Connect with us

تازه خبرونه

افغانانو په لندن او اوسلو کې د پاکستان د یرغل پر ضد لاریون وکړ

د لاریون ګډونوال د لندن په ځینو لویو سړکونو کې راټول شول او د افغانستان پر خاوره یې د پاکستان د هوايي او ځمکنیو بریدونو د غندلو لپاره شعارونه پورته کړل.

خپور شوی

د

یو شمېر افغانانو په لندن کې د افغانستان پر ضد د پاکستان د بریدونو او پوځي هڅو د غندلو لپاره یو پراخ لاریون ترسره کړی دی.

د لاریون ګډونوال د لندن په ځینو لویو سړکونو کې راټول شول او د افغانستان پر خاوره یې د پاکستان د هوايي او ځمکنیو بریدونو د غندلو لپاره شعارونه پورته کړل.

لاریون‌کوونکو ټینګار کړی؛ د بریدونو دوام تاوتریخوالی زیات کړی او ملکي وګړو ته یې زیان رسولی دی.

دوی له نړیوالې ټولنې وغوښتل، چې دې وضعیت ته غبرګون وښيي.

ګډونوالو همدارنګه له نړیوالو ادارو وغوښتل، چې د افغانستان او پاکستان ترمنځ د فرضي کرښې په اړوند سیمو کې امنیتي وضعیت ته پاملرنه وکړي او د تاوتریخوالي پر پای ته رسولو یې ټینګار وکړ.

دغه راز په ناروې کې هم میشت یو شمېر افغانان د اوسلو د پارلمان ودانۍ مخې ته راټول شول او د پاکستاني پوځي رژیم د یرغل غندنه یې وکړه.

په دې لاریون کې لاریون کوونکو د ناروې پارلمان، ملګرو ملتونو او نړیوالې جنایي محکمې ته یو پرېکړه لیک واستاوه او د روان تاوتریخوالي د پای ته رسولو او د ملکي وګړو د حقونو د درناوي غوښتنه وشوه.

د یکشنبې پر ورځ د پاکستاني پوځ ملېشو د کونړ ولایت د ملکي افغانانو پر استوګنزیو د توپچي بریدونو وکړل، چې له کبله یې یو شمېر ملکي وګړي “شهیدان” او ټپیان شول.

د اسلامي امارت د ویاند مرستیال حمدالله فطرت په ایکس‌پاڼه کې لیکلي، چې پاکستاني پوځي رژیم د یکشنبې پر ماښام شاوخوا پېنځه بجې د کونړ ولایت په مرکز اسد‌آباد ښار کې کلیوالي سیمې او د استوګنې کورونه پر نښه کړل، چې پر هاوانونو او درندو وسلو یې د سیمې خلکو ته مرګ او ژوبله واړوله.

ویل کیږي، چې په دې بریدونو کې د سیمې اوسېدونکو ته مرګ او ژوبله هم اوښتې؛ د لومړنیو معلوماتو له مخې په دې پېښه کې لږ تر لږه ۱۶ کسان ټپیان شوي، چې ډېری یې ښځې او ماشومان دي او یو بل کس “شهید” شوی دی.

تازه خبرونه

ترکیې یونان ته د اوښتو په هڅه کې ۳۵ افغان کډوال ونیول

پولیسو د عملیاتو پر مهال د ژغورنې ۱۲ واسکټونه، د ژغورنې ټوبونه او درې پمپونه هم ضبط کړي دي.

Published

on

د ترکیې پولیسو هغه  ۳۵ افغان کډوال نیولي، چې غوښتل یې د دې هېواد له شمال لویدیځ بالیکسیر ولایت څخه د سمندر له لارې یونان ته واوړي. دغه راز د کډوالو د قاچاق پر تور څلور شکمن کسان هم نیول شوي دي.

پولیسو د عملیاتو پر مهال د ژغورنې ۱۲ واسکټونه، د ژغورنې ټوبونه او درې پمپونه هم ضبط کړي دي.

د پولیسو له کړنلارو وروسته؛ له څلورو شکمنو کسانو څخه درې د محکمې پر حکم زندان ته لېږدول شوي، خو څلورم کس د قضايي څارنې لاندې خوشې شوی دی.

۳۵ افغان کډوال هم د ناقانونه کډوالو مرکز ته لېږدول شوي دي.

Continue Reading

تازه خبرونه

د افغانستان او بریټانیا استازو د پاکستان او افغانستان پر اړیکو خبرې وکړې

د ارګ د خبرپاڼې له مخې؛ ملا عبدالواسع افغانستان ته د بریټانیا د بشري مرستو او د افغانستان او پاکستان ترمنځ د ستونزو د حل او د دواړو هېوادونو د اړیکو د ښه کېدا لپاره د بریټانیا او نورو دوستو هېوادونو له هڅو مننه کړې ده.

Published

on

د ریاست‌الوزراء مقام د دفتر عمومي رییس ملا عبدالواسع د ویډیوکنفرانس له لارې د افغانستان لپاره د بریټانیا له ځانګړي استازي ریچارډ لینډزي سره د سیمې د روان وضعیت، د افغانستان او پاکستان د اړیکو او د دواړو هېوادونو ترمنځ د ستونزو د حل پر لارو چارو خبرې کړې دي.

د ارګ د خبرپاڼې له مخې؛ ملا عبدالواسع افغانستان ته د بریټانیا د بشري مرستو او د افغانستان او پاکستان ترمنځ د ستونزو د حل او د دواړو هېوادونو د اړیکو د ښه کېدا لپاره د بریټانیا او نورو دوستو هېوادونو له هڅو مننه کړې ده.

نوموړي ویلي، چې اسلامي امارت د ملي ګټو او متقابل درناوي پر بنسټ له ګاونډیو، سیمه‌ییزو او نړیوالو هېوادونو سره د ښو اړیکو او ګډې همکارۍ غوښتونکی دی او د سیمې د ثبات او سولې ملاتړ کوي.

دغه راز ریچارډ لینډزي ویلي، چې بریټانیا د سیمې روان بدلونونه له نږدې څاري او د افغانستان او پاکستان ترمنځ د ستونزو د حل او د دواړو هېوادونو د اړیکو د عادي کېدا لپاره یې له دواړو لوریو سره لیدنې او سلا مشورې کړې دي.

نوموړي زیاته کړې؛ په نږدې راتلونکي کې به پاکستان ته سفر وکړي او د دغه هېواد له چارواکو سره به د اړوند موضوعاتو په اړه خبرې وکړي، چې د شته ستونزو د حل لپاره د خبرو او تفاهم زمینه برابره شي.

د ریاست‌الوزراء مقام د دفتر عمومي رییس په پای کې ټینګار کړی، چې اسلامي امارت د اقتصادمحوره بهرنۍ تګلارې په چوکاټ کې له ګاونډیو، سیمه‌ییزو او نړیوالو هېوادونو سره د ستونزو سوله‌ییز حل ته ارزښت ورکوي.

هغه زیاته کړې، چې افغانان د سولې غوښتونکي ملت په توګه د خبرو اترو له لارې د ستونزو د حل اوږده تجربه لري.

Continue Reading

تازه خبرونه

په تېرو دوه اوونیو کې له ایران او پاکستان څخه څه باندې ۹۵ زره افغانان افغانستان ته راغلي

د دې بنسټ د تازه راپور له مخې؛ ۶۴ زره او ۷۳۲ کسان، چې ۶۸ سلنه جوړوي له ایران او ۳۰ زره او ۷۵۷ کسان، چې ۳۲ سلنه کېږي؛ له پاکستان څخه افغانستان ته راغلي دي.

Published

on

 

د کډوالۍ نړیوالې ټولنې ويلي، چې د ۱۴۰۵ لمریز لېږدیز کال د لړم له درېیمې څخه تر شپاړلسمې / د ۲۰۲۶ز.کال د اوکټوبر له پنځه‌ویشتمې څخه د نومبر تر اوومې پورې ۹۵ زره او ۴۸۹ افغانان له ایران او پاکستان څخه افغانستان ته راغلي دي.

د دې بنسټ د تازه راپور له مخې؛ ۶۴ زره او ۷۳۲ کسان، چې ۶۸ سلنه جوړوي له ایران او ۳۰ زره او ۷۵۷ کسان، چې ۳۲ سلنه کېږي؛ له پاکستان څخه افغانستان ته راغلي دي.

دغه راز له افغانستان څخه د ۴۴زره او ۸۹۹ کسانو وتل هم ثبت شوي، چې له ۳۴زره او ۲۰۶ کسان ایران او ۱۰ زره او ۶۹۳ نو پاکستان ته تللي دي.

راپور ښيي، چې د اسلام‌کلا بندر د ټولو ثبت شوي راتګ ۴۰.۵ سلنې له کبله تر ټولو ډېر د تګ راتګ سرحدي بندر و. له دې وروسته د پل ابریشم بندر د ۲۵.۷ سلنې او سپین‌بولډک د ۱۷.۶ سلنې پر درلودلو دوه‌یم او درېیم ځای خپل کړی دی.

Continue Reading
Advertisement

Trending

Copyright © 2026 Ariana News. All rights reserved!