رویټرز راپور ورکړی، چې د ولسمشر ولادمیر پوتین د بهرنیو چارو وزیر سرګي لاوروف د یکشنبې پر ورځ په بیجینګ کې د چین له بهرنیو چارو وزیر وانګ‌یي سره ولیدل.

لاوروف به په چین کې د شانګهای همکاریو ټولنې (SCO) د بهرنیو چارو وزیرانو په غونډه کې ګډون وکړي.

د روسیې بهرنیو چارو وزارت ویلي: “دواړو خواوو له امریکا سره د اړیکو او د اوکراین د کړکېچ د حل لپاره د امکاناتو په اړه هم بحث وکړ.”

دې وزارت ویلي: “په نړیوال ډګر کې د دواړو هېوادونو ترمنځ د نږدې همغږۍ په ګډون د ملګرو ملتونو او د هغې د امنیت شورا، SCO، BRICS، G20 او APEC د پیاوړتیا پر اړتیا هم ټینګار وشو.”

د چین بهرنیو چارو وزارت ویلي: “د دواړو هېوادونو ترمنځ نږدې اړیکه “د یو بل پراختیا او بیا ژوندي کول او په ګډه د یوې ګډوډې او بدلیدونکې نړۍ لخوا رامنځته شویو ننګونو ته ځواب ووایي.”

د چین بهرنیو چارو وزارت ویلي، دواړو خواوو د کوریا ټاپووزمې او د ایران د اټومي مسلې په اړه هم نظرونه تبادله کړل.

چین او روسیې د ۲۰۲۲ کال په فبرورۍ کې پوتین بیجینګ ته سفر وکړ او څو ورځې مخکې له دې، چې هغه اوکراین ته لسګونه زره سرتېري واستول “بې محدودیته” ملګرتیا اعلان کړه.

په دې راپور کې راغلي؛ پوتین کله نا کله چین د “متحد” په توګه ستایلی دی.

امریکا، چین خپل ترټولو لوی سیال او روسیه ترټولو لوی ملي ګواښ ګڼي.

د رویټرز د څرګندونو له مخې؛ د روسیې بهرنیو چارو وزیر سرګي لاوروف د یکشنبې پر ورځ(د چنګاښ پېنځلسمه) د بریکس سرمشریزې په څنډه کې له خپل ایراني سیال عباس عراقچي سره ولیدل.

په دې لیدنه کې لاوروف د ایران د اټومي پروګرام د شخړې د حل په اړه د منځګړیتوب لپاره د مسکو وړاندیز بیا تکرار کړ.

د روسیې بهرنیو چارو وزارت د خبرپاڼې له مخې؛ لاوروف تېره میاشت پر ایران د امریکا او اسرائیلو بریدونو د غندلو په ګډون “د نړیوالې اټومي انرژۍ ادارې تر څارنې لاندې د اټومي تاسیساتو بمبارډ” او د ډیپلوماسۍ له لارې د اټومي مسلو د حل پر اړتیا ټینګار وکړ.

په دې خبرپاڼه کې راغلي: “مسکو د روسیې د ولسمشر لخوا د پخوانیو نوښتونو په ګډون د دوه اړخیزو منلو وړ حلونو په موندلو کې د مرستې لپاره خپل چمتووالی هم څرګند کړی دی.”

عراقچي د ۱۲ ورځنۍ جګړې په بهیر کې هم مسکو ته سفر کړی و.

رویټرز راپور ورکړ: د دولتي ټلویزیون لخوا د خپرې شوې ویډیو له مخې؛ د ایران رهبر آیت الله علي خامنه‌یي د شنبې پر ورځ د اسرائیلو له ۱۲ ورځنۍ جګړې وروسته، چې په کې لوړ پوړي ایراني قومندانان او اټومي ساینس پوهان ووژل شول؛ په یوه مذهبي غونډه کې ګډون وکړ.

د دولتي رسنیو لخوا په خپره شوې ویډیو کې د عاشورا د نمانځلو مراسم لیدل کیږي، چې د شیعه مسلمانانو د کلیزې تر ټولو سپېڅلې ورځ ده؛ لسګونه کسان ولاړ دي او خامنه‌یي هغه تالار ته ننوځي، چې ډېری دولتي مراسم په کې ترسره کیږي.

د ښکاره امنیتي دلایلو له مخې؛ خامنه‌يي د جون پر دیارلسمه د جګړې پر مهال مخکې له مخکې ثبت شوي پیغامونه خپاره کړي وه او له عامه څرګندېدو څخه یې ډډه کړې وه.

په دې راپور کې راغلي؛ د جون پر شپږویشتمه د دولتي ټلویزیون په مخکې له مخکې ثبت شويو څرګندونو کې خامنه‌یي ژمنه کړې، چې ایران به د امریکا د ولسمشر ډونالډ ټرمپ له غوښتنو سره – سره تسلیم نشي.