Connect with us

تازه خبرونه

د غزني په ده یک ولسوالۍ کې یوه مسافر وړونکې الوتکه راغورزیدلې

Published

 on

(Last Updated On: سلواغه ۸, ۱۳۹۸)

د غزني والي منلې، چې نن غرمه نږدې یوه بجه/ د سلواغې ۷ یوه مسافر وړونکې الوتکه د غږني ولایت په ده یک ولسوالۍ کې راغورزیدلې ده.

د غزني والي وحیدالله کلیمزي منلې،  چې راغورزیدلې الوتکه له کورنیو هوایي شرکتونو سره تړاو نلري او کیدی شي، چې د کوم بهرني شرکت الوتکه وي.

د نوموړي د څرګندونو له مخې؛ الوتکه د طالبانو تر څارنې لاندې سیمه کې راغورزیدلې، چې  بشپړه سوزیدلې او دا ترې نه په ډاګه کیږي، چې د کوم بهرني شرکت الوتکه ده.  

نوموړی زیاتوي، چې د سیمې اوسیدونکیو د الوتکې له کابین څخه د یو پیلوت مړی راایستلی، چې بهرنی معلومیږي.

کورنیو چارو وزارت که څه هم پېښه تائیدوي؛ خو وایي، چې دغه مسافر وړونکې الوتکه یوه نیمه بجه د طالبانو تر څارنې لاندې د سدوزو په اړوند سیمه کې راغورزیدلې ده

د هرات ولایت هوایي ډګر څارونکیو له دې مخکې ویلي وه، چې د آریانا افغان هوایي شرکت مسافر وړونکې الوتکه، چې د دیلي پر لوري یې له هرات ولایته الوت کړی و؛ د غزني ولایت د ده یک ولسوالۍ په اړوند سیمه کې راغورزیدلې ده.

آریانا هوایي شرکت او نورو هېوادنیو شرکتونو د خپلو الوتکو راغورزیدل رد کړي او وایي، چې د دوي ټولې الوتنې په ښه توګه تر سره شوې دي.

طالبانو ویلي، چې د غزني ولایت د ده یک ولسوالۍ د سدوخېل په اړوند سیمه کې د امریکایي ځواکونو هغه الوتکه رانسکوره شوې، چې د استخباراتي موخو لپاره یې سیمې ته الوت کړی و.

د طالبانو د خبرپانې له مخې؛ په دې پېښه کې د الوتکې ټوله عمله او په کې ناست د سي آی ای ګڼ لوړپوړي مشران وژل شوي دي.

د طالب ویاند ذبیح الله مجاهد څرګنده کړې، چې د الوتکې بدنه او د وژل شویو کسانو مړي په سیمه کې پراته دي.

په افغانستان کې د میشتو بهرنیو ځواکونو  ویاند سوني لګیت په خپل یوه تویت کې د طالبانو لخوا د الوتکې د رانسکورولو ادعا رد کړه.

سوني لګیت زیاته کړې، چې د پېښې د علت په اړه پلټنې روانې دي او تر دې دمه داسې کومه نښه نده لیدل شوې، چې هغه دې د دښمن لخوا پر نښه شوې وي.

د امریکایي ځواکونو ویاند تر دې دمه د پېښې له مرګ و ژوبلې څه ندي ویلي؛ خو څرګندوي، چې دغه الوتکې د جګړې په ډګر کې د پوځیانو لخوا د معلوماتو راټولولو لپاره کاریږي.

لومړنۍ څېړنې ښيي، چې الوتکه د  تخنیکي ستونزو له کبله راغورزیدلې ده. 

تازه خبرونه

له افغانستان څخه د امریکا پر مشرۍ د ځواکونو پر بې نظمه وتلو پښېمانه نه یم – لوید آستین

Published

on

(Last Updated On: وری ۱۰, ۱۴۰۲)

د امریکا دفاع وزیر لوید آستین د ولسي جرګې د وسله‌والو خدماتو کمیتې ته د څرګندونو پر مهال ویلي؛ له افغانستان څخه د امریکایي ځواکونو د بې نظمه وتلو پر څرنګوالي هیڅ پښیمانه نه دی.

د چارشنبې پر ورځ جمهوري غوښتونکیو د ولسي جرګې د وسله‌والو خدماتو کمیتې د ناستې پرمهال د پنټاګون د ۲۰۲۴ مالي کال د بودجې بیاکتنه هم وکړه.

د یادې ناستې پر مهال آستین ویلي؛ زه د [ولسمشر بایدن] د پرېکړې ملاتړ کوم او هیڅ پښېمانه نه یم.

جمهوري غوښتونکیو وکیلانو هم له افغانستان څخه د امریکا د ملکي یا نظامي مشرانو د بې مسوولیته وتلو پر څرنګوالی نیوکه وکړه.

د هغې پوښتنې په ځواب کې، چې آیا د پنتاګون په قومندانۍ کې داسې څوک شته، چې په افغانستان کې د ۲۰ کلنې جګړې د ناکامۍ مسؤلیت ومني؛ آستین وویل: تر هغې، چې زه پوهیږم، نه!

لوید آستین له لوی درستیزانو جنرال مارک میلي سره له راڅرګندېدو وروسته وویل، چې د جګړې په بهیر کې د امریکایي سرتېرو پر ستر کار او قربانیو ویاړي.

د چهارشنبې د ورځې دغه شاهدي په داسې حال کې تر سره شوه، چې د امریکا د ولسي جرګې د بهرنیو اړیکو کمیتې مشر مایکل مک کال د امریکایي ځواکونو د بې مسوولیته وتلو په اړه څېړنې ترسره کوي.

مک کاول په وار وار له بهرنیو چارو وزارت څخه د ۲۰۲۱ ز. کال په اګست کې د وتلو اړوند مسلو په اړه د اسنادو غوښتنه کړې وه؛ خو بهرنیو چارو وزارت د اسنادو په چمتو کولو کې پاتې راغی او مک کاول د دوشنبې پر ورځ د احضاریې حکم صادر کړ.

Continue Reading

تازه خبرونه

د افغانستان په اووه ولایتونو کې ۶۴۵ کورنۍ سیلابونو ځپلي دي- اوچا

Published

on

(Last Updated On: وری ۱۰, ۱۴۰۲)

د ملګرو ملتونو د بشري چارو د همغږۍ دفتر (OCHA) څرګنده کړې؛ د افغانستان په اووه ولایتونو کې سختو بارانونو او سېلابونو شاوخوا ۶۴۵ کورنۍ زیانمنې کړې دي.

د ملګرو ملتونو د بشري چارو د همغږۍ دفتر (اوچا ) ویلي؛ مرستندویه ادارې د اغیزمنو سیمو ارزونه کوي او له اړتیاوو سره سم مرستې چمتو کوي، خو محدوده بودجه د مرستو رسولو د کچې وړتیاوې محدودوي.

د مهاجرت نړیوالې ټولنې په بلخ ولایت کې د وروستیو سیلابونو له کبله له ۵۰۰ څخه زیاتو زیانمنو شویو کورنیو سره نغدي مرسته کړې ده.

د بلخ ولایت د شولګرې ولسوالۍ یو شمېر زیانمن شوي کسان د مرستو له کموالي اندېښمن دي او وايي، چې ډېرو مرستو ته اړتیا لري.

د بلخ ولايت د شولګرې ولسوالۍ استوګن سلطان علي وايي: که زارع ولسوالۍ پوره مرسته ونه رسیږي؛ نو په راتلونکي کې به د خلکو لپاره ناوړه پايلې رامنځته شي.

د دې ولسوالۍ يو بل اوسیدونکي قادر خان ويلي: سېلاب مو څاه ګانې له خټو ډکې کړې؛ مونږ پاکې اوبه نه‌لرو.

له طبیعي پېښو سره د مبارزې وزارت ټینګار کوي، چې دوی په بېلابېلو ولایتونو کې له سېلاب ځپلیو سره یو څه مرستې کړې؛ خو ډېرو نورو مرستو ته اړتیا لیدل کیږي.

د دغه وزارت د څرګندونو له مخې؛ د ١٤٠٢ لمریز لېږدیز کال له پيل راپدیخوا د هېواد په ٢٣ ولايتونو کې د سېلابونو او زلزلو له کبله ١٠ کسان مړه شوي، ٧٦ نور ټپيان دي، ١٧٧٩ د استوګنې کورونه ويجاړ شوي او ٢٢ زره جريبه کرنيزه ځمکه سېلابونو وړې ده.

Continue Reading

تازه خبرونه

د ملګرو ملتونو امنیت شورا غړیو په افغانستان کې پر ملکي وګړیو د برید غندنه وکړه

Published

on

(Last Updated On: وری ۹, ۱۴۰۲)

د ملګرو ملتونو د امنیت شورا غړیو په ډاګه کړې؛ د کابل ښار د ملک اصغر په څلور لاري کې پرونی ځانمرګي برید وحشیانه نومولی او د هغه غندنه یې وکړه.

د دغې شورا په اعلاميه کې راغلي، چې ترهګري په هر نوم او بڼه، چې وي؛ په افغانستان او نړۍ کې د سولې او امنيت پر وړاندې تر ټولو جدي ګواښ دى.

د دې شورا غړیو څرګنده کړې؛ هر ډول ترهګریز عمل، له انګیزې پرته، په هر ځای، هر وخت او د هر چا له خوا، چې وي جنایت دی.

د دې شورا غړیو د دغه ډول بریدونو د عاملینو د محاکمې غوښتنه هم کړې ده.

د دې شورا په اعلاميه کې راغلي: د امنيت شورا د ملکي افغانانو پر وړاندې دغه تروريستي عمل په کلکه غندي.

د کابل ښار د ملک اصغر په څلور لاري کې پرون ځانمرګي برید شپږ ملکي وګړي ووژل او ګڼ نور یې ټپیان کړل.

د داعش خراسانۍ ډلې د دغه برید مسوولیت منلی دی.

Continue Reading

Trending

Copyright © 2022 Ariana News. All rights reserved!