کابل زلمي د یکشنبې پر ورځ د کابل غوره لیګ د څلورم پړاو په درېیمه لوبه کې د پامیر سټارز پر وړاندې د اووه ویکټو پر توپیر بریا خپله کړه.

پامیر سټارز لومړی توپوهنه وکړه او په ۲۰آورونو کې یې د نهه لوبغاړو پر سوځېدا ۱۹۰ منډې وکړې او کابل زلمي ته یې د ۱۹۱ منډو هدف وټاکه.

دغه راز کابل زلمي ټاکل شوی هدف آسانه پوره کړ او په ۱۶،۳آورونو کې یې د درې لوبغاړو پر سوځېدا ۱۹۱ منډې وکړې او د ۲۱ توپونو په پاتې کېدا یې بریا خپله کړه.

مسعود ګربز د لوبې غوره لوبغاړی و، چې په یوازې ۴۶ توپونو یې ۱۰۷ منډې وکړې او د کابل زلمي د بریالي هدف پوره کولو بنسټ یې کېښود.

د نوموړي چټکې توپوهنې کابل زلمي ته د منډو تر پوره کولو پورې بشپړ برلاسی ورکړ او پر اووه ویکټو یې پیاوړې بریا خپله کړه.

ګربز د خپلې سلیزې له کبله د لوبې غوره لوبغاړی وټاکل شو.

د دې بریا له کبله کابل زلمي د کابل غوره لیګ په سیالیو کې ښه پیل وکړ؛ خو پامیر سټارز به په راتلونکې لوبه کې د بېرته بریا خپلولو هڅه وکړي.

د کابل غوره لیګ ټولې لوبې په افغانستان کې د آریانا ټلویزیون له لارې خپرېږي.

د افغانستان کرکټ ملي لوبډلې د دوشنبې پر ورځ( د زمري نولسمه ) د پېنځه یو ورځنۍ لوبو د لړۍ په درېیمه لوبه کې ایرلینډ ته د درې ویکټو پر توپیر ماتې ورکړه.

دا لوبه د ایرلینډ په بلفاسټ ښار کې وشوه.

افغانستان پچه وګټله او لومړی یې د توپ‌اچونې پرېکړه وکړه.

د ایرلینډ کرکټ لوبډلې ټول لوبغاړي په ۴۶،۳آورونو کې وسوځېدل او ۲۰۶ منډې یې وکړې او افغانستان ته یې د ۲۰۹ منډو هدف وټاکه.

راشد خان او الله‌محمد غضنفر د افغانستان لپاره درې – درې ویکټې واخیستې.

د افغانستان ملي لوبډلې په دوه‌یمه پاڼۍ کې د غوره توپ‌وهنې له کبله ټاکل شوی هدف په ۴۴،۵آورونو کې د اووه لوبغاړو پر له لاسه ورکولو پوره کړ او بریا یې خپله کړه.

افغانستان د دې لړۍ دوه‌یمه لوبه هم پر ۹۲ منډو ګټلې وه.

د دواړو لوبډلو ترمنځ څلورمه لوبه به د چارشنبې پر ورځ( د زمري یوویشتمه / د اګست دولسمه ) د ایرلینډ په بلفاسټ ښار کې ترسره شي.

د کرکټ مینه‌وال کولی شي دا لوبه پر ژوندۍ بڼه له آریانا ټلوېزیون څخه وګوري.

د شنبې پر ورځ (د زمري اووه‌لسمه) په ایوبي کرکټ لوبغالي کې آباسین ډیفنډرز د کابل غوره لیګ په دوه‌یمه لوبه کې کابل زلمي ته آسانه ماتې ورکړه.

کابل زلمي پچه وګټله او لومړی یې د منډو جوړولو پرېکړه وکړه؛ خو د آباسین ډفنډرز توپ اچوونکو پرله‌پسې ویکټې واخیستې او د دوی منډې جوړولو بهیر یې ګډوډ کړ.

کابل زلمي په ۷.۲آورونو کې د ټولو لوبغاړو پر سوځېدا یوازې ۶۳ منډې وکړې او آباسین ډیفنډرز ته یې د ۶۴ منډو هدف وټاکه.

صدیق‌الله پاچا د آباسین ډیفېنډرز لپاره غوره وځلېد او د خپلې بریالۍ توپ‌اچونې له کبله د لوبې غوره لوبغاړی وټاکل شو.

آباسین ډیفینډرز ټاکل شوی هدف آسانه پوره کړ او له دې سره یې د کابل غوره لیګ په سیالیو کې خپله لومړۍ لوبه بریالۍ پیل کړه.

له دې لوبې مخکې د سیالیو په لومړۍ لوبه کې پامیر سټارز شمشاد ایګلز ته د ۱۱۶ منډو پر توپیر ماتې ورکړې وه.

کابل ۲۰۲۶ غوره لیګ شپږ لوبډلې؛ پامیر سټارز، شمشاد ایګلز، کابل زلمي، سپین غر وریرز، آباسین ډیفنډرز او بند امیر لري.

د لیګ ټولې لوبې په آریانا ټلوېزیون کې پر ژوندۍ او ځانګړې بڼه خپرېږي، چې د افغانستان کرکټ مینه‌وال یې کتلی شي.