د ملګرو ملتونو عمومي منشي انټونیو ګوترش له دې ورځې سره هم‌مهاله د ښځو او نجونو لپاره په علومو کې د برابرو فرصتونو پر رامنځته کولو ټینګار کړی دی.

ګوټرش ویلي؛ هره نجلۍ باید وکولی شي په علم کې خپل راتلونکی وویني او هره ښځه باید وتوانېږي، چې په خپل علمي مسلک کې پرمختګ وکړي.

ګوټرش زیاته کړې؛ ښځې اوس هم د نړۍ د څېړونکو له درېیمې برخې څخه کمه برخه جوړوي او په پرمختللیو څانګو لکه مصنوعي ځیرکتیا او کوانټومي علومو کې د هغوی حضور ډېر محدود دی، چې په نړۍ کې د علمي پرمختګ او نوښت بهیر محدودوي.

د ملګرو ملتونو عمومي منشي همداراز ویلي، چې سږکال د ښځو او نجونو د علومو نړیواله ورځ د مصنوعي ځیرکتیا، ټولنیزو علومو، STEM  او مالي برخو ترمنځ پر همغږۍ راڅرخیږي، چې جنسیتي خنډونه کم شي، د ښځو سټارټ‌اپونه پیاوړي او زده‌کړو او علمي فرصتونو ته لاسرسی د ټولو لپاره تضمین شي.

ګوټرش د ښځینه ساینسپوهانو نوی نسل هڅولی، چې په علمي ډګر کې فعاله ونډه واخلي.

دغه راز په افغانستان کې اروپايي ټولنې هم ویلي، چې افغان ښځې، له نرسانو او قابلو څخه تر څېړونکو پورې؛ د ټولنې په روغتیا او هوساینې کې بنسټیز رول لوبوي.

اروپایي ټولنې ډاډ څرګند کړی، چې ښځې باید له ساینس او ​​پرمختګ برخمنې وي او د ټولو لپاره د زده‌کړې ملاتړ به روان وساتل شي.

دا په داسې حال کې ده، چې د ملګرو ملتونو مرستندویه پلاوي (یوناما) ویلي؛ دا ورځ په داسې وخت کې راځي، چې له شپږم ټولګي څخه پورته نجونو د زده‌کړې له بندیز څخه ۱۶۰۷ ورځې تېرې شوې دي.

د امریکا د ولسمشر مرستیال جي‌ډي ونس د آذربایجان له ولسمشر الهام علی‌اف سره د یوې ګډې خبري ناستې پر مهال د افغانستان په جګړه کې د باکو له ونډې مننه کړې ده.

جي‌ډي ونس د امریکا د ولسمشر له‌خوا د آذربایجان ولسمشر او خلکو ته د درناوي د څرګندولو تر څنګ ویلي؛ د دواړو هېوادونو اړیکې « د همکارۍ او دوستۍ اړیکې دي، چې ښايي لږ ورته پاملرنه شوې وي؛ خو د امریکا لپاره ډېرې اړینې دي.»

هغه زیاته کړې؛ ښايي ډېر امریکایان ونه‌پوهېږي، چې آذربایجاني ځواکونه له هغو وروستیو کسانو څخه ول، چې افغانستان یې پرېښود.

د نوموړي د څرګندونو له مخې؛ آذربایجان «د تروریزم پر ضد نړیواله جګړه» کې د اړین ملاتړی رول لوبولی او ځواکونه یې په افغانستان کې د امریکا د سمندري ځواکونو تر څنګ جنګېدلي دي.

د امریکا د ولسمشر مرستیال دا ټینګار هم کړی، چې واشنګټن غواړي له دې همکاریو مننه وکړي او د دواړو هېوادونو په اړیکو کې نوی پړاو پرانیزي.

دا په داسې حال کې ده، چې امریکا او آذربایجان په باکو کې د اقتصادي او امنیتي همکاریو په ګډون د سټراټیژیکو همکاریو تړون لاسلیک کړی دی.

د اقتصادي کمیسیون په اوونیزه غونډه کې، چې مشري یې د ریاست‌الوزرا اقتصادي مرستیال ملا عبدالغني برادر کوله؛ د کرنې او مالدارۍ سکټور د پراختیا ملي پالیسي تائید شوه.

د ریاست‌الوزرا د خبرپاڼې له مخې؛ د کرنې او مالدارۍ سکټور میکانیزه کول، د کرنې د څېړنیزو او ترویجي سیسټمونو پراختیا، د کرنې، اوبولګولو او مالدارۍ وده، د اوبولګولو د سیسټمونو مدیریت، په یادو برخو کې د پانګونې ملاتړ او خلکو ته د باکیفیته کرنیزو او حیواني محصولاتو د لاسرسي برابرول د دې پالیسۍ بنسټیزې موخې دي.

په دې غونډه کې د کب‌روزنې د سکټور د پراختیا طرحه هم تائید شوه.

د دغې طرحې له مخې؛ د خصوصي سکټور د پانګونې له لارې به د هېواد په بېلابېلو سیمو کې پر ۶۵۰۰ هکټاره ځمکه د کب‌روزنې ۷۷۰۰ واړه، منځني او لوی فارمونه جوړ شي.

ویل کیږي، چې د دې طرحې له پلي کېدا سره به په مستقیم ډول ۵۰ زره کسانو او په غیرمستقیم ډول ۲۵۰ زره نورو ته د کار زمینه برابره شي.