Connect with us

تازه خبرونه

د افغانستان انزوا د افغانانو او نورو هېوادونو په ګټه نده   

Published

 on

(Last Updated On: تله ۳, ۱۴۰۱)

د پاکستان لومړی وزیر وايي، د افغانستان انزوا به ستونزې نورې هم زیاتې کړي او دا د هیڅ هېواد په ګټه نده.

د پاکستان لومړي وزیر شهبار شریف د ملګرو ملتونو عمومي غونډې ته په خپله وینا کې ویلي؛ که نړیواله ټولنه غواړي، چې په افغانستان کې د ترهګرۍ ریښې وچې شي باید له سرپرست حکومت (اسلامي امارت) سره تعامل او همکاري وکړي.

نوموړی وایي: پاکستان په افغانستان کې د القاعده، داعش، تحریک طالبان پاکستان او د ازبکستان د اسلامي غورځنګ په ګډون د سترو ترهګرو ډلو د فعالیتونو په اړه خپلې اندېښنې له نړیوالې ټولنې سره شریکې کړي؛ خو د دې ستونزې د لرې کولو لپاره اړتیا ده، چې له سرپرست حکومت سره هر اړخیزه همکاري وشي.

د پاکستان لومړی وزیر له له اسلامي امارته غواړي، چې د دوحې په تړون کې خپلې کړې ژمنې پوره کړي او افغان ښځو او نجونو ته د کار او زدکړې زمینه برابره کړي.

شهباز شریف څرګنده کړې؛ پاکستان غواړي؛ افغانستان له ګاونډیانو سره په سوله کې وویني او پرته له دې، چې له خلکو سره د نژاد، مذهب او جنسیت له په پام کې نیولو سره چلند وشي؛ ځکه د حکومت انزوا دا ستونزې نورې هم زیاتوي. یو سوله ییز او په اړیکو کې ښکېل افغانستان د هر چا په ګټه دی. مونږ د افغانستان د مالي زیرمو خلاصېدل او د دې هېواد بانکدارۍ سیستم د بیا ژوندي کېدو غوښتونکي یوو.

دغه راز د پاکستان د بهرنیو چارو وزیر د ملګرو ملتونو په عمومي اسمبلۍ کې د لومړي وزیر له وینا یوه ګړۍ وروسته خبري غونډه کې برخه واخیسته او وایي؛ د نوي افغان حکومت( اسلامي امارت) پر رسمیت پېژندلو هڅې به هغه وخت بریالۍ شي، چې په خپلو ژمنو عمل وکړي.

نوموړی زیاته کړې؛ سرپرست حکومت( اسلامي امارت) یوازې د خپلو ژمنو په پوره کولو او د نړۍ د یوه رغنده غړي په توګه له نورو هېوادونو سره د ښو اړیکو لرلو له لارې خپلې موخې ترلاسه کولی شي.

د پاکستان د بهرنیو چارو وزیر بلاول بوتو زرداري ویلي: … د نوي افغان حکومت( اسلامي امارت) د رسمیت پېژندلو هڅې به هغه وخت ګټورې وي، چې دوی خپلې ژمنې پوره کړي. که چېرې دوی د ښځو حقونو، تعلیم، د تروریزم مخنیوی او د یو ټولګډونه حکومت رامنځته کولو ته پام وکړي، نو زه هیله لرم، چې ښې پایلې به ولري.

د ایران ولسمشر ابراهیم رییسي هم غواړي، چې د افغانستان ستونزې د بین الافغاني خبرو له لارې حل شي.

که څه هم اسلامي امارت د پاکستان د لومړي وزیر او د بهرنیو چارو د وزیر د وروستیو څرګندونو په اړه کوم غبرګون ندی ښودلی؛ خو ژمنه یې کړې، چې د ښځو او نجونو د حقونو په ګډون د اسلامي شریعت په چوکات کې د ټولو افغان وګړیو حقونه خوندي دي.

اسلامي امارت ډاډ ورکوي، چې د ګاونډ هېوادونو په ګډون د هیڅ هېواد امنيت ته له افغانستان ګواښ نه پېښيږي.

تازه خبرونه

د امریکا ځانګړي استازي له افغانستان سره د جاپان د مرستو پر اړتیا ټینګار څرګند کړ

Published

on

(Last Updated On: ليندۍ ۱۲, ۱۴۰۱)

د افغانستان لپاره د امريکا ځانګړي استازي توماس ويست جاپان ته په خپل دوه ورځني سفر کې له جاپاني چارواکو سره پء بشري اړتياوو، بشري حقونو او سياسي خبرو اترو خبرې کړې دي.

ویست د شنبې پر ورځ تویت کړی: جاپان د افغانانو دوست او له ۲۰ کلونو راپدیخوا هلته زمونږ ملګری او همکار پاتې دی او مونږ د جاپان له فعالې دیپلوماسۍ او روان سخاوت درناوی کوو.

توماس ویست وایي: کله، چې مونږ د متحدینو سره یوځای کار کوو؛ له هرې ننګونې سره ځواکمن یوو. سمه ده په افغانستان کې به مونږ د جاپان تخصص او بېلابېلو مرستو ته اړتیا ولرو.

د امریکا دې استازي دا هم ویلي؛ د جاپاني تادامیچي یاماموتو څخه، چې له ۲۰۱۶- ۲۰۲۰ کلونو پورې  یې په افغانستان کې د ملګرو ملتونو د ځانګړي استازي په توګه دنده ترسره کړې غوره سپارښتنې ترلاسه کړې دي.

نوموړي د جاپان د نړیوالې همکارۍ له ادارې سره د اقتصادي تګلارې په اړه هم خبرې وکړې.

د توماس ویست دا لیدنه د هغه د سفر یوه برخه ده، چې هند او عربي متحده امارات ته به هم ځي.

د امریکا د بهرنیو چارو وزارت لخوا په خپره شوې خبرپاڼه کې ویل شوي؛ تمه ده، چې نوموړی به په افغانستان کې د بشري او اقتصادي بحرانونو، د افغانانو د حقونو د خوندیتوب او د امنیتي اندېښنو د شریکولو په اړه له ملګرو او افغانانو سره هم سلا مشورې وکړي.

دا په داسې حال کې ده، چې توماس  ویست له هندي چارواکو سره د خبرو اترو لپاره نوي ډېلي ته رسېدلی دی.

Continue Reading

تازه خبرونه

د پاکستان پر سفارت برید کوونکي به عدالت ته راکاږل شي – متقي

Published

on

(Last Updated On: ليندۍ ۱۲, ۱۴۰۱)

د اسلامي امارت د بهرنیو چارو وزیر امیرخان متقي خپل پاکستاني سیال بلاول بوتو زرداري ته تیلیفوني ډاډ ورکړی، چې په کابل کې د پاکستان پر سفارت د پروني برید عاملین به د عدالت منګولو ته وسپارل شي.

د جمعې پر ورځ د لیندۍ ۱۱ د کابل د کارته پروان په اړوند سیمه کې د دغه سفارت پر انګړ وسلوال برید شوی، چې یو ساتونکی یې ټپي دی.

پولیسو ویلي، چې ډزې له یوې ودانۍ شوي او یو شکمن کس نیول شوی دی.

د افغانستان د بهرنیو چارو وزارت د خبرپاڼې له مخې؛ امیر خان متقي د دغه برید د غندلو تر ځنګ، بلاول بوتو زرداري ته ډاډ ورکړ، چې اسلامي امارت به د سفارت امنیت ته ځانګړې پاملرنه وکړي.

د پاکستان د بهرنیو چارو وزارت په یوه خبرپاڼه کې ویلي، د پاکستان د بهرنیو چارو وزیر د اسلامي امارت د پیوستون او خواخوږۍ له کبله مننه کړې او ټینګار کوي، چې په افغانستان کې د پاکستان د دیپلوماتیک پرسونل خوندیتوب او ساتنه خورا اړینه ده. افغان حکومت باید د ترهګرو مخه ونیسي؛ ځکه، چې هغو غواړي د پاکستان او افغانستان اړیکې خرابې کړي.

زرداري همدا راز له ترهګرۍ سره د مبارزې په برخه کې د پاکستان پر ټینګې ژمنې ټینګار وکړ او څرګندوي، چې پاکستان به د دغه ډول بزدلانه بریدونو مخه ونیسي.

دا په داسې حال کې ده، چې پاکستان د بهرنیو چارو وزارت ویاند ویلي؛ له کابله د سفارت د تړلو یا د دیپلوماتانو د ایستلو کوم پلان نلري.

Continue Reading

تازه خبرونه

د سمنګان ولایت په مدرسه کې چاودنه په پراخه کچه وغندل شوه

Published

on

(Last Updated On: ليندۍ ۱۰, ۱۴۰۱)

د سمنګان ولایت د مرکز ایبک ښار په الجهادي نومې مدرسه کې د چارشنبې خونړۍ چاودنې، چې له یو شمېر ماشومانو او تنکيو ځوانانو یې خوږ ژوند واخیست او یو شمېر نور یې ټپیان کړل؛ ملي او نړیوال غبرګونونه راوپارول.

د کورنیو چارو وزارت ویاند عبدالنافع ټکور ویلي: نن ماسپښین د سمنګان ولایت مرکز ایبک ښار په یوه دیني مدرسه کې چاودنه رامنځته شوې، چې له کبله یې شاوخوا ۱۰ زدکوونکي وژل شوي او یو شمېر نور ټپیان دي.

د افغانستان لپاره د امریکا ځانګړي استازي توماس ویست په یو لړ تویتونو کې دا برید وحشتناک بللی دی.

ویست څرګنده کړی: ټول افغان ماشومان حق لري، چې پرته له وېرې مدرسې ته ولاړ شي؛ امریکا د بې ګناه ملکي وګړیو پر وړاندې دا بې رحمانه بريد غندي.

د بښنې نړیوالې ټولنې دغه چاودنه خواشینوونکې نومولې او په یوه تویت کې یې زیاته کړې، چې دا نړۍ وریادوي، چې د افغانانو کړاوونه اوس هم پای ته ندي رسیدلي.

د بښنې نړیوال سازمان ویلي، افغانستان د نړۍ پام غواړي او د دغه هېواد د خلکو د خوندیتوب لپاره باید کلکې هڅې وشي او د دغه ډول بزدلانه بریدونو مسوولین محاکمه شي.

د ملګرو ملتونو د ماشومانو وجهي صندوق (یونیسف) هم په خپل غبرګون کې څرګنده کړې، چې د دغې چاودنې له کبله سخت خواشیني شوي دي.

یونیسف زیاته کړې، چې د روان کال په لومړۍ نیمایي کې هم لږ تر لږه ۲۸۸ ماشومان وژل شوي یا ټپیان شوي، چې په هغو کې پر ښوونځیو او تعلیمي چاپېریال بریدونه هم شامل دي.

د دې ادارې د څرګندونو له مخې؛ داسې انګیرل کیږي، چې اصلي شمېر خورا لوړ دی.

د ملګرو ملتونو د ماشومانو وجهي صندوق ویلي، چې ماشومان باید هیڅکله د تاوتریخوالي هدف نه وي.

د ناروې د بهرنیو چارو وزیرې انیکن هویتفیلد دغه چاودنه غندلې او خپله خواشیني داسې څرګندوي: د افغانستان په سمنګان ولایت کې پر یوه ښوونځي برید حشتناکه و؛ ځکه، چې بې ګناه خلک او زدکوونکي یې ووژل او ټپیان کړل. دا ظلمونه یوازې په افغانستان کې د بحرانونو ګڼه ګوڼه زیاتوي. زما فکر د قربانیانو کورنیو او د دوی عزیزانو ته ورګرزي.

جرمني هم د سمنګان په ښوونځي کې چاودنه غندلې او ویلي یې دي، چې ماشومان باید له وېرې او زیان پرته ښوونځي ته ولاړ شي.

د آلمان د بهرنیو چارو وزارت څرګنده کړې؛ مونږ د افغانستان په شمال ایبک ښار کې پر یوه ښوونځي د برید په اړه د ماشومانو او ځوانانو په ګډون د ګڼو کسانو د وژل کېدو او ټپي کېدو د راپورونو له کبله ټکان وخوړ. ماشومان باید پرته له وېرې او زیان ښوونځي ته ولاړ شي. زموږ فکرونه د هغو کسانو سره دي چې د خپلو عزیز پر وژل کېدو غمجن دي.

د سمنګان ولایت د اطلاعاتو فرهنګ رییس امدادالله مهاجر ويلي، د چارشنبې پر ورځ د سمنګان ولایت مرکز ایبک ښار ته څېرمه په جهاديه مدرسه  کې د لمانځه پر مهال چاودنې ١٥ زدکوونکي وژلي او يو شمېر نور ټپيان دي.

دغه برید په کور دننه هم په پراخه کچه وغندل شو.

د اوسني حکومت سیاسي مرستیال مولوي عبدالکبیر د سمنګان په دیني مدرسه کې چاودنه پر کلکو ټکو غندلې او ویلي یې دي، چې دا د ټولو اسلامي او بشري اصولو خلاف او د نه بخښلو وړ جنایت دی.

مولوي کبیر تویت کړی د افغانستان او اسلام دښمنانو په دې برید د قرآن او سنتو زدکوونکي زیانمن کړل او له اسلام سره یې خپله دښمني څرګنده کړه. زه ډاډ درکوم، چې د دغه جنایت عاملین به بې ځوابه پاتې نشي.

د کورنیو چارو وزارت هم چاودنه تائید کړې ده.

د کورنیو چارو وزارت ویاند عبدالنافع تکور وايي:د سمنګان د مرکز ایبک په یوه دیني مدرسه کې چاودنې ۱۰ زدکوونکي وژلي او ګڼ نور یې ټپیان کړي دي.

په ټولنیزو رسنیو کې راپورونه ښيي، چې د تلفاتو شمېر له دې ډېر دی.

د سمنګان د ولایتي روغتون چارواکي وايي، د دغه ولایت په جهاديه مدرسه کې د چاودنې د قربانیانو شمېر ۱۹  کسانو  ته رسیدلی دی. د دغه روغتون رییس زیاتوي، د پېښې ۹ ټپيان، چې روغتیايي وضعیت نازک و د بلخ ولایت حوزوي روغتون لېږدول شوي دي.

تر اوسه کومې ډلې د دې چاودنې مسوولیت پر غاړه ندی اخیستی.

په همدې حال کې اسلامي امارت وايي، چې د دې چاودنې د څرنګوالي په اړه یې پلټنې پیل کړي او ډېر ژر به د دغې پېښې عاملین وپېژندل شي او مجازات به شي.

Continue Reading

Trending

Copyright © 2022 Ariana News. All rights reserved!