Connect with us

لوبی

د افغانستان او پاکستان د یو ورځنیو لوبو سږنۍ لړۍ وځنډېده

Published

 on

(Last Updated On: چنګاښ ۶, ۱۴۰۱)

پاکستانيو رسنیو د یکشنبې پر ورځ څرګنده کړې، چې د افغانستان او پاکستان ترمنځ د درې یو ورځنیو لوبو لړۍ یو ځل بیا تر راتلونکي کاله وځنډول شوه.

ټاکل شوې وه، چې دواړه هېوادونه د ۲۰۲۱ زېږدیز کال د سپټمبر په لومړیو کې د سریلانکا پر کوربتوب درې یو ورځنۍ لوبې ترسره کړي؛ خو د پاکستان کرکټ بورډ ویلي وه، چې د افغانستان کرکټ بورډ د دې لړۍ د ځنډولو غوښتنه کړې ده.

د پاکستان کرکټ بورډ څرګنده کړې؛ دواړه بورډونه به هڅه وکړي، چې دغه سیریز په ۲۰۲۲ زېږدیز کال کې تر غور لاندې ونیسي.

د پاکستان جیو نیوز د نامعلومو سرچینو په حواله راپور ورکړی، چې دا ځل د پاکستان د لوبډلې د بوختیا له کبله دا لوبې وځنډول شوې.

د راپورونو له مخې، یاده لړۍ به اوس د راتلونکي کال تر اپریل پورې ځنډېدلې وي.

لوبی

افغانستان د مرکزي آسیا د فوتبال اتلولۍ په لومړۍ لوبه کې ترکمنستان ته ماتې ورکړه

Published

on

(Last Updated On: غبرګولى ۱, ۱۴۰۲)

د افغانستان له ۲۰ کلنو ټیټ عمره ځوانانو د فوتبال ملي لوبډلې د یکشنبې پر مازیګر د مرکزي آسیا د فوتبال اتلولۍ د سیالیو په لومړۍ لوبه کې ترکمنستان ته ۲-۱ ماتې ورکړه.

دا لوبه د تاجکستان د پلازمېنې دوشنبې په زسکا لوبغالي کې ترسره شوې ده.

په دې لوبه کې افغانستان د فرهاد علی‌زاده پر ښکلې صربې له سیالې لوبډلې مخکې شو؛ خو وروسته د ترکمنستان لوبډلې ډېر ژر لوبه مساوي کړه.

البته له لومړي ګول څو دقیقې وروسته ترکمنستان له یوې پینالتۍ هة برخمن شو؛ خو د افغانستان ګول ساتونکي فیصل سعیدخېل د دې پینالتۍ پر نیولو د ترکمنستان د بریا مخه ونیوله.

په دوه‌یمه نیمايي کې د ترکمنستان له هڅو ترسره کولو سره ـ سره افغانستان وکولی شول، چې د همایون همدرد پر بدیل عنایت الله کوهي دوه‌یم ګول وواهه او بریا یې ترلاسه کړه.

په دې تورنمنت کې به د افغانستان دوه‌یمه لوبه نن دوشنبه د کابل پر وخت مازیګر ۴:۳۰ د کوربه هېواد تاجکستان پر وړاندې ترسره شي.

Continue Reading

لوبی

مونږ افغانستان کم نه‌ارزوو- د بنګله دیش کرکت بورد

Published

on

(Last Updated On: غویی ۳۱, ۱۴۰۲)

په داسې حال کې، چې ټاکل شوې د افغانستان کرکت ملي لوبډله په درې اړخیزو سیالیو کې له بنګله ديش سره مخ شي؛ د بنګله دیش د غوراوي کمیټې مشر ویلي، چې دوی دمګړۍ پر همدې لړۍ بشپړ راڅرخي او د لوبډلې پر جوړولو اخته دي.

د غوراوي کمیتې مشر منهاج العابدین خبریالانو ته ویلي: مونږ د هغه څه په اړه، چې په بهر کې ویل کېږي؛ فکر نه‌کوو. نړیوال جام ته اوس هم څلور میاشتې پاتې دي. مونږ د افغانستان پر وړاندې یو لړ لوبې لرو او په اړه یې فکر کوو.

هغه زیاته کړې: مونږ به له افغانستان سره په دغو درې بڼو لوبو کې کوربه وو؛ ځکه، نو اوس مونږ د همدې لپاره خپلې لوبډلې تنظیموو. زه فکر کوم، چې مونږ اوس‌مهال یوازنۍ تست لوبډله یوو، چې د نړیوال جام په اړه بحث کوو. مونږ باید د نړیوال جام لپاره د لوبغاړیو چمتووالی او فعالیت په پام کې ونیسو او یوه لوبډله جوړه کړو.

د بنګله دیش د ملي لوبډلې پخواني لوبډلمشر دا هم ویلي، چې تر راتلونکې اوونۍ به د افغانستان پر وړاندې د لوبډلو جوړښت وروستی شي او لوبغاړي به یې د مې له نهویشتمې روزنیزې هڅې پیل کړي.

منهاج العابدین ویلي، چې د بنګله دیش تکړه لوبغاړی شکیب الحسن ښايي د ورپېښ ټپ له کبله په تست لوبو کې برخه وانخلي؛ خو تمه ده، چې په پنځوس آووریزو لوبو کې ګډون وکړي.

نوموړي دغه راز په راتلونکیو سیالیو کې د افغانستان پر وړاندې د هر ډول تست لوبو ترسره کول رد کړل او هیله یې څرګنده کړه، چې تر ټولو غوره جوړښت به نندارې ته وړاندې کړي.

بنګله دیش د افغانانو پر وړاندې ښه ریکارد نه‌لري. په ځانګړې توګه په اوږده لوبه کې؛ ځکه، چې دوی په ۲۰۱۹ کې لومړۍ تست لوبه پر ۲۲۴ منډو ګټلې وه.

منہاج العابدین څرګنده کړې: مونږ کوم ازمایښت ته چمتو نه‌یوو. افغانستان ډېره ښه لوبډله ده. مونږ د دوی پر وړاندې بده تجربه لرلې؛ ځکه، چې مونږ وروستی تست له لاسه ورکړ. مونږ به دوی کم نه ارزوو. مونږ به هڅه وکړو، چې د افغانستان پر وړاندې تر ټولو غوره جوړښت اعلان کړو.

د افغانستان لوبډله به د جون له څوارلسمې څخه تر اتلسمې نېټې په داکه کې یوه تست لوبه ترسره کړي، چې وروسته به هند ته ولاړه شي. لوبډله به د جولای پر لومړۍ نېټه بنګله دیش ته راستنه شي، چې د جولای له ۵ څخه تر ۱۱ پورې په چتوګرام کې درې پنځوس آووریزې لوبې وکړي.

افغان لوبډله به د جولای پر څوارلسمه او شپاړسمه په سیلهت کې دوه شل آووریزې لوبې وکړي.

Continue Reading

لوبی

آریانا تلویزیون د کرکت د ۴ سترو نړیوالو سیالیو د خپرولو حق ترلاسه کړ

Published

on

(Last Updated On: غویی ۳۰, ۱۴۰۲)

آریانا تلویزیون د نړۍ پر کچه د سپورتي لوبو د وړاندې کولو په لړ کې بریالی شو، چې د کرکت د ۴ سترو نړیوالو سیالیو د خپرولو حق هم ترلاسه کړي.

دغه تورنمنت یا سیالۍ به له جون څخه تر نومبر پورې ترسره شي.

د کرکت دغه څلور تورنمنتونه، چې له آریانا تلویزیون څخه به په ژوندۍ بڼه خپریږي؛ نومونه یې دا دي:

د نړیوال جام وروستۍ تست لوبه، د نړیوال جام غوراوي سیالۍ، د آسیایي ملتونو جام او نړیوال جام

د نړیوال جام وروستۍ تست لوبه

د آریانا تلویزیون له لارې په ژوندۍ بڼه لومړۍ لوبه به د نړیوال جام وروستۍ تست لوبه وي. دا سیالۍ به د جون له ۷ څخه د جون تر ۱۱ پورې ترسره شي.

د نړیوال تست غوره لوبډلې؛ هند او آسترالیا دي، چې په لندن کې به پر زړه پورې وروستۍ لوبه ترسره کړي.

هند د تېرو سياليو اتل نوماند و، چې د دوه‌یيم پړاو په پايلوبه کې یې له نيوزيلند څخه ماتې وخوړله.

په هرصورت، دا ځل هند د آسترالیا پر وړاندې د درې پرلپسې تست سیالیو پر ګټلو ډېر چمتو ښکاري.

د نړیوال جام غوراوي سیالۍ

دا سیالۍ په حقیقت کې د نړیوال تست اتلولیو سیالیو له پای لوبې یوازې دوه ورځې وروسته پیلیږي.

د ۲۰۲۳ کال د کرکت نړیوال جام روزنیزې سیالۍ به د جون له ۱۸ څخه د جولای تر ۹ په زمبابوې کې ترسره شي.

د نرینه وو کرکت نړیوال جام سیالۍ، چې د روان کال په وروستیو کې ترسره کېږي؛ دوه لوبډلې کولی شي د روزنیزو سیالیو له لارې لار پیدا کړي.

هغه لوبډلې، چې له دغو دوه سیالیو څخه به یوې ته لار ومومي دي: ایرلیند، نیپال، هالیند، عمان، سکاتلیند، سریلانکا، عربي متحده امارات، امریکا، ویست اندیز او زیمبابوی.

اته لوبډلې ، چې مخکنۍ وړتیا لري؛ دادي: افغانستان، بنګله دیش، پاکستان، هند، آسترالیا، انګلستان، نیوزیلیند او سویلي آفریقا.

د آسیایي ملتونو جام

د آسیایي ملتونو جام سیالۍ، چې ټاکل شوې د سپتمبر په میاشت کې پیل شي؛ له آریانا تلویزیون څخه به هم په ژوندۍ بڼه خپریږي. دا په کرکت کې یوازنی براعظمګي اتلولي ده او سیالۍ په پنځوس آووریز او شل آووریزو بڼو کې ترسره کیږي.

دا ډول تورنمنت په ۱۹۸۳ کې هغه مهال رامنځته شو، چې د آسیا کرکت شورا د آسیایي هېوادونو ترمنځ د ښه نیت د ودې لپاره د یو اقدام په توګه رامنځته شوه.

لومړۍ یو ورځنۍ نړیواله سیالي په ۱۹۸۴ کال کې ترسره شوه، چې درې لوبډلو؛ هند، پاکستان او سریلانکا په کې برخه اخیستې وه.

۲۰ آووریزې سیالۍ په ۲۰۱۶ کې وپېژندل شوې.

د سږني تورنمنت لپاره، ګروپونه او بڼه د ۲۰۲۳ کال د جون ۵ ته اعلان شوې او شپږ لوبډلې پر دوه ګروپونو ووېشل شول.

ټولټال ۱۳ لوبې به ترسره شي، چې په کې ۶ د لیګ لوبې، ۶ سوپر فور لوبې او یوه وروستۍ هغه ده.

په الف ګروپ کې: هند، پاکستان او نیپال او

په ب ګروپ کې: دفاعي اتل سریلانکا له بنګله دیش او افغانستان سره دي.

له هر ګروپ څخه دوه مخکښې لوبډلې به سوپر فور ته لار ومومي. له هغه ځایه به دوه مخکښې لوبډلې په وروستۍ هغه کې له یو بل سره لوبه وکړي.

د کرکت نړیوال جام

د نړۍ پر کچه د کرکت له څو میاشتنیو سیالیو وروسته، ۲۰۲۳ کال به د کرکت نړیوال جام پر زړه پورې سیالیو پای ته ورسېږي.

دا سیالۍ به د آریانا تلویزیون له لارې یو ځل بیا په ژوندۍ بڼه خپرې شي.

د یو ورځنیو نړیوالو سیالیو په لړ کې به لس هېوادونه د جام د ګټلو لپاره سره سیالي وکړي، چې پر وروستی ځل انګلستان په ۲۰۱۹ کال کې ګټلی و.

دا تورنمنت به د هند پر کوربتوب ترسره کیږي او نېټه یې د اکتوبر له ۵ څخه د نومبر تر ۱۹ پورې ده. په هرصورت، د ځینو راپورونو د څرګندونو له مخې؛ شونې ده، چې وروستۍ لوبه د نومبر پر ۲۶ ترسره شي.

په لومړیو کې، ټاکل شوې وه، چې دا تورنمنت به د ۲۰۲۳ کال د فبرورۍ له ۹ څخه د مارچ تر ۲۶ پورې ترسره شي؛ خو د ۲۰۲۰ په جون کې څرګنده شوه، چې تورنمنت د کرونا ناروغۍ له کبله له اکتوبر څخه نومبر ته وځنډول شو.

انګلستان دفاعي اتل دی. دغې لوبډلې په تېر ۲۰۱۹ کال کې نیوزیلیند ته لهه ماتې ورکولو سره اتلولي ګټلې وه.

آریانا تلویزیون په داسې حال کې د کرکت د لویو تورنمنتونو د خپریدو حق تر لاسه کړ، چې اوس مهال د هند غوره لیګ پر ژوندۍ بڼه خپروي.

د کرکت هغه مینه وال، چې تر اوسه یې دغه ورځنۍ لوبې نه‌دي لیدلي؛ کولی شي په خپلو کورونو کې د آریانا تلویزیون له لارې یا د آریانا تلویزیون له اوبپاڼو څخه په ژوندۍ بڼه وګوري.

په همدې حال کې آریانا تلویزیون له هرې سیالۍ مخکې د سیالیو مهالوېش خپروي؛ نو ډاډه اوسئ او زمونږ په اوبپاڼو کې یې په اړه تازه معلومات وڅارئ.

Continue Reading

Trending

Copyright © 2022 Ariana News. All rights reserved!