تازه خبرونه
په کندهار کي د پاکستان د شيدو او پېروي پر پلور بنديز لګول شوی
د کرنې او مالدارۍ او عامي روغتيا رياستونو، چي د پاکستان د شيدو او پېروي (ملایي) د مخنيوي کمپاين پيل کړی وايي؛ په دې شيدو او پېروي کي داسي زهري مواد کار شوي، چي د ماشومانو او پاخه عمر لرونکیو کسانو پښتورګي او اعصاب زیانمنوي.
د نيستلي پاکستانۍ کمپنۍ پر توليداتو له دې کبله بنديز لګول شوی، چي په توکو کې یې زهري مواد کاریږي او بيا يې افغانستان ته راليږي.
د کندهار د کرنې او مالدارۍ رییس حبيب رحمان سجاد او د عامي روغتيا رییس داکتر عبدالرحمن ویلي؛ په ميلک پيک پېروي، سویا او افريدی شيدو کې داسې زهري مواد کار شوي، چي روغتیا له ګواښ سره مخ کوي؛ نو له همدې کبله د کرنې او عامې روغتيا وزارتونو پرېکړه کړې، چي پر یادو وارداتو بنديز ولګوي.
د کندهار ولایت هټيوال وايي؛ د دې پر ځاى، چي له دوى څخه په کمه اندازه توکي ونیسي او اقتصادي زيان ورته واړوي بايد د دې شيدو او پېروي لويو سوداګرو ته يې د واردولو اجازه ورنه کړ شي.
دولتي مسوولينو ويلي، چي دوه اوونۍ وړاندي يې د دې توکو د زيانونو او نه واردولو په موخه ګمرکونو ته رسمي مکتوبونه ليږلي او عامو خلکو ته يې د پوهاوي لپاره په رسنيو کي خبرتياوي خپرې کړې دي. خبریال: بريالي رحيمي
تازه خبرونه
د فراه په ګلستان ولسوالۍ کې د یوې کورنۍ درې غړي وژل شوي
د فراه ولایت د ګلستان ولسوالۍ ولسوال عزیز احمد سرباز ويلي، چې د فراه د ګلستان ولسوالۍ په فیضآباد کلي کې د یوې ښځې په ګډون د یوې کورنۍ درې غړي ناڅرګندو کسانو وژلي دي.
هغه زیاته کړې، د دې پېښې په تړاو پېنځه شکمن کسان نیول شوي او تر لومړنیو څېړنو لاندې دي.
تر اوسه د دې پېښې اصلي لامل معلوم شوی ندی.
تازه خبرونه
مونږ د هېواد له کدرونو او شخصیتونو ملاتړ کوو – مولوي عبدالکبیر
د ریاست الوزراء سیاسي مرستیال ویلي، چې د اسلامي امارت پالیسي د هېواد د کدرونو او شخصیتونو درناوی او ملاتړ دی او هغوی ته د اسانتیاوو د برابرولو هڅې ترسره کیږي.
مولوي عبدالکبير دغه څرګندونې د يکشنبې پر ورځ (د غبرګولي شپږمه) په هېواد کې د بهر میشتو روغتيايي څانګوالو یا متخصصينو د ټولنې له استازو سره په کتنه کې کړې دي.
د ارګ د خبرپاڼې له مخې؛ د ریاست الوزراء سیاسي مرستیال متخصصین د هېواد ستره پانګه بولي او څرګندوي، چې افغانستان په هر ډول شرایطو کې متخصصینو ته اړتیا لري.
هغه زیاته کړې؛ د دې حقیقت له کبله، چې افغانان بېوزله او بېوسه دي؛ نو پهکار ده، چې دولتي او خصوصي روغتیايي څانګې یې د تشخیص او درملنې په برخه کې له پاملرنې او مهربانۍ کار واخلي.
د ارګ د خبرپاڼې له مخې: دوی ویلي؛ بهر میشتي افغان متخصصین چمتو دي، چې بېرته خپل هېواد ته راستانه شي.
ویل کیږي، چې د رياست الوزراء سیاسي مرستیال د خپلو خبرو په پای کې د يادې ټولنې غړیو ته د اسانتیاوو د برابرولو تر څنګ ډاډ ورکړ، چې وړانديزونه به یې له اړوندو ادارو سره شريک کړي.
تازه خبرونه
افغانستان دې د تحریک طالبان پاکستان مشران راوسپاري – محسن نقوي
د پاکستان کورنیو چارو وزیر محسن نقوي د افغانستان له اسلامي امارت غوښتي، چې د تحریک طالبان پاکستان مشران دې وروسپاري.
محسن نقوي د یکشنبې پر ورځ د لاهور په یوه خبري کنفرانس کې ویلي: هغه برید، چې پېنځه چینایي انجنیران او د هغوی پاکستاني ډریور په کې ووژل شول؛ په افغانستان کې پلان شوی او په پاکستان کې د شته اسانتیاوو پر مرسته ترسره شو.
هغه د نورو جزئیاتو له ورکولو پرته څرګنده کړې: “د TTP مشرانو دا برید د یوې ځانګړې پروژې په توګه طرحه کړی وه او د دښمن استخباراتي ادارو دوی ته د دې برید لپاره ډېرې پیسې ورکړې.”
نقوي له اسلامي امارت وغوښتل، چې د تحریک طالبان پاکستان د مشر نور ولي محسود، د پاکستان په ملاکنډ سیمه کې قومندان عظمت الله او د دې ډلې د نورو مشرانو ترڅنګ بختیار شاه، عبدالله او خان لالا نومي دا درې کسان دې ونیسي.
هغه ويلي: ” مونږ له افغانستان سره ښې اړيکې غواړو؛ خو د دې لپاره مهمه ده، چې دغه وسلوال ونيول شي، محاکمه شي او يا هم مونږ ته وسپارل شي.”
د پاکستان او افغانستان اړیکې په وروستیو میاشتو کې ترینګلې شوې دي.
اسلامآباد وايي؛ کابل د هغو وسلوالو ډلو پر وړاندې، چې پاکستان په نښه کوي پوره کار نکوي.
نقوي وایي: ” پاکستان په دې اړه د افغانستان له چارسمبالي حکومت سره خبرې کړې او ټینګار یې کړی، چې هلته د فعالو ترهګرو پر ضد اقدام وکړي؛ خو تر اوسه مو کومه ښه پایله نده ترلاسه کړې.”
هغه ویلي، چې وسلوال د افغانستان د چارسمبالي حکومت له کمزورۍ ګټه پورته کوي.
د دې پوښتنې په ځواب کې، چې که افغان حکومت همکاري ونکړي؛ نو پاکستان به څه وکړي؟ محسن نقوي ويلي، چې “حکومت به یواړخیزه پرېکړه وکړي.”
د پاکستان کورنیو چارو وزیر دا څرګندونې کابو دوه اوونۍ وروسته له هغې کوي، چې د پاکستان پوځ ویاند احمد شریف ویلي؛ په افغانستان کې پر چینايي انجنیرانو برید پلان شوی و او ځانمرګی هم یو افغان و.
د پاکستان د ترهګرۍ پر وړاندې د مبارزې ملي ادارې همغږي کوونکي رای طاهر هم د دغه هېواد د کورنیو چارو له وزیر سره په رسنیز کنفرانس کې ویلي؛ بریدګر، چې اصلي نوم یې متقی او مستعار هغه یې تقي دی، د افغانستان وګړی دی.
د پاکستان امنیتي ځواکونو تر اوسه د دغه برید په تړاو ۱۱ شکمن کسان نیولي دي.
رای طاهر وايي، بریدګر له برید څلور میاشتې مخکې له افغانستان څخه پاکستان ته اوښتی و.
د نوموړي د څرګندونو له مخې؛ دغه ځانمرګی بریدګر د افغانستان په کونړ ولایت کې روزل شوی او یو له هغو څلورو وسلوالو څخه و، چې د ۲۰۲۳ کال په نومبر کې پاکستان ته دننه شوی و.
هغه ویلي، چې په ملاکنډ ضلع کې یو موټر پلورونکي د پاکستان تحریک طالبان (ټي ټي پي) له غړو سره مرسته کړې، چې له چاودېدونکیو توکو ډک موټر پاکستان ته راتېر کړي.
کله، چې نقوي وپوښتل شو، چې څنګه له چاودیدونکیو توکو ډک موټر پرته له دې، چې کشف شي د پاکستان دننه نږدې ۱۰۰۰ کیلومټره سفر وکړ؟ نقوي ویلي، چې امنیتي چارواکو موټر د پلټنو لپاره ودراوه؛ خو هیڅ شک پرې رامنځته نشو.
هغه دا هم ويلي، چې د موټر په چک کې د غفلت له کبله له چارواکو سره معامله شوې ده.
له دې مخکې د افغانستان دفاع وزارت د پاکستان هغه ادعاوې رد کړي، چې ګواکې پر چینايي انجنیرانو په برید کې افغانان لاس لري.
د ملي دفاع وزارت وياند عنايت الله خوارزمي ويلي، چې افغانان په دې ډول بريدونو کې لاس نلري او پر افغانستان تور لګول له حقيقته د ذهنونو اړولو يوه ناکامه هڅه ده.
-
لوبی5 days ago
آریانا ټلویزیون د ۲۰ اوریز کرکټ نړیوال جام د خپراوي حق ترلاسه کړ
-
تازه خبرونه5 days ago
په بامیان ولایت کې د سمڅو اوسېدونکیو ته د استوګنې کورونه جوړیږي
-
لوبی24 hours ago
د ۲۰۲۴ شل اوریز نړیوال جام سیالیو ټولې لوبډلې په ډاګه شوې
-
تازه خبرونه2 days ago
له ناقانونه مهاجرینو سره به جګړې ته ورته چلند وشي- د تهران والي مرستیال
-
تازه خبرونه2 days ago
د خواف – هرات د اوسپنېپټلۍ د وروستۍ برخې د جوړولو کار پیل شو
-
سوداگري5 days ago
روسیه د افغانستان په کانونو کې پانګونې ته لېواله شوه
-
لوبی1 day ago
افغانستان د ۲۰۲۴ فوټسال نړیوال جام په C ګروپ کې راغی
-
تازه خبرونه2 days ago
په افغانستان کې باید د ټولو قومونو د استازو په ګډون یو حکومت جوړ شي – حسن کاظمي قُمي