د افغانستان اسلامي امارت رهبر شیخ هبة‌الله آخوندزاده پرون ماسپښین د ۲۰۵ البدر قول اردو ځواکونو ته په وینا کې پر لمانځه، دیني علومو زده‌کړې، اسلامي اخلاقو رعایت او د بیت‌المال ساتنې ټینګار وکړ.

د اسلامي امارت د خپرو شویو څرګندونو له مخې: نوموړي ویلي، چې مجاهدین باید لمونځ د ټولو ارکانو او شرایطو پر رعایت ادا کړي او د دیني زده‌کړو ترڅنګ، اسلامي اخلاق او آداب هم په خپل ژوند کې عملي کړي؛ ځکه، چې خلک یې کړنې څاري.

د اسلامي امارت رهبر له دې ځواکونو غوښتي؛ قرآن کریم له قرائت، تجوید او معنا له مخې زده کړي، جوماتونو ته درناوی ولري، د خپلو مشرانو او استادانو درناوی وکړي او خپلې زده‌کړې روانې وساتي.

هغه د دولتي امکاناتو؛ موټرو او وسلو پر مسوولانه کارونې ټینګار کړی او له دې ځواکونو یې غوښتي، چې له بیت‌المال څخه له ناسمې ګټې اخیستنې ډډه وکړي.

شیخ هبة‌الله آخوندزاده همدارنګه د ځواکونو ترمنځ د یووالي او همغږۍ پر ساتلو، له قوم‌پالنې او اړیکوپالنې څخه پر ډډه کولو او د شخصي ګټو پر ځای د نظام ګټو ته پر لومړیتوب ورکولو ټینګار کړی دی.

د ډله‌ییز امنیت تړون ټولنې سرمنشي تالات‌بیک ماسادیکوف ویلي، چې روسیه او د دې ټولنې نور غړي به د روان میلادي کال تر پایه د افغانستان له پولې سره د تاجکستان د امنیت پیاوړتیا لپاره دغه هېواد ته د وسلو او تجهیزاتو د لېږلو بهیر پیل کړي.

د روسیې تاس خبري آژانس د راپور له مخې؛ ماسادیکوف ویلي، چې د قزاقستان، قرغزستان، روسیې او بېلاروس لومړنۍ جوپې به د روان کال د مني تر پایه تاجکستان ته ولېږدول شي.

هغه زیاته کړې، چې دا پروګرام د تجهیزاتو ترڅنګ وسلې هم رانغاړي او موخه یې د افغانستان له پولې سره په اوږدو کې د تاجکستان د امنیتي وړتیاوو پیاوړتیا ده.

د ډله‌ییز امنیت تړون ټولنې سرمنشي ټینګار کړی، چې د تاجکستان د پولې د پیاوړتیا پروګرام افغانستان ته ګواښ نه‌دی.

دا په داسې حال کې ده، چې اسلامي امارت له دې مخکې ویلي وه، چې د افغانستان خاوره به د هیڅ هېواد او ګاونډ هېوادونو پر وړاندې ونه‌کارول شي.

د ازبکستان د ولسمشر سلاکار جولان وهابوف ویلي؛ د ازبکستان او ناروې د چارواکو دوه‌ورځنۍ غونډه د ناروې په پلازمېنه اوسلو کې ترسره شوه، چې په کې د سیمې امنیت، په سیمه‌ییزو همکاریو کې د افغانستان ونډه او د اقتصادي اړیکو پراختیا وارزول شوه.

وهابوف په ایکس‌پاڼه کې لیکلي، چې دا غونډه د ناروې د شخړو د اواري مرکز له‌خوا جوړه شوې وه او له افغانستان سره پر عملي تعامل، خبرو، امنیت، سوداګرۍ، انرژۍ، ټرانزیټ او سیمه‌ییز پیوستون راوڅرخېدله.

د ازبکستان په پلاوي کې د افغانستان لپاره د دغه هېواد د ولسمشر ځانګړي استازي عصمت‌الله ایرګاشوف، په ناروې کې د ازبکستان سفیر رحمت‌الله نوریمبتوف، د نړیوال اقتصاد او ډیپلوماسۍ پوهنتون د نړیوالو پرمختللیو مطالعاتو انسټیټیوټ مرستیال عادل غفاروف او جولان وهابوف ګډون درلود.

وهابوف څرګنده کړې؛ په دې غونډه کې یې د سولې ټینګښت او له ګاونډیانو سره د ښو اړیکو په برخه کې د ازبکستان تجربې وړاندې کړې او ټینګار یې کړی، چې په سیمه کې تلپاتی ثبات یوازې د سیمه‌ییزې همپالنې پر بهیرونو د افغانستان د تدریجي ګډون له لارې شونی دی.

هغه دا غونډه د نورو خبرو لپاره هیله‌بښونکی پیل بللی او هیله یې څرګنده کړې، چې دا بهیر به په منظم ډول روان وي.