د بهرنیو چارو وزارت ويلي، د عمان په پلازمېنه مسقط کې د افغان سفارت د ډیپلوماټانو فعالیتونه او خدمات د تېرې اوونۍ د یکشنبې پر ورځ پیل شول.

د بهرنیو چارو وزارت د ویاند مرستیال ضيا احمد تکل زیاته کړې، چې د کوربه هېواد پر همکارۍ د سفارت د فعالیتونو بیا پیلول به د کابل او مسقط ترمنځ د سیاسي، اقتصادي، ټولنیزو او مذهبي اړیکو په پیاوړتیا کې رغنده رول ولوبوي.

دغه راز په افغانستان کې د ازبکستان د سفیر ۱۲ کلن ماموریت پای ته رسېدلی او ازبکستان به افغانستان ته خپل نوی سفیر هم وروپېژني.

یادګار خواجه شادمانوف د ریاست الوزرا له اداري مرستیال سره په خپله وروستۍ کتنه کې ویلي، چې په افغانستان کې یې د خپل ماموریت پر مهال په بېلابېلو برخو کې د دوه اړخیزو اړیکو د پیاوړتیا او پراختیا هڅه کړې ده.

هغه ټینګار کړی، چې هېواد یې له افغانستان سره د اقتصادي او سوداګریزو اړیکو د پراخولو غوښتونکی دی او ازبکستاني سوداګر او پانګوال چمتو دي، چې په افغانستان کې په ځانګړي توګه د کانونو او انرژۍ په برخو کې پانګونه وکړي.

د ریاست الوزرا اداري مرستيال دغه راز د دوه اړخيزو اړيکو پر پراختيا ټينګار وکړ او وایي، چې افغانستان او ازبکستان پخوانۍ اړيکې لري.

د ریاست الوزراء اداري مرستیال عبدالسلام حنفي ویلي؛ اسلامي امارت د هېواد په بېلابېلو سکټورونو کې د سوداګرو او پانګوالو لپاره د لازمو اسانتیاوو له برابرولو سره له پانګونې هرکلی کوي.

په افغانستان کې د یادګار خواجه شادمانوف تر ټولو مهمه لاسته راوړنه په تېره بیا په تېرو درې کلونو کې د څه باندې دوه میلیارډ ډالرو پر ارزښت د پېنځه سوداګریزو او اقتصادي تړونونو لاسلیکول ول، چې په دې وروستیو کې د دواړو هېوادونو د لوړ پوړو چارواکو په حضور کې لاسلیک شول.

د ایران ولسمشر مسعود پزشکیان واک ته له رسېدو وروسته خپلې لومړنۍ خبري غونډې ته ویلي؛ د هېواد د ملي امنیت په عالي شورا کې د مهاجرینو په اړه درې غونډې شوي او هغه کسان، چې ایران ته په ناقانونه توګه داخل شوي، پر پوره درناوي به بېرته افغانستان ته ستانه شي.

مسعود پزشکیان په ایران کې د افغان مهاجرینو په اړه د یوې پوښتنې په ځواب کې ویلي، چې غیر قانوني مهاجرین به بېرته افغانستان ته ستانه شي؛ ځکه، چې د هېوادونو تر منځ د قانوني چوکاټ مراعات کول اړین دي او هرڅوک یې باید تعقیب کړي.

د ایران ولسمشر مسعود پزشکیان وایي: له دغو کسانو څخه ځينې يې قانوني پاسپورټونه او ويزې لري؛ خو يو شمېر يې په ناقانونه توګه هېواد ته رادننه شوي، چې بايد د قوانينو او مقرراتو له مخې ايران ته رادننه شوي واى. مونږ وروڼه يوو؛ خو د هېوادونو تر منځ د قانوني چوکاټ مراعاتول اړين دي او هر څوک يې بايد مراعت او په پام کې ونیسئ. هغه کسان، چې په غیر قانوني توګه ایران ته داخل شوي، پر درنښت به افغانستان ته راستانه شي.       

د بهرنیو چارو وزارت چارسمبالي په کابل کې د بهرنیو هېوادونو له سفیرانو سره په کتنه کې د افغان کډوالو د کوربتوب په تړاو له هېوادونو ستاینه کړې او وایي، چې هېوادونه په ځانګړې توګه ایران او پاکستان باید د افغان کډوالو د ایستلو په بهیر کې له زغم او احتیاط څخه کار واخلي. ترهغه پورې حوصله وکړي، چې افغانستان په خپلو پښو ودریږي.

د بهرنیو چارو وزارت چارسمبالي ویلي، چې د افغانستان په ټولو مسایلو کې هېوادونه امنیتي نظرونه لري او دا د حل لاره نده او اسلامي امارت چمتو دی، چې د سیمې له هېوادونو سره د متقابل احترام پر بنسټ مثبتې، رغنده او اقتصاد محوره خبرې وکړي.

امیرخان متقي وایی، چې د امنیت او ثبات د تامین لپاره باید رښتیني، منطقي او عملي ګامونه واخیستل شي او د سیمې له هېوادونو یې وغوښتل، چې د خپلو مشروعو ګټو د تامین لپاره له یو بل سره همکاري وکړي؛ وړو مسایلو ته پام ونکړي او د اقتصادي همکاریو پر پراختیا راوڅرخیږي.

د افغانستان بهرنیو چارو وزارت چارسمبالي تېره ورځ د وږي پېنځه‌ویشتمه په کابل کې د مېشتو دولتونو سفیرانو او د سیمه‌ییزو او نړیوالو ټولنو له استازو سره د ماښامنۍ ناسته تر سره کړه. 

د بهرنیو چارو وزارت د خبر پاڼې له مخې؛ په دې ناسته کې د بهرنیو چارو وزیر مولوي امیر خان متقي تېره اوونۍ له ترکمنستان سره د ټاپي، ټاپ، نوري فایبر او اوسپنې پټلۍ د سترو پروژو د پرانیستي په تړاو د ناستې ګډونوالو ته هراړخیزه معلوماتي وینا وړاندې کړه. 

د بهرنیو چارو وزیر امیر خان متقي ویلي؛ د افغانستان په خاوره کې د سیمې د ټاپي نللیکې د عملي کار پیل په حقیقت کې له جګړې او سیالۍ څخه د پرمختګ او همکارۍ پر لور د بحث بدلون دی.

مولوي امیر خان متقي د افغانستان په خاوره کې د ټاپي نللیکې د غځولو په برخه کې د اسلامي امارت سیاسي اراده ټینګه وبلله او هیله یې څرګنده کړه، چې که ټاپي تر خپل منزل مقصود پورې ورسېږي؛ نو د پاکستان او هندوستان پر ولسونو سربېره به نور ولسونه هم ترې ګټه واخلي.

د بهرنیو چارو وزیر له ګډونوالو وغوښتل، چې د خپلو هېوادونو او ولسونو د هوساینې او پرمختګ لپاره باید د منفي سیالیو، امنیتي او صفر مجموعې له زاویو د تعامل پر ځای د ګټې-ګټې له مثبتې زاویې مسایلو ته وګوري.

امیر خان متقي زیاته کړې؛ اوس د نړۍ ګڼ هېوادونه دې پایلې ته رسېدلي، چې د ژیوپولیتیک لیدلوري پر ځای کولی شي مسایلو ته له ژیوایکانومیکي زاویې وګوري او په پای کې ټول ګټونکي واوسي.

د بهرنیو چارو وزارت چارسمبالي هیله وښوده، چې د سترو اقتصادي پروژو له پرانیستې سره به په سیمه کې داسې ستر مثبت اقتصادي بدلون رامنځته شي، چې د ټولو لوریو اقتصادونه به ورسره وغوړېږي.

ویل کیږي، چې په دې ناسته کې د ترکمنستان سفیر خوجه عوضوف هم وینا وکړه او د افغانستان او ترکمنستان ترمنځ یې د سترو پروژو پرانیسته د دواړو هېوادونو په اړیکو کې د نوي څپرکي پیل وباله.