په ملګرو ملتونو کې د هند دایمي استازي ویلي، چې د افغانستان په سیاسي وضعیت کې له پراخو بدلونونو سره اوس هغه وخت رارسېدلی، چې نړیواله ټولنه د دې هېواد پر وړاندې د ملګرو ملتونو پر اوسنيو بندیزونو بیاکتنه وکړي.

په ملګرو ملتونو کې د هند دایمي استازي پرواټه‌نني هریش د امنیت شورا په وروستۍ غونډه کې ویلي؛ اوسني بندیزونه نور اړین اغېز نه‌لري او له نړیوالې ټولنې یې غوښتي، چې د افغانستان په اړه یو نوی او رښتینی چلند غوره کړي.

نوموړي ټینګار کړی، چې د افغانستان سیاسي وضعیت د پخوا پر پرتله د پام وړ بدلون کړی او د تنبیهي تګلارو دوام د شته ننګونو په اواري کې مرسته نه‌شي کولی.

د هند استازي همدارنګه د افغانستان په خاوره کې د پاکستان هوايي بریدونه غندلي او د ملګرو ملتونو د مرستندویه پلاوي(یوناما) د موندنو پر ډاډ ویلي، چې دغو بریدونو ملکي وګړو ته د پام وړ مرګ‌ او ژوبله اړولې ده.

هریش په خپلو څرګندونو کې پاکستان تورن کړی، چې د افغانستان پر وړاندې یې سوداګریز او ټرانزیټي محدودیتونه لګولي دي او د سوداګرۍ د پراختیا او د افغانستان د اقتصادي وضعیت ښه‌والي ته د زمینې برابرولو لپاره يې د دغو محدودیتونو د لرې کولو غوښتنه کړې ده.

د فراه ولایت په ختیځ کې پر زر جریبه ځمکې د مسافرو او باروړونکو موټرو لپاره د یوه ستر او معیاري تمځای د جوړولو چارې پیل شوې، چې د لومړي پړاو لګښت یې ۱۲۷ میلیون افغانۍ ښودل شوی دی.

د ټرانسپورټ او هوايي چلند وزارت چارواکو ویلي، د دې پروژې له بشپړېدا سره به د مسافرو د تګ راتګ ستونزې راکمې، د باروړونکو موټرو لپاره به لازمې آسانتیاوې برابرې او د فراه ښار ټرافیکي ګڼه ګوڼه کمه شي.

د چارواکو د څرګندونو له مخې، دا تمځای د تېلو زېرمه، مسافرخونه، دوکانونه، اداري ودانۍ، جومات او شنه سیمه هم لري.

د ټرانسپورټ او هوايي چلند وزارت مالي او اداري مرستیال حافظ صدیق‌الله عابد د پروژې د پرانیستې پر مهال ویلي، چې فراه د سیمه‌ییزو لارو یو مهم مرکز دی او د دې تمځای جوړېدل به د ټرانسپورټي خدمتونو د ښه‌والي او اقتصادي فعالیتونو د پیاوړتیا لپاره مهم رول ولوبوي.

چارواکي زیاتوي، چې دغه تمځای د فراه هوايي ډګر ختیځ لوري کرجي سیمې ته نږدې جوړېږي، چې ۳۰۰ جریبه ځمکه یې د مسافرو موټرو او ۷۰۰ جریبه یې د باروړونکو موټرو لپاره ځانګړې شوې ده.

د نورستان ولایت په مرکز پارون کې د ویجاړوونکو سېلابونو له راوتلو وروسته د نړۍ چارواکو، مرستندویو بنسټونو او د افغانستان یو شمېر څېرو له لوري د خواخوږۍ او ملاتړ ګڼ پیغامونه خپاره شوي دي.

په کابل کې د جاپان سفیر، اروپایي ټولنې، د ایران سفارت، د افغانستان په چارو کې د بریټانیا ځانګړي استازي ریچارډ لینډزي او د کډوالۍ نړیوالې ټولنې د دې پېښې له کبله خواشیني څرګنده کړې، د قربانیانو له کورنیو سره یې خواخوږي ښودلې او له زیانمنو شویو سره یې د مرستو او ملاتړ پر دوام ټینګار کړی دی.

دغه راز د افغانستان پخواني ولسمشر حامد کرزي له ملي سوداګرو او مرستندویو بنسټونو غوښتي، چې د نورستان له سېلاب ځپلیو سره د مرستې لپاره بېړني ګامونه پورته کړي.

همدارنګه د افغانستان کرکټ ملي لوبډلې ستوري راشد خان د قربانیانو له کورنیو سره د خواخوږۍ ترڅنګ له ملي او نړیوالو بنسټونو، خیریه ټولنو او شتمنو هېوادوالو غوښتي، چې د خوراکي توکو، درملو، سرپناه او نورو اړینو مرستو پر برابرولو د دې پېښې له زیانمنو شویو ملاتړ وکړي.

په زیانمنو سیمو کې د لټون، ژغورنې او د اوښتو زیانونو د ارزونې چارې اوس هم روانې دي.

د پېښو پر وړاندې د مبارزې ملي چمتووالي ادارې ویلي، د تازه لومړنیو معلوماتو له مخې؛ د نورستان ولایت په مرکز پارون کې د ویجاړوونکو سېلابونو له کبله ۲۳ کسان مړه، ۸۰ نور ټپیان او نږدې ۱۰۰ کسان ورک دي.

د یادې ادارې مرستیال ویاند تاج محمد همت ویلي، چې تر اوسه د ۱۵ کسانو جسدونه له خاورو او خټو را ایستل شوي او د لټون او ژغورنې عملیات روان دي.

د نوموړي د څرګندونو له مخې، سېلابونو اووه کورونه بشپړ او ۲۳ نور نسبي ویجاړ کړي دي. همدارنګه، ۷۰ دوکانونه، ۴۰ سپک او درانده موټرونه او ۱۱ هوټلونه هم بشپړ نسبي زیانمن شوي دي.

چارواکو ټینګار کړی، چې دا شمېرې لومړنۍ دي او د لټون د عملیاتو او د زیانونو د ارزونې له دوام سره ښایي د قربانیانو شمېر او د اوښتو زیانونو کچه نوره هم لوړه شي.