د بشري حقونو د څار بنسټ د طب او غاښونو د څانګو د افغان ‌زده‌کړیالانو د ایستلو په اړه د پاکستان پرېکړه غندلې او خبرداری یې ورکړی، چې دغه پرېکړه ښايي لسګونه افغان ځوانان او نجونې له زده‌کړو بې‌برخې کړي.

د دې بنسټ د راپور له مخې؛ د پاکستان حکومت د طب او غاښونو پوهنتونونو او ښوونیزو مرکزونو ته امر کړی، چې افغان زدهکړیالان له دغو مرکزونو وباسي او افغانستان ته د هغوی د ستنېدا زمینه برابره کړي.

راپور زیاتوي، د پاکستان د طب اړوند ښوونیزو مرکزونو د نویو افغان زده‌کړیالانو له منلو هم ډډه کړې ده.

د لاهور په کینګ اېډوارډ پوهنتون کې ۲۰ افغان زده‌کړیالان، چې څلور یې نجونې او اووه یې د وروستي کال دي؛ ورته ویل شوي، چې د وتلو د چارو د ترسره کولو لپاره دې په ۲۴ ساعتونو کې لاس پرکار شي.

د پاکستان د بشري حقونو کمیسیون ويلي: په لاهور کې شاوخوا ۱۰۰ افغان زده‌کړیالان، چې د طب او غاښونو په څانګو کې زده‌کړې کوي؛ ښايي د دې پرېکړې له کبله اغېزمن شي، چې د ۲۰ او ۴۰ ترمنځ یې نجونې او ښځې دي.

ځینې زده‌کړیالانو د ایستلو له وېرې د پاکستان د بشري حقونو له کمیسیون څخه د مرستې غوښتنه کړې، چې خوندي سرپناه او حقوقي مرستې هم رانغاړي.

د بشري حقونو د څار بنسټ ويلي؛ پاکستان د نړیوالو قوانینو له مخې اړ دی، چې ټولو وګړو ته له هر ډول توپیر پرته د لوړو زده‌کړو برابر فرصتونه برابر کړي.

د دې بنسټ د څرګندونو له مخې، په دې برخه کې بهرني وګړي هم شامل باید له دې حق څخه بې‌برخې نه‌شي.

دې بنسټ ویلي:« یوازې د افغان‌توب له کبله د زده‌کړیالانو ایستل له دې حقونو سره په ټکر کې دي.»

د بشري حقونو د څار بنسټ زیاته کړې؛ پاکستان په وروستیو کلونو کې پر افغان کډوالو فشارونه زیات کړي او سلګونه زره افغانان یې نیولي او جبري یې افغانستان ته ستانه کړي دي. په دغو کسانو کې داسې کسان هم دي، چې لسګونه کاله یې په پاکستان کې ژوند کړی دی.

د هرات سیمه‌ییز مسوولانو ويلي، په تېرو پنځو کلونو کې د دغه ولایت په بېلابېلو اقتصادي، تولیدي، خدماتي او بېخبنايي برخو کې نږدې دوه میلیارډ ډالره پانګونه جذب شوې ده.

د هرات ولایت مقام ویاند مفتي یوسف سعیدي ويلي؛ سیمه‌ییزې ادارې هڅه کړې، چې د کورنیو او بهرنیو پانګونو لپاره آسانتیاوې برابرې کړي او د لویو اقتصادي پروژو د پلي کېدا زمینه برابره کړي.

د نوموړي د څرګندونو له مخې؛ د هرات د سمنټو، لمریزې او بادي برښنا، ښاري ماسټر پلان، ټاپي او یو شمېر نورو لویو پروژو چارې پیل او ځینې یې ګټې اخیستنې ته هم سپارل شوي دي.

سعیدي زیاته کړې؛ د هرات په سویل کې د نړیوال ټرمینل، د پل هاشمي سب‌سټېشن او د یو شمېر ښاري او بین‌الولایتي سړکونو د جوړولو او پراختیا چارې هم روانې دي.

د هرات سیمه‌ییزو مسوولانو د څرګندونو له مخې؛ د پانګونې د جذب، د کورنیو تولیداتو د ملاتړ او د اقتصادي بېخبناوو د پراختیا لپاره د آسانتیاوو رامنځته کول یې اړین لومړیتوبونه دي.

هرات د ایران او ترکمنستان له پولو سره د نږدېوالي او د سوداګریزو او ټرانزیټي لارو پر سر د موقعیت له کبله د افغانستان له مهمو اقتصادي ولایتونو څخه ګڼل کیږي.

د اقتصاد وزیر دین‌محمد حنیف د بنګله‌دېش له یو شمېر دیني عالمانو، سوداګرو، صنعت‌کارانو او پانګه‌والو سره په لیدنه کې د دواړو هېوادونو ترمنځ د اقتصادي اړیکو پر پراختیا، د سوداګریزو اړیکو پر ښه‌والي او د پانګونې پر پراختیا خبرې وکړې.

د اقتصاد وزیر د بنګله‌دېش د پلاوي له سفر هرکلی کړی او په بېلابېلو برخو( کرنې، کانونو، صنعتونو، انرژۍ، کورنیو تولیداتو، ترانزیټ او سوداګرۍ) کې یې د پانګونې پر فرصتونو او لاسته‌راوړنو خبرې وکړې.

نوموړي د سیمې له هېوادونو سره د اقتصادي اړیکو پراختیا، د سوداګرۍ پراختیا او د بهرنیو پانګونو راجلبول د افغانستان د اقتصاد‌محوره تګلارې له مهمو برخو وبلل.

د اقتصاد وزیر زیاته کړې، د افغانستان او بنګله‌دېش ترمنځ د اقتصادي همکاریو پراختیا به په منځنۍ او اوږده موده کې د سوداګرۍ له زیاتوالي، د پانګونې ودې، د کاري فرصتونو رامنځته کېدا، د کورنیو تولیداتو زیاتوالي او د افغانستان د صادراتو پراختیا سره مرسته وکړي.

په دې لیدنه کې د بنګله‌دېش له سوداګرو، صنعت‌کارانو او پانګه‌والو جوړ پلاوي هم له افغانستان سره د سوداګریزو او اقتصادي اړیکو پراختیا ته لېوالتیا څرګنده کړه او له اقتصاد وزارت سره یې د همکاریو او پانګونې د برخو په اړه خپل نظرونه او وړاندیزونه شریک کړل.