د روژې په مبارکه میاشت کې د ټنګ ټکور خپرولو له کبله د بدخشان ولایت د ښځو رادیو ( صدای بانوان) وتړل شوه.

د بدخشان ولایت د اطلاعاتو او فرهنګ رییس معزالدین احمدي په دې اړه د بریتانیا ګاردین ته څرګنده کړې، چې دې رادیوي مرکز د روژې په مبارکه میاشت کې څو ځلې د سندرو او ټنګ ټکور پر خپرولو د اسلامي امارت قوانین او مقررات تر پښو لاندې کړي او د سرغړونې له کبله بند شوی دی.

معزالدین احمدي ویلي: که دا رادیو د افغانستان اسلامي امارت پالیسي ومني او تضمین ورکړي، چې بیا به تېروتنه نه‌تکراریږي؛ مونږ به یې د بیا فعالیت اجازه ورکړو.

ګارډین د څرګندونو له مخې؛ د رادیو مشرې ناجیه سروش هر راز سرغړونه رد کړې او وایي، چې دا یوه دسیسه ده.

ناجیه سروش دا هم ویلي، چې طالبانو مونږ ته وویل، چې تاسې ټنګ ټکور خپروي. مونږ هیڅ ډول ټنګ ټکور خپور کړی ندی.

د هېواد یو ملي سوداګر مټې رابډوهلې خپل زر ټنه پیاز او الوګان یې د لیلام  پر بڼه خپلو هېوادوالو ته وړاندې کړل، چې وکولی شي ارزا نه او پر ټیټه بیه یې تر لاسه کړي.

د کابل په بازارونو کې یومن پیاز ۴۰۰ افغانۍ او یومن الوګان ۱۶۰ افغانۍ پلور ته وړاندې شوي وه، چې  ډېرو هېوادوالو يې د اخستلو او پېرودلو توان نه‌درلود؛ خو دهېواد یو ملي سوداګر زر ټنه پیاز او الوګان بازارته یومن پیاز پر ۱۵۰ او یومن الوګان ۱۰۰ افغانیو خلکو ته وړاندې کړل.

هېوادوال هم د خصوصي سکتور له دې اقدامه هرکلی کوي او له نورو سوداګرو هم غواړي، چې پخپلو هېوادوالو رحم وکړي، چې خلک وکولی شي د ژوندانه دا لومړني توکي پر ماسبه بیه تر لاسه کړي.

د کابل ښار اوسیدونکی مختار وایي: مونږ ډېر خوښ یوو او د دې سوداګر دې کور ودان وي، چې د پیازو او الوګانو بیه يي راټیټه کړې. مونږ هم واخستل. په عمومي مارکیت کې؛ خو څو برابره د پیازو بیه لوړه ده.

د کابل ښار یو بل اوسیدونکي پاچا خان نومی وایي: مونږ د پیازو د بیو د لوړېدو له کبله بیخي له پیازو استفاده نه‌کوله؛ خو اوس، چې یومن پیاز ۱۵۰ افغانۍ شوي ما هم وا خستل. د دې سوداګر دې هم کور ودان وي .

ظریف نومي کابل ښاري ویلي: د دې سوداګر دې کور ودان وي. له نور سوداګرو مو هیله ده، چې هغوی هم  په دې  سختو شرایطو کې د خپل ولس لاس ونیسي او ورسره همکاري وکړي.

د خصوصي سکتور غړیو ويلي، چې له دې کاره يي موخه د خپلو اړو هېواد والو سره په روانه مبارکه میاشت کې همکاري یادوي او د خصوصي سکتور له نورو غړیو هم  غوښتنه  کوي،  چې له خپلو هېوادوالو سره همکاري پراخه کړي.

د خصوصي سکتور غړی میرویس حاجي زاده وایي: مونږ باید د خپل هېواد په آبادۍ او هوساینه کې او له خپلو خلکو سره د همکارۍ لپاره راوړاندې شو. ما هم هڅه وکړه، چې زر ټنه پیاز لیلام کړم او دا لړۍ به تر راتلونکیو اووه ورځو روانه وي.

د کابل ښاروالۍ مسوولین د هېواد له نورو سوداګرو هم غواړي، چې د روژې په مبارکه میاشت کې دې د خپلو هېوادوالو دلاس نیوي لپاره راودانګي.

د کابل ښاروالۍ د مارکیت د تنظیم مرستیال انجنیر عصمت الله انصاري څرګنده کړې: مونږ د دې حاجي صاحب له دې هڅې هرکلی کوو. هیله ده، چې د خصوصي سکتور ټول غړي د دې ستونزې په مخنیو کې له خپل ولس سره همکاري وکړي.

د کابل ښاروال د کابل ښار ټولو مسوولینو ته خبر داری ورکوي؛ که هر څوک د ښاروالۍ له ټاکلې بیې په لوړه بیه پلورل وکړي؛ هټۍ، پلورنځی او مارکیت به يي وتړل شي. دا په داسې حال کې ده، چې د رواني  میاشت په بهیر کې لسګونه متخلفینو هټۍ ګانې بندې کړې دي.

د جمعې پر ورځ ( د وري ۱۱ ) د عربي متحده اماراتو یوې الوتکې د افغانستان د شمال ختیځو ولایتونو زلزله ځپلیو  کورنیو ته ۳۸ ټنه خوراکي او طبي توکي رالېږدولي دي.

د عربي متحده اماراتو د بهرنیو چارو وزارت په یوه خبرپاڼه کې لیکلي، چې دا مرستې د ابوظبۍ د پرلپسې هڅو یوه برخه ده، چې له طبیعي پېښو څخه زیانمنو هېوادونو ته د بېړنیو مرستو د رسولو او همدارنګه له زیانمنونکیو کسانو لکه ښځو، ماشومانو او بېوزلو بوډاګانو څخه د بشري مرستو د ملاتړ زیاتولو په برخه کې ترسه کیږي.

د رییس الوزرا اقتصادي مرستیالۍ تویت کړی، چې د جمعې پر ورځ له عربي متحده اماراتو څخه ۳۸.۵ ټنه بشري مرستې کابل ته را رسېدلې دي.

د اقتصادي مرستیالۍ د څرګندونو له مخې، په دغو مرستو کې خوراکي توکي، جامې او درمل شته، چې د اړوند وزارتونو او ادارو لخوا به پر اړمنو کسانو ووېشل شي.

 د رییس الوزرا د اقتصادي مرستيالۍ ځانګړي سکرتر عبدالله عزام د کابل په هوايي ډګر کې د تسليمۍ پر مهال د عربي متحده اماراتو له دغو مرستو د مننې تر څنګ ويلي، چې له دې سره به د دواړو هېوادونو اړيکې نورې هم پياوړې شي.

نوموړي له نړيوالې ټولنې وغوښتل، چې د بنديزونو او فشارونو پر ځاى دې د تعامل لار خپله کړي.

په کابل کې د اسلامي امارت له بیا واکمنېدو وروسته عربي متحده اماراتو افغانستان ته ۲۸ الوتکې ۶۲۳ ټنه طبي او خوراکي توکي رالېږلي دي.

د عربي متحده اماراتو د بهرنیو چارو وزارت ویلي، چې له دې مرستو څخه ۸۵۰ زره ښځو او ماشومانو په ګډون څه باندې یو اعشاریه یو میلیون کسانو ګټه اخیستې ده.