز پروګرام ترسره کړی دی.

دې وزارت په یوه خبرپاڼه کې لیکلي، چې دا روزنیز کورس د قطر د یوه باتجربه ډیپلوماټ عمر غانم له‌خوا وړاندې شوی دی.

په دې پروګرام کې ګډونوالو ته د معاصرې ډیپلوماسۍ بنسټیز مفاهیم، د ډیپلوماټیکو شبکو جوړښت او د ډیجیټلي ډیپلوماسۍ ارزښت وسپړل شو او عمرغانم د بېلابېلو هېوادونو په ډیپلوماټیکو ماموریتونو کې خپلې عملي تجربې ګډونوالو ته وړاندې کړې.

د پروګرام د وروستۍ برخې پر مهال په ځانګړو مراسمو کې د اسلامي امارت د بهرنیو چارو وزارت مرستیال، د قطر د کابل سفیر او د دې وزارت د ډیپلوماسۍ اندتون رییس د ډیپلوماټانو د مسلکي روزنې او د تجربو د شریکولو پر ارزښت او د هېواد د بهرنۍ پالیسۍ د پیاوړتیا لپاره د دغه راز تخصصي او ګډو پروګرامونو د دوام پر اړتیا ټینګار او څرګندونې وکړې.

د یادونې ده، چې دا روزنیز پړاو د ګډونوالو د مننلیکونو پر وېش پای ته ورسېد.

د آلمان کورنیو چارو وزارت ویاند ویلي، چې په دې وروستیو کې د افغانانو یوه ۳۲ کسیزه ډله له پاکستان څخه د برلین ښار ته لېږدول شوې ده.

د آلمان حکومت د ۲۰۲۵ کال د مې په میاشت کې د افغانانو د منلو پروګرام درولی و؛ خو دا بهیر په آلمان کې د قانوني کړنو له کبله بېرته پیل شوی دی.

شاوخوا ۲۲۰ کسه پخواني سیمه‌ییز کارکوونکي، ۶۰ نور په «بشري حقونو نوملړ» کې راغلي کسان، نږدې ۶۰۰ کسان د «ارتباطي پُل» پروګرام پورې اړوند او شاوخوا ۱۰۰۰ نور افغانان د آلمان د منلو پروګرام له ډلې څخه دي، چې د منلو ژمنه یا د منلو خبرتیا یې ترلاسه کړې ده.

د آلمان اوسني حکومت ائتلاف، چې د مسیحي ډموکراټ، مسیحي سوسیال او سوسیال ډموکرات ګوندونو ترمنځ جوړ شوی؛ هوکړه کړې، چې «د افغانانو د منلو پروګرامونه تر ممکنه حده پای ته ورسوي او نوي پروګرامونه پیل نکړي.»