د افغانستان اسلامي امارت دفاع وزیر محمد یعقوب مجاهد په روسیه کې د نړیوال امنیتي کنفرانس له ګډون وروسته د شنبې پر ورځ کابل ته راستون شو او څرګنده یې کړه، چې د کابل او مسکو ترمنځ د تخنیکي ـ پوځي همکاریو د هوکړې عملي پړاوونه به په نږدې راتلونکي کې پیل شي.

محمد یعقوب مجاهد په کابل نړیوال هوايي ډګر کې ویلي، چې روسیې ته د افغان پلاوي سفر د مسکو پر رسمي بلنه او په یوه مهم امنیتي کنفرانس کې د ګډون لپاره ترسره شو.

د نوموړي د څرګندونو له مخې، په دې غونډه کې یوازې محدود شمېر هېوادونو ته د وینا فرصت ورکړ شوی و او افغانستان هم د هغو هېوادونو له ډلې و.

دفاع وزیر له روسیې سره د لاسلیک شوې هوکړې په اړه ټینګار کړی، چې دا د تخنیکي او پوځي همکاریو هوکړه ده او باید د دفاعي یا امنیتي تړون په توګه ونه‌ګڼل شي.

هغه ویلي: «د دې هوکړې عملي چارې به په راتلونکو ورځو کې پیل شي او پر بېلابېلو اړخونو به یې خبرې وشي، چې عملي بڼه خپله کړي.»

د مجاهد د څرګندونو له مخې، د دې هوکړې اساسي موخه د تخنیکي وړتیاوو لوړول او په افغانستان کې د روسي جوړو پوځي تجهیزاتو د اغېزمنې استفادې زمینه برابرول دي.

نوموړي زیاته کړې؛ د افغانستان د پوځي تجهیزاتو د پام وړ برخه لکه الوتکې، چورلکې او ځینې روسي وسلې، چې ترمیم، ساتنې او پراختیا لپاره تخنیکي همکاریو ته اړتیا لري.

یعقوب مجاهد څرګنده کړې؛ د اسلامي امارت سیاست د نورو هېوادونو د نه ګواښلو پر اصل ولاړ دی او د افغانستان پوځي پرمختګونه د سیمې د امنیت او ثبات د ټینګښت لپاره ترسره کېږي.

هغه ویلي، چې افغانستان د نورو هېوادونو په ګډون د امریکا او برازیل پوځي تجهیزات هم لري او که اړتیا او متقابله لېوالتیا موجوده وي؛ له دغو هېوادونو سره هم ورته هوکړې لاسلیک کېدی شي.

دفاع وزیر ټینګار وکړ؛ د افغانستان ملي ګټې لومړیتوب لري او هیڅ داسې هوکړه به لاسلیک نه‌شي، چې د هېواد له ګټو سره په ټکر کې وي.

هغه د کابل او مسکو ترمنځ د پوځي همکاریو په اړه د ځینو اندېښنو په غبرګون کې ویلي؛ ښايي ځینې هېوادونه خپل ځانګړي نظرونه ولري، خو دا موضوع په خبرو اترو کې  مطرح شوې نه‌ده.

نوموړي د پاکستان ویلي، چې ښايي اسلام‌آباد د دې هوکړې په تړاو اندېښنې ولري.

هغه زیاته کړه: «څو میاشتې مخکې پاکستان پر جرأت د افغانستان ځینې سیمې بمبارډولی شوې؛ خو مونږ هڅه کوو، چې په نږدې راتلونکي کې بیا هیڅوک د داسې اقدام جرأت ونه‌کړي.«

ویل کیږي، چې افغانستان د خپلو دفاعي وړتیاوو پیاوړتیا ته اړتیا لري او اسلامي امارت د هېواد د ساتنې لپاره پرله‌پسې هڅې کوي، چې په راتلونکي کې د دفاعي سیسټمونو د جوړولو او په دې برخه کې د نورو همکاریو په اړه هم بحثونه وشي.

د لغمان ولایت د رسنیو او عامه اړیکو دفتر ویلي، چې د کابل ـ جلال‌آباد پر عمومي لویه لاره د کډوالو د لېږد یو موټر د چپه کېدا له کبله ۱۸ کسان ۱۰ ماشومانو،۵ ښځو او ۳ نرینه‌وو په ګډون مړه او ۲۹ نور ټپیان دي.

د یاد دفتر د معلوماتو له مخې، دا پېښه د شنبې پر ورځې سهار شاوخوا ۵:۳۰ د لغمان ولایت اړوند سرخکان څلورلارې ته نږدې رامنځته شوې ده.

د لغمان د رسنیو او عامه اړیکو دفتر زیاته کړې، چې د پېښې له رامنځته کېدا وروسته د ټرافیکو مسوولان او د کډوالو چارو ته د رسېدنې کمیټې غړي سیمې ته رسېدلي او د ژغورنې او مرستو چارې یې پیل کړې دي.

همدارنګه ټپیان د لا ډېرو درملیزو خدمتونو د ترلاسه کولو لپاره د ننګرهار ولایت روغتیايي مرکزونو ته لېږدول شوي دي.

چین او پاکستان د بیجینګ له لوړې کچې خبرو اترو وروسته د افغانستان په اړه د زیاتې همغږۍ پر اړتیا ټینګار کړی او خبرداری یې ورکړی، چې د افغانستان له خاورې دې د سیمې د امنیت پر ضد استفاده نه کېږي.

دا موضوع په یوه ګډه خبرپاڼه کې وړاندې شوې، چې د پاکستان د صدراعظم شهباز شریف د څلور ورځني سفر له پای ته رسېدو وروسته خپره شوې ده؛ هغه سفر، چې په کې د چین له ولسمشر شي جین‌پینګ او د چین له لومړي وزیر لي چیانګ سره لیدنې وکړې.

د دې خبرپانې یوه برخه افغانستان او د سیمې امنیت ته ځانګړې شوې او دواړو لوریو د ناامنۍ د پراخېدو او د پولې هاخوا ګواښونو په اړه اندېښنه څرګنده کړې ده.

چین او پاکستان همدارنګه د افغانستان، پاکستان او چین له درې‌اړخیزو خبرو اترو هرکلی کړی، چې د ۲۰۲۶ کال په اپریل کې ترسره شوې وې. پاکستان د کابل او اسلام‌آباد ترمنځ د خبرو په آسانتیا کې د چین له رول څخه مننه کړې ده.

په دې ګډه خبرپاڼه کې ټینګار شوی، چې هیڅ فرد یا ډله باید د افغانستان له خاورې څخه د سیمې د هېوادونو پر ضد د بریدونو یا بې ثباته کوونکو فعالیتونو لپاره کار وانخلي.

په خبرپاڼه کې د تحریک طالبان پاکستان (TTP) او د ختیځ ترکستان اسلامي غورځنګ یادونه هم شوې ده.

دا په داسې حال کې ده، چې د افغانستان اسلامي امارت تل دا ټینګار کړی؛ د افغانستان خاوره د هیڅ هېواد پر ضد نه کارول کېږي.

دواړو هېوادونو همدارنګه د ترهګرۍ پر ضد مبارزې، سوداګرۍ، مصنوعي ځیرکتیا، بېخبناوو او د چین– پاکستان اقتصادي دهلېز (سي پیک) په برخو کې د همکاریو پر پراخولو ټینګار کړی دی.

دا سفر د چین او پاکستان د ډیپلوماټیکو اړیکو له پېنځه‌اویایمې کلیزې سره هم‌مهاله ترسره شوی دی.