Connect with us

سوداگري

د آسیا پراختیايي بانک د ټاپي پروژې د تمویل چارې وځنډولې

Published

 on

(Last Updated On: کب ۱۹, ۱۴۰۰)

د آسیا پراختیایي بانک د ټاپي ۱۰ میلیارډ ډلرو پروژه، چې د ترکمنستان طبیعي ګاز د افغانستان له لارې پاکستان او هند ته لیږدوي؛ د اسلامي امارت تر رسمیت پېژندنې پورې وځنډوله.

د آریانا نیوز لخوا د آسیا پراختیایي بانک ADB  ته د لیږل شوي برښنالیک په ځواب کې یوه چارواکي منلې؛ دوی نشي کولی دا پروژه تمویل کړي؛ ځکه، چې د افغانستان نوی حکومت تر اوسه د نړیوالې ټولنې لخوا پر رسمیت پېژندل شوی ندی.

سرچینې زیاته کړې، چې د آسیا پراختیایي بانک د TAPI پروژې ټولې چارې او هڅې تر بلې خبرتیا ځنډولي دي.

دغه راز په دې وروستیو کې پاکستانيو رسنیو هم خبر ورکړی، چې د آسیا پراختیايي بانک د ټاپي پروژې مالي تمویل ځنډولی دی.

د پاکستان نیوز انټرنشنل خپرونې د پاکستان د انرژۍ د وزیر د څرګندونوله مخې په ډاګه کړې، چې د آسیا پراختايي بانک تر بلې خبرتیا پورې د ټاپي پروژې مالي ملاتړ ځنډولی دی. دلیل یې دا دی، چې اسلامي امارت تر اوسه د نړیوالې ټولنې لخوا پر رسمیت پېژندل شوی ندی.

د پاکستان د انرژۍ وزیر حماد اظهر ویلي: د ټاپي پروژې لویه برخه له افغانستان  څخه تېرېږي. اوس، چې د طالبانو حکومت پر رسمیت ندی پېژندل شوی؛ د آسیا پراختیايي بانک د دې پروژې د مالي تمویل کوونکي او همغږي کوونکي په توګه ټول فعالیتونه بند کړي او پروژه یې په ټپه درېدلې ده.

د افغانستان له لارې پاکستان او هند ته د ترکمنستان د طبیعي ګازو د لېږدولو لپاره د لس میلیارډ ډالرو پر ارزښت د ټاپي پروژه د دې هېوادونو تر منځ یوه له سترو اقتصادي پروژو څخه ده.

د اقتصادي چارو کارپوه سید مسعود په دې باور دي، چې پاکستان له دغې پروژې سره سیاسي معامله کوي او په دې هڅه کې دی، چې هند ته د دې پروژې ګټه ونه رسيږي.

شاوخوا دوه اوونۍ مخکې د اسلامي امارت مسوولینو د ټاپي پروژې له اجرائیوي مشر او په کابل کې د ترکمنستان له سفیر سره په لیدنه کې ویلي وه، چې په نږدې راتلونکي کې به د ټاپي پروژې عملي کار پیل شي.

د اسلامي امارت د صنایعو او کانونو خونې مشر شېرباز کمین زاده په دې اړه ویلي وه، چې دوی د ټاپي پروژې له اجرائیوي مشر او په کابل کې د ترکمنستان له سفیر سره کتلي، چې په نږدې راتلونکي کې د ټاپي پروژې عملي کار پیل کړي.

د ټاپي پروژه شاوخوا ۱۸۰۰ کیلومټره اوږدوالی لري او هر کال به شاوخوا ۳۳ میلیارډ مټر مکعب ګاز له  ترکمنستان څخه افغانستان، پاکستان او بیا هند ته رسوي.

دا پروژه په داسې حال کې د آسیا پراختیايي بانک له خوا ځنډول کېږي، چې د اسلامي امارت له واکمنۍ اووه میاشتې تېریږي؛ خو د نړۍ هیڅ هېواد تر اوسه پر رسمیت ندی پېژندلی.

سوداگري

حکومت د افغانستان، ازبکستان او پاکستان ترمنځ د ریلپټلۍ پروژه بشپړوي

Published

on

(Last Updated On: زمری ۱۴, ۱۴۰۱)

د افغانستان د ریلپټلۍ ادارې نن پنجشنبه د زمري ۱۳ په یوه خبري ناسته کې د افغانستان ، ازبکستان او پاکستان د ریلپټلۍ د لومړنیو چارو له رغولو او پیلولو خبر ورکړ.

د افغانستان د ریلپټلۍ ادارې مسوولینو ويلي؛ په کابل کې د تېر نظام له ړنګېدو سره د هېواد په ځینو برخو کې د ریلپټلۍ ځینې تاسیسات هم زیانمن شوي وه، چې د بیا رغونې چارې یې د افغانستان د ریلپټلۍ د ادارې لخوا پیل شوې دي.

د افغانستان د رېلپټلۍ ادارې مسوولینو د خپل یو کلن فعالیت په اړه ولس ته معلومات وړاندې کړل او وايي؛ د افغانستان، ازبکستان، پاکستان د ریلپټلۍ د پروژې د پلي کولو تدابیر نیول شوي، چې له پلي کېده سره به یې د افغانستان د اقتصادي ثبات ترڅنګ په سیمه کې امنیتي ثبات هم رامنځته شي.

د دې ادارې د څرګندونو له مخې، د ازبکستان، افغانستان، پاکستان د رېلپټلۍ جوړېدل کولی شي، چې منځنۍ او سویلي آسیا د افغانستان له لارې سره ونښلوي.

د ریلپټلۍ د ادارې مسوولین زیاتوي، چې  د افغانستان، ایران، چین د ریلپټلۍ د عملي چارو د پراختیا لپاره هم د ایران له لوري سره خبرې روانې دي.

په تېر یوه کال کې د ریلپټلۍ له لارې له ۳ میلیون ۴۵۶ زره متریک ټنو څخه زیات انتقالات شوي، چې په دې کې ډېره برخه واردات، ترانزیت او صادارت دي.

د افغانستان د ریلپټلۍ د ادارې عمومي رییس بخت الرحمان شرافت وایي: مونږ د ریلپټلۍ له درې میلیون متریک ټن ډېرانتقالات کړي او همداراز د افغانستان له لاري د ریلپټلیو تېریدل د سیمي په اقتصاد او امنیت کې مثبت اغېز لرلی شي.

د افغانستان د ریلپټلۍ ادارې مسوولینو په ډاګه کړې؛ په نږدې راتلونکې کې به د ایران – افغانستان ترمنځ د ریلپټلۍ له لارې د انتقالاتو بهیر هم پیل شي.

دوی زیاتوي، چې په روان کال کې به د کندهار- کوټې ترمنځ د ریلپټلۍ د جوړولو لړۍ هم  پیل شي.

د افغانستان د ریلپټلۍ ادارې تخنیکي مرستیال عبدالباري صدیقي وایي: مونږ هڅه کوو، چې د ریلپټلۍ د جوړولو بهیر پراخه کړو. که څه هم په نړیواله کچه د جوړولو لګښت لوړ دی؛ خو افغانستان د سیمي اړتیا ووته په کتو اړدی، چې په هېواد کې د ریلپټلۍ ته پراختیا ورکړي.

د افغانستان د ریلپټلۍ ادارې د مسوولینو د څرګندونو له مخې؛ افغانستان له درې هېوادونو سره په څلورو برخو کې نښلېدلی او دمګړۍ په هېواد کې نږدې ۲۵۰ کیلومتره ریلپټلۍ غزېدلې، چې ورځ تر بلې د پراختیا په حال کې ده.

Continue Reading

سوداگري

آریانا افغان شرکت هند ته الوتنې بیا پیلوي

Published

on

(Last Updated On: زمری ۱۳, ۱۴۰۱)

د آریانا افغان هوايي شرکت د پنجشنبې پر ورځ د زمري ۱۳ څرګنده کړې، چې ډېر ژر به له کابل څخه نوي دیلي ته مسافر وړونکې الوتنې بیا پیل شي.

دغه شرکت په خپله فیسبوک پاڼه کې لیکلي: له کابل څخه نوي ډیلي ته به لومړۍ الوتنه د جمعې پر ورځ وي.

د آریانا هوايي شرکت د معلوماتو له مخې، په لومړي پړاو کې به له کابل څخه نوي ډیلي ته په اوونۍ کې یوه الوتنه ولري.

د آریانا افغان هوايي شرکت په دې ویاړي، چې له یوې اوږدې مودې وروسته د هند دیلي ته خپل عادي خدمات بیا پیلوي.

د ۲۰۲۱ زېږدیز کال په اګست میاشت کې د هند په ګډون ځینو هېوادونو ته د آریانا هوايي شرکت الوتنې وځنډول شوې.

نوي دیلي تر اوسه هېواد ته د آریانا هوايي شرکت د الوتنو د بیا پیل په اړه څه ندي ویلي.

آریانا هوايي شرکت له دې مخکې ایران، روسیې، عربي متحده اماراتو، پاکستان، قطر او ترکیې ته خپلې الوتنې پیل کړې دي.

دا په داسې حال کې ده چې اسلامي امارت د افغانستان په خپلو نړیوالو هوایي ډګرونو کې د مسافرینو د څارنې قرارداد د عربي متحده اماراتو له یو شرکت سره لاسلیک کړی دی.

Continue Reading

سوداگري

کابل ته نغده ۴۰ میلیون دالر بشري مرسته راورسېده

Published

on

(Last Updated On: زمری ۱۱, ۱۴۰۱)

د افغانستان بانک څرګنده کړې، چې د سې شنبې پر ورځ کابل ته کابل ته نغدې ۴۰ میلیون دالر بشري مرسته راورسېده.

له دې مرستې یوازې دوه ورځې مخکې هېواد ته ۴۰ میلیون دالر رارسیدلي وه، چې د افغانستان بانک یو خصوصي باک ته سپارلي دي.

د افغانستان بانک څرګنده کړې، چې دا نوې رارسېدلې نغده ټولګه هم د هېواد یو سوداګریز بانک ته لېږدول شوې ده.

د افغانستان بانک د نړيوالې ټولنې له مرستو د مننې او قدردانۍ تر څنګ له دوی څخه غواړي چې له افغانستان سره په نورو برخو کې هم تعامل او همکاري ولري او له دې لارې د افغانستان له خلکو سره مرسته وکړي.

د افغانستان بانک مشرتابه پلاوی پر دې باور دی، چې افغانستان ته له اصولي لارې د اسعارو راتګ نیک ګام دی او له نړيوالې ټولنې غواړي، چې د بانکي سکتور له لارې خپلې بشري مرستې له افغانستان سره تر سره کړي.

د افغانستان بانک د پخواني حکومت له ړنګیدو راپدیخوا د یو میلیارد دالرو څخه ډېرې بشري نغدي مرستې ترلاسه کړي.

Continue Reading

Trending

Copyright © 2022 Ariana News. All rights reserved!