Connect with us

تازه خبرونه

د م.م پراختیايي پروګرام د هرات له زلزله ځپلیو سره د ۲۵ میلیون دالرو مرستې غوښتنه وکړه

خپور شوی

د

(Last Updated On: لړم ۱۰, ۱۴۰۲)

په هرات ولایت کې له ویجاړونکې زلزلې وروسته د ملګرو ملتونو پراختیایي پروګرام د سې شنبې پر ورځ د بیارغونې د پلان د کلیدي برخو د ملاتړ لپاره د ۲۵ میلیون دالرو بېړنۍ مرستې غوښتنه وکړه.

دغه بنسټ په یوه اعلامیه کې ویلي، چې دغې زلزلې یو اعشاریه ۶ میلیون کسان اغېزمن کړي او تر ۱۵۰۰ ډېر یې وژلي، ۱۱۰۰۰ نور یې ټپیان کړي او له ۲۱۰۰۰ ډېرو کورونو او بنسټونو ته یې پراخ زیان اړولی دی.

په دې خبرپاڼه کې راغلي، چې ژوندي پاتې شوي کسان، چې ډېري یې ښځې او ماشومان دي؛ په خیمو کې ژوند کوي؛ له یخنۍ سره مخ دي، اوبه، روغتیايي پاملرنې، خوراکي توکو او مناسب سرپناه ته اړتیا لري.

د ملګرو ملتونو د پراختیايي پروګرام دا غوښتنه د هرات زلزلې ته د ځواب ویلو لپاره د لوی پلان یوه برخه ده، چې له ۱۱۴۰۰۰ خلکو سره د مرستې لپاره ۹۳ اعشاریه ۶ میلیون دالرو ته اړتیا لري.

په افغانستان کې د ملګرو ملتونو د پراختیايي پروګرام استازي ستیفن رودریګز ویلي: وضعیت له نږدې ناامیده دی او ژمی پر چټکۍ نږدې کېدو دی. زمونږ موخه دا ده، چې له دې ټولنو سره د بېخبناوو، په ځانګړي توګه د سرپناه په رغولو کې مرسته وکړو او ژر تر ژره بېرته عادي حالت ته راشي. مونږ ستاسې د پیل کولو لپاره زمونږ ځینې سرچینې بیا تنظیم کړې؛ ځکه دا سرچینې کافي نه‌دي.

د موقتي او دایمي سرپناه د برابرولو، د بېخبناوو د بیا رغولو، د کورنیو، ښوونځیو او روغتیايي مرکزونو لپاره د نوي کیدونکي انرژۍ د برابرولو، د اوبو د سیسټمونو او سرچینو بیارغونه او مدیریت او د کار او دندو د پیدا کولو لپاره ملګرو ملتونو پراختیايي پروګرام ته د ۲۵ میلیون دالرو غوښتنه د لنډمهاله او اوږدمهاله فرصتونو لپاره وړاندیز کوي.

رودریګز ویلي: په نړۍ کې د ډېرو نورو روانو بحرانونو په منځ کې افغانستان د نړۍ د پام په څنګ کې دی؛ دا هېواد مرستې ته اړتیا لري. دا ناورین له ډېرو نورو ناورینونو وروسته رامنځته شو. افغانستان له څلورو لسیزو جګړو ځپلی دی. دې زلزلې هغه ټولنې اغېزمنې کړي، چې پخوا یې په خورا بېېوزلۍ کې ژوند کاوه. په ټول هېواد کې له اته کسانو څخه درې یې خوراکي توکو ته لاس‌رسی نه‌لري. اوس مونږ د یو بل لوی ناورین شاهدان یوو.

هغه ټینګار وکړ: مونږ له نړیوالې ټولنې څخه غواړو، چې افغانستان او په ځانګړي توګه د هرات خلکو اړتیاوو ته، چې په دې وروستیو کې له دې ویجاړۍ سره مخ شوي، پاملرنه غواړي.

تازه خبرونه

نړۍ دې د دښمنۍ پاللو او بندیزونو پر ځای له افغانستان سره همکاري وکړي

Published

on

(Last Updated On: وری ۲۱, ۱۴۰۳)

د اسلامي امارت ویاند ويلي، چې د نړیوالې ټولنې هیڅ فشار ته به تسلیم نشي او د نړۍ لپاره غوره ده، چې د فشارونو او بندیزونو پر ځای له افغانستان سره همکاري وکړي.

د اسلامي امارت د واکمنۍ له دوه نیم کالو څخه ډېر وخت تېریږي او اوس هم نړیواله ټولنه پر اسلامي امارت فشار راوړي، چې د ټولګډونه حکومت په جوړولو کې پاتې راغلي او له بشري حقونو او په ځانګړي توګه د نجونو او میرمنو له حقونو څخه سرغړونې کوي.

اسلامي امارت وايي، چې هیڅکله به د نړۍ فشارونو ته تسلیم نشي او د بندیزونو او فشارونو سیاست د افغانستان د ستونزې په حل کې مرسته نشي کولی، بلکې نړۍ باید د تعامل لاره خپله کړي.

د اسلامي امارت ویاند ذبیح الله مجاهد وايي: لکه څنګه، چې په تېرو شل کلونو کې فشارونو او بندیزونو په افغانستان کې مثبته نتیجه نده ورکړې؛ د تېرو ترخو تجربو تکرار هم د افغانستان د ستونزې په حل کې مرسته نشي کولی.

ربیح الله مجاهد زیاتوي؛ په څه له پاسه دوه نیمو کلونو کې ګڼو هېوادونو له اسلامي امارت سره ښې اړیکې او تعاملات پیل کړي دي.

د نوموړي د څرګندونو له مخې؛ ځينې لويديځ هېوادونه اوس هم د تېرو جګړو له کبله له اسلامي امارت سره دښمني پالي.

کارپوهان په دې باور دي، چې نړیواله ټولنه او اسلامي امارت باید د ټکر سیاست یوې خواته کړي او د افغانستان مسلې له ډیپلوماټیکو لارو حل کړي.

د دوی د څرګندونو له مخې؛ د هېواد اوسنیو حالاتو ته پر کتو اسلامي امارت ته لازمه ده، چې له ملي ګټو او اسلامي ارزښتونو سره سم له نړیوالې ټولنې سره په خپله تګلاره کې نرم دریځ غوره کړي.

دا په داسې حال کې ده، چې په تېرو دوه نیمو کلونو کې هیڅ هېواد اسلامي امارت پر رسمیت ندی پېژندلی او نړیوالې ټولنې هم خبرداری ورکړی، چې که اسلامي امارت پخپلو سختو سیاستونو له سره غور ونکړي؛ پر رسمیت به یې ونه‌پېژني.

اسلامي امارت تل ټینګار کړی، چې د مشروع حکومت ټول شرطونه لري؛ خو نړۍ د اسلامي امارت په وړاندې دښمنانه دریځ خپل کړی دی.

Continue Reading

تازه خبرونه

د افغانستان لپاره د ځانګړي استازي پر ټاکلو بحثونه روان دي – م.م

Published

on

(Last Updated On: وری ۲۱, ۱۴۰۳)

د ملګرو ملتونو ویاند ويلي، چې د افغانستان په چارو کې د دې ټولنې د ځانګړي استازي په اړه خبرې اوس هم روانې دي.

د ملګرو ملتونو ویاند سټیفن دوجاریک د دوشنبې پر ورځ په یو خبري کنفرانس کې څرګنده کړې: دا بهیر روان دی. هرڅومره ژر، چې مونږ د عامه پوهاوي لپاره نوي معلومات ترلاسه کړو؛ نو هیله من یم، چې تاسې ته به یې وړاندې کړم.

د تېر کال په ډسمبر میاشت کې د ملګرو ملتونو امنیت شورا د افغانستان لپاره د ځانګړي استازي د ټاکلو غوښتنه وکړه؛ روسیې او چین دې پرېکړه لیک ته ممتنع رای ورکړه او اسلامي امارت هم د امنیت شورا د ځانګړي استازي د ټاکلو پر پرېکړه نیوکه وکړه.

اسلامي امارت په دې باور دی، چې د ملګرو ملتونو د ځانګړي ماموریت (یوناما) په موجودیت کې د افغانستان لپاره د بل استازي ګمارل نا اړین دي؛ ځکه، چې دا هېواد په جګړه کې ندی او اوس د مرکزي حکومت له حاکمیته برخمن هېواد دی.

د راپورونو له مخې؛ د ملګرو ملتونو د ځانګړي استازي دنده به دا وي، چې سیاسي هوکړې ته د رسېدو لپاره بین الافغاني ( خپلمنځي ) خبرې پیل کړي.

د جاپان ټایمز ورځپاڼې د یوې خپرې شوې مقالې له مخې؛ د افغانستان لپاره د ملګرو ملتونو د ځانګړي استازي د څوکۍ لپاره درې نوماندان وړاندیز شوي: تادامیچي یاماموتو؛ جاپانی ډیپلوماټ، چې له ۲۰۱۶ څخه تر ۲۰۲۰ ز. کال پورې د افغانستان لپاره د ملګرو ملتونو د عمومي منشي ځانګړی استازی و؛ په افغانستان کې د بریټانیا پخوانی سفیر نیکولاس کي او په کابل کې د ترکیې پخوانی سفیر جهاد ارګنای.

Continue Reading

تازه خبرونه

چین واخان سړک ته په نغوته کې افغانستان ته د همکارۍ ډاډ څرګند کړ

Published

on

(Last Updated On: وری ۲۱, ۱۴۰۳)

د کلیو د بیارغونې او پراختیا وزارت چارسمبالي محمد یونس اخوندزاده په کابل کې د چین له سفیر ژاو شینګ سره وکتل.

په دې کتنه کې د چین سفیر د چین تر پولې پورې د واخان سړک جوړولو ته په نغوته ( اشاره ) کې څرګنده کړه؛ هېواد یې له افغانستان سره د پراختیایي او بنسټیزو پروژو د تطبیق او پراختیا لپاره خپلې همکارۍ روانې ساتي.

دغه راز محمد یونس اخوندزاده له اسلامي امارت سره د چین د سیاسي او اقتصادي همکاریو د ستاینې ترڅنګ ویلي، چې د واخان – چین سرحدي سړک لومړني کارونه چټک روان دي او په نږدې راتلونکي کې به بشپړ شي.

ویل کیږي، چې د دغه سړک بنسټیزه جوړېدا نه یوازې د دواړو هېوادونو د اقتصادي ودې لپاره اړینه ده، بلکې د منځنۍ آسیا هېوادونو ته به هم ګټه ورسوي.

Continue Reading

Trending

Copyright © 2022 Ariana News. All rights reserved!