د آسیایي لوبو شلم پړاو د شنبې پر ورځ د جاپان په ناګویا ښار کې د پرانیستلو مراسمو پر ترسره کېدا پیل شو او د اوکټوبر تر څلورم به روان وي.

د پرانیستلو په مراسمو کې بېلابېل پروګرامونه ترسره شوي او د جاپان امپراتور ناروهيټو د ۴۵ هېوادونو او سیمو د لوبغاړو له تېرېدا وروسته د دې لوبو د پیل اعلان وکړ.

د آسیا د المپیک شورا مشر د پرانیستلو په مراسمو کې ویلي؛ د آسیا په لوبو کې ورزشکاران په داسې حال کې سیالۍ کوي، چې نړۍ له شخړو سره مخ ده او ښيي، چې سپورټ اوس هم د ملتونو ترمنځ د سولې، متقابلې همغږۍ او ملګرتیا لپاره ځواک کېدی شي.

د آسیا دا لوبې د توکیو له المپیک پېنځه کاله وروسته ترسره کېږي؛ هغه لوبې، چې د کووېډ-۱۹ د محدودیتونو له کبله پرته له نندارچیانو ترسره شوې وې.

په دې پړاو کې له ۱۱ زره ډېر لوبغاړي د آسیا له ۴۵ هېوادونو څخه ګډون لري او په ۴۱ سپورټي څانګو کې به له یو بل سره لوبې وکړي.

په دغو لوبو کې د افغانستان اته سپورټي ډلې د ۳۴ لوبغاړو په ګډون حضور لري.

ټاکل کیږي، چې نن څلور افغان لوبغاړي؛ محمد جعفر سلطاني، شهزاده ساپی، محمد خالد هوتک او حامد اشرفي د ووشو په برخه کې له خپلو سیالانو سره مخامخ شي.

عینو مېنه کندهار او عمر ځواک هرات د افغانستان اتلانو لیګ روشن د شپږم پړاو په دولسمه لوبه کې نن(‌شنبه) د افغانستان د فوټبال فډراسیون په لوبغالي کې سره مخ شول، چې لوبه یې ۱-۱ مساوي پای ته ورسېده.

عینو مېنې لوبه ښه پیل کړه او محمد یعقوب د لوبې په شپږمه دقیقه کې لومړی ګول وواهه او خپله لوبډله یې مخکې کړه.

دغه راز عمر ځواک هرات اته دقیقې وروسته ځواب ورکړ او نعمت‌الله کریمي په څوارلسمه دقیقه کې د عینو مېنې پر دروازې توپ وردننه کړ او لوبه یې مساوي کړه.

د لوبې په دوام کې دواړو لوبډلو د بریا ګول وهلو هڅې وکړې؛ خو په دوه‌یمه نیمایي کې رامنځته شوې هڅې پر ګول بدلې نه‌شوې او لوبه ۱-۱ مساوي پای ته ورسېده.

د عینو مېنه کندهار لوبډلې اهل‌الله درمان د دې لوبې غوره لوبغاړی وټاکل شو.

عینو مېنه کندهار به په راتلونکې لوبه کې له سرسبز یاشلر فاریاب سره لوبه کوي او عمر ځواک هرات به له آرمان اف‌سي سره مخ شي.

د افغانستان اتلانو لیګ روشن د شپږم پړاو لوبې پر ژوندۍ بڼه له آریانا ټلوېزیون څخه خپرېږي.

د افغانستان اتلانو لیګ روشن د شپږم پړاو سیالیو په لړ کې آریانا خوست طوفان هرات ته ۲- ۰ ماتې ورکړه او د عینو مېنه کندهار او خراسان فاریاب لوبه ۱-۱ مساوي پای ته ورسېده.

آریانا خوست او طوفان هرات د دې سیالیو په اتمه لوبه کې د چارشنبې پر ورځ په کابل کې مخامخ شول.

دواړو لوبډلو په لومړۍ نیمایي کې ګول ونه‌واهه؛ خو په دوه‌یمه نیمایي کې جواد الکوزي په اتیاامه دقیقه کې آریانا خوست توپ د طوفان هرات دروازې ته وردننه کړ.

وارث شېرزي هم په اضافي وخت کې د آریانا خوست دوه‌یم ګول وواهه او دې لوبډلې د ۲ ګولونو پر توپیر لوبه وګټله.

د آریانا خوست لوبغاړی جواد الکوزي د لوبې غوره لوبغاړی وټاکل شو.

په نهمه لوبه کې عینو مېنه کندهار له خراسان فاریاب سره مخامخ شوه، چې لوبه ۱-۱ مساوي پای ته ورسېده.

سمیع یزداني په لومړۍ نیمایي کې د خراسان فاریاب لومړی ګول وواهه او سید روف د عینو مېنې کندهار لپاره ګول وواهه، چې لومړۍ نیمایي ۱-۱ مساوي پای ته ورسېده.

دواړو لوبډلو په دوه‌یمه نیمایي کې بل ګول ونه‌واهه او په پای کې یې امتیازات سره ووېشل.

د افغانستان اتلانو لیګ روشن د شپږم پړاو سیالۍ به د جمعې پر ورځ د دوه لوبو پر ترسره کېدا روانې وي؛ سرخ‌پوشان خوافي له آرمان اف‌سي او سرسبز یاشلر له استقلال کابل سره مخامخ کیږي.

د فوټبال مینه‌وال کولی شي دغه لوبې پر ژوندۍ بڼه له آریانا ټلویزیون څخه وګوري.