افغانستان د ایرلینډ پر وړاندې د پېنځه یو ورځنۍ سیالیو د لړۍ په دوه‌یمه لوبه کې پر ۹۲ منډو زړه‌راکښونکې بریا خپله کړه او د لوبو په دې لړۍ کې یو پر صفر مخکې شو.

د دواړو لوبډلو ترمنځ لومړۍ لوبه د باران له کبله لغوه شوې ده.

افغانستان د جمعې په لوبه کې د ۸ ویکټو پر له تر لاسه ورکولو او ۴۷ آورونو لوبولو ۲۹۹ منډې جوړې کړې؛ راشد خان د افغانستان لپاره په توپ‌اچونه کې تر ټولو ښه وځلېد او د ۳۴ منډو په بدل کې یې ۶ ویکټې واخیستې او ابراهیم ځدراڼ ۸۴ منډې وکړې.

دا درېیم ځل دی، چې راشد خان په یو ورځنیو لوبو کې ۶ وېکټې اخلي.

راشد خان لومړی انډي بالبرني او هري ټکټر وسوځول او وروسته یې د ایرلینډ د وروستیو اووه ویکټو له ډلې څلور نورې هم واخیستې.

ایرلینډ، چې د بریا لپاره یې ۳۰۰ منډو ته اړتیا لرله؛ په ۴۷ آورونو کې د ټولو لوبغاړو پر سوځېدو ۲۰۷ منډې وکړې.

ایرلینډ په پیل کې د بریا ښه چانس درلود. دې لوبډلې د درې ویکټو پر له لاسه ورکولو ۱۴۴ منډې کړې وې او د بریا لپاره یې له ۱۳۷ توپونو څخه ۱۵۶ منډو ته اړتیا لرله.

په دې لوبه کې صدیق‌الله اتل لورکان ټکر په رن‌اوت وسوځاوه، د ایرلینډ حالت بدل شو او دې لوبډلې په چټکۍ خپلې ویکټې له لاسه ورکړې.

د دواړو لوبډلو ترمنځ درېیمه یو ورځنۍ لوبه به د دوشنبې پر ورځ د ایرلینډ په بلفاسټ ښار کې ترسره شي.

دا لوبه هم له آریانا ټلوېزیون څخه پخپل وخت خپرېږي.

د افغانستان فوټسال ملي لوبډلې د کانټیننټل فوټسال سیالیو په لړ کې له روسیې سره ۳ پر ۳ مساوي لوبه وکړه او د دغو سیالیو لومړۍ نمره یې ترلاسه کړه.

دا لوبه، چې د سیالیو له زړه‌راکښونکو لوبو څخه وه؛ د دواړو لوبډلو پرله‌پسې بریدونو رنګینه کړې وه. روسیې څو ځله مخکې والی خپل کړ؛ خو افغان لوبغاړو هر ځل پایله مساوي کړې. افغانستان وروسته درېیم ګول وواهه او ۳ پر ۲ مخکې شو؛ خو روسیې هم د مساوي ګول پر وهلو لوبه ۳ پر ۳ پای ته ورسوله.

دواړو لوبډلو د لوبې په اوږدو کې د ګول وهلو ګڼ فرصتونه رامنځته کړل او تر وروستۍ شېبې یې د بریا لپاره هڅې وکړې.

دا مساوي پایله له هغې وروسته ثبت شوه، چې افغانستان له دې مخکې کوربه ټایلنډ ته ۶ پر ۱ او ویټنام ته ۲ پر ۱ ماتې خوړلې وې او له دې سره یې د کانټیننټل فوټسال سیالیو لومړۍ نمره خپله کړه.

ټاکل شوې د افغانستان فوټسال ملي لوبډله نن(پنجشنبه) له غرمې وروسته په بله لوبه کې د نیوزیلینډ پر وړاندې ولوبېږي.