Connect with us

تازه خبرونه

القاعده او داعش به تر دوه نورو کلونو امریکا ته ګواښ شي – د امریکا استخبارات

Published

 on

(Last Updated On: وږی ۲۵, ۱۴۰۰)

د امریکا استخباراتي چارواکو خبرداری ورکړی؛ د داعش او القاعده ملاتړي به هڅه وکړي، چې افغانستان ته بیا را ستانه، پیاوړي او د امریکا لپاره ګواښ شي.

د امریکا استخباراتي سازمان سي آی ای وایي؛ داسې ښکاري، چې د القاعده او داعش ملاتړیو دې جګړه ځپلي هېواد ته سترګې نیولي او د امریکا محتاطانه ارزونې هم ښیي؛ یو یا دوه کاله به وخت واخلي، چې القاعده دومره ځواک پیدا کړي، چې د امریکا قلمرو ته ګواښ پېښ کړي.

د دوي د څرګندونو له مخې؛ داعش او القاعده هڅه کوي، چې په افغانستان کې خپل فعالیتونه له سره پیل کړي.

امریکا د استخباراتو مسوولینو ویلي، چې دا به ناوړه حالت را منځته کړي.

دوی وایي، چې اړتیا ده د دې ډلو د فعالیت مخنیوی وشي.

د امریکا د استخباراتو په وینا، داسې نښې شته، چې دې ډلو افغانستان ته سترګې پټې کړي او ښایي بیا یې د پټځي په توګه وکاروي.

طالبانو ویلي، چې هیڅ  ترهګرې ډلې ته اجازه نه ورکوي، چې د افغانستان په خاوره کې فعالیت وکړي او نړیوال به له افغان خاورې ونه ګواښل شي.

پوځي کارپوه محمد سرور نیازي ویلي؛ اړتیا ده، چې طالبان په افغانستان کې د القاعده او داعش فعالیت بند او د نړۍ د هېوادونو ملاتړ او ژمنې را جلب کړي.

نوموړی وايي: امریکا ښه پوهیږي، چې داعش خپلې هڅې له کوم ځایه پیل کړي. د امریکا دا اندېښنه ښیي، چې اوس هم د فیل په غوږ کې ویده ده او نشي کولی دوه مذهبي ډلې له منځه یوسي. که غوښتل یې داعش له منځه یوسي؛ نو دا شل کاله به یې د خپل حضور پر مهال دا کار کړی و.

سیاسي هڅاند عزیز معارج وایي: داعش او القاعده امریکا جوړ کړي. اوس، چې طالبانو( اسلامي امارت ) ته د افغانستان د خاوري د ساتنې مسوولیت ورپر غاړه شوی؛ نو اوس، چې امریکا ترې اندېښنه ښودلې باید په دې اړه یې هڅې نورې هم ګړندۍ شي.                      

دا په داسې حال کې ده، چې تازه طالبانو په افغان خاوره کې د ترهګریزو هڅو پروړاندې کار پیل کړی او وایي، چې هیچا ته به دا هېواد ګواښنه وي او نړۍ دې په دې اړه اندېښنه نکوي.

تازه خبرونه

د پکتیکا ولایت د ګیان ولسوالۍ زلزله ځپلي اوس هم خوراکي توکو او سرپناه ته اړ دي

Published

on

(Last Updated On: چنګاښ ۴, ۱۴۰۱)

د افغانستان د پکتیکا ولایت د ګیان ولسوالۍ ژوندي پاتې شوي کسان، چې د کورنۍ څو غړي یې د سترګو په رپ کې له لاسه ورکړي د بې کوره کېدو او لوږې ترخې کیسې کوي.

له یوې خوا دغو خلکو د خپلو عزیزانو د له لاسه ورکولو درد پر اوږو بار کړی او له بلې خوا لوږې او بې کورۍ یې ژوند تریخ کړی دی.

 د اسلامي امارت چارواکي، چې ګیان ولسوالۍ ته ورغلي وايي؛ په سیمه کې شاوخوا ۹۰ سلنه کورونه ویجاړ شوي دي.

په نړیدلیو خټینو کورونو کې د دې سیمې بېوزله کورنیو ژوند کاوه، ماشومان د خپلو میندو په تودو غېږو کې پر درنده خوب ویده ول، چې دغه طبعیي ناورین وځپل او هر څه یې لوټه لوټه او کورنۍ یې یا نیمګړې کړې او یا یې هم بشپړې ووېشلې؛ خو ژوندي پاتې خلک یې سمدلاسه خواړو او سرپناه ته اړ دي.

د پکتیکا زلزله ځپلی سيد بختاجان وایي، چې د زلزلې له کبله یې د کورنۍ څلور غړیو ژوند له لاسه ورکړی او دوه نور یې په روغتون کې دي.

دی وايي، چې ژوندي پاتې کسان یې تر شنه آسمان لاندې پاتې دي.

بختا جان ته اوس د هغه د کورنۍ غړیو یوازې جامې ور پاتې دي.

د عامې روغتیا وزارت سرپرست قلندر عباد ویلي؛ دغې ویجاړوونکې او مرګونې زلزلې په ګیان ولسوالۍ کې ۹۰ سلنه کورونه نړولي او په ټولیزه توګه یې  ۱۰۳۶ کسان مړه کړل او شاوخوا  دوه زره نور په روغتونونو کې بستري شوي دي.

د طبیعي پېښو پر وړاندې د مبارزې وزارت د مرستیال شرف الدین مسلم د څرګندونو له مخې؛ خامه او کنډو کپرو سړکونو د مرستې هڅې له خنډ او ځنډ سره مخ  کړي؛ ځکه، نو په ګیان کې دغه بشري ناورین ځپلي کسان بېړنیو مرستو ته اړتیا لري.

دا په داسې حال کې ده، چې د جمعې پر ورځ د دوه یم ځل لپاره هم زلزلې دغه سیمه ولړزوله، چې په کې لږ تر لږه پېنځه کسان مړه شول.

Continue Reading

تازه خبرونه

د افغانستان په وروستۍ زلزله کې ۲۸۸ ماشومانو ته مرګ و ژوبله اوښتې

Published

on

(Last Updated On: چنګاښ ۴, ۱۴۰۱)

د ملګرو ملتونو د ماشومانو وجهي صندوق (یونیسف) وايي، په افغانستان کې د وروستۍ زلزلې له ۱۰۰۰ د ډېرو قربانیانو په ډله کې ۲۲۱ ماشومانو هم ژوند له لاسه وکړی او ۶۷ نور ټپیان دي.

په خوست او پکتیکا ولایتونو کې د تېرې سې شنبې شپې ناوخته ۶ اعشاریه یوې درجې زلزلې د تلفاتو له زیاتېدو سره د کورنیو او نړیوالو مرستندویه موسسو او بنسټونو اندېښنو زور اخیتسی او هڅه کوي، چې زیانمنو کسانو ته بېړنۍ مرستې ورسوي.

دا اداره وايي، چې ماشومان او تنکي ځوانان د زلزلې د خورا زیان اړوونکو پایلو او کورنیو څخه د بېلوالي او ټولنیزو ستونزو سره مخ دي.

په افغانستان کې د ملګرو ملتونو د ماشومانو د وجهي صندوق استازي د چارشنبې د شپې په زلزله کې د تلفاتو او ټپیانو په اړه تازه شمیرې وړاندې کړې. د یونیسف ادارې مسوولین وايي چې په پکتیکا او خوست کې د زلزلې له امله د وژل شویو شمیره یو زرو شپږ دیرشو ته لوړه شوې او شپاړس سوه دري څلویښت ټپیان شوي دي.

د ملګرو ملتونو د ماشومانو د ملاتړ صندق د مسوولینو د څرګندونو له مخې؛ په دې زلزله کې ۱۲۱ ماشومان مړه شوي او ۶۷ نور ټپیان دي.

په افغانستان کې د ملګرو ملتونو د ماشومانو د ملاتړ صندق استازی محمد ایویا ویلي: د تېرې شپې تر ناوخته پورې، د مړو شویو شمېر لږ تر لږه ۱۰۳۶ او د ټپیانو هغه ۱۶۴۳ ته رسیدلی، چې په کې ۱۲۱ ماشومان هم وژل شوي او ۶۷ ماشومان ټپیان دي. د تلفاتو ټول دقیق شمېر وړاندې کول سخت کار دی؛ ځکه ښايي د ځينو ټپیانو روغتیایي حالت د اندېښنې وړ دی او ښايي د تلفاتو شمېر نور هم لوړ شي.

د ملګرو ملتونو د ماشومانو وجهي صندوق پر ماشومانو او لویانو د دې زلزلې د منفي پایلو په اړه اندېښنه لري.

دوی څرګنده کړې، چې ماشومان او تنکي ځوانان له کورنيو څخه د بېلېدو له ناوړه پایلو سره مخ دي او روحيه يې سخته ځپل شوې ده.

د راپورونو له مخې؛ د پکتیکا ولایت ګیان ولسوالۍ کې تر ټولو ډېر تلفات اوښتي، څو زره کورونه ویجاړ شوي او یا هم زیانمن شوي، ماشومان او تنکي ځوانان کورنیو پاتې دي، احساساتي کړاوونو، ناوړه استفادې او نورو ګواښونو سره مخ دی.

نړیوالې ټولنې او بنسټونه، چې د سړکونو خرابوالی او پر لرې پرتو سیمو کې فقر او بېوزلۍ خلک له ناورین سره مخ کړي دي او اوس د مرستو رسولو چارې له ستونزو سره مخ دي.

له دې ټولو سره سره  اسلامي امارت او د سیمې او نړۍ ګڼو هېوادونو په تېرو څلور ورځو کې د زلزله ځپلیو کورنیو سره په لسګونه زره ټنه خوراکي توکي، درمل او د لومړنیو وسایلو مرسته کړې ده.

Continue Reading

تازه خبرونه

پاکستان د افغانستان زلزله ځپلیو ته د مرستې دوه یمه ټولګه راولېږله

Published

on

(Last Updated On: چنګاښ ۴, ۱۴۰۱)

د پاکستان لومړي وزیر شهباز شریف د جمعې پر ورځ د افغانستان د زلزله ځپلیو کورنیو لپاره اته نورې لارۍ له مرستو ډکې راولېږلې.

د پاکستان د حکومت په خپره شوې خبرپاڼه کې راغلي؛ د طبیعي پېښو پر وړاندې د مبارزې ملي ادارې لخوا راټوله شوې مرسته افغان چارواکو ته سپارل شوې ده.

په دې ټولګه کې خېمې، ترپالونه، کمبلې او بېړني درمل شته.

دغه راز ویل شوي؛ پاکستان ژمن دی، چې افغان وروڼو ته مرسته رسول روان وساتي.

دا په داسې حال کې ده، چې پاکستان د چارشنبې پر ورځ د افغانستان په پکتیکا او خوست ولایتونو کې د ۶.۱ درجې زلزلې له رامنځته کېدو وروسته، چې له ۱۰۰۰ ډېر کسان په کې مړه شول او زرګونه کورونه یې ویجاړ کړل خپلې اته لارۍ مرستې راولیږلې.

Continue Reading

Trending

Copyright © 2022 Ariana News. All rights reserved!