د رویټرز د راپور له مخې: د هند لومړي وزیر نریندرا مودي د دوشنبې پر ورځ له پاکستان سره د پوځي نښتو په اړه په خپلو لومړنیو څرګندونو کې ویلي؛ که پاکستان غواړي، چې “وژغورل شي” نو باید خپل “ترهګریز بنسټونه” له منځه یوسي.

دا نښتې له هغې وروسته پیل شوې، چې هند پر پاکستان بریدونه وکړل؛ له هغې دوه اوونۍ وروسته، چې د هند تر ادارې لاندې د کشمیر پر سیلانیانو برید وشو، چې په کې ۲۶ کسان ووژل شول.

نوي ډیلي ویلي، چې دا برید د اسلام‌آباد پر ملاتړ ترسره شوی و؛ خو پاکستان دا تور رد کړ.

د پاکستان تر واک لاندې کشمیر ته په نغوته(اشاره) کې مودي ویلي: “زه به نړیوالې ټولنې ته هم دا ووایم، که له پاکستان سره خبرې کوو؛ نو دا به یوازې د ترهګرۍ… او د پاکستان تر واک لاندې کشمیر په اړه به وي.”

نریندرا مودي په یوه ټلویزیوني وینا کې پر هندي ژبه وویل: “که په هند کې ترهګریز برید وشي؛ نو مناسب ځواب به ورکړ شي ….”

هغه وایي: “د هند دریځ روښانه دی؛ ترهګري او خبرې اترې یوځای نشي کیدی؛ ترهګري او سوداګري یوځای نشي کیدی او اوبه او وینه یوځای نشي بهېدلی”.

هغه د دواړو هیوادونو ترمنځ د اوبو د شریکولو تړون ته پر نغوته وویل، چې نوي ډیلي وځنډاوه.

اسلام‌آباد دمګړۍ د هغه د څرګندونو په اړه څه ویلي ندي.

د هند او پاکستان ترمنځ نښتې له هغې وروسته ودرول شوې، چې دواړو هېوادونو د شنبې پر ورځ د ډونالډ ټرمپ پر منځګړیتوب اوربند ته غاړه کېښوده.

د هند هوايي ځواک د یکشنبې پر ورځ له جزئیاتو پراته ویلي، چې “زیانونه د جګړې یوه برخه ده” خو د دې پوښتنې په ځواب کې، چې آیا هوایي ځواک ته زیان رسیدلی دی؛ زیاته کړې: ټول پیلوټان ​​یې په روانه اوونۍ کې له پاکستان سره له جګړې وروسته بېرته خپل کور ته راستانه شوي دي.

د پاکستان د پوځ یوه ویاند د چارشنبې پر ورځ رویټرز ته ویلي، چې پېنځه هندي الوتکې ویشتل شوي؛ خو دا ادعا د هند لخوا تائید شوې نده.

همدارنګه د چارشنبې پر ورځ د هند په کشمیر کې څلورو حکومتي سرچینو رویټرز ته ویلي، چې درې جنګي الوتکې په فډرالي خاوره کې راوغورځېدې؛ دا څو ساعته له هغې وروسته، چې هند وویل: د پولې هاخوا یې د پاکستان نهه “ترهګریز بنسټونه” پر نښه کړي دي.

د یکشنبې پر ورځ د هند او پاکستان ترمنځ اوربند ټینګ شوی؛ دا څو ساعته له هغې وروسته، چې اټومي وسلوالو سیالانو یو بل له اوربند څخه پر سرغړونې تورن کړل.

اوربند د شنبې پر ورځ د څلور ورځو توغندیو، ډرونونو او توپخانې له بریدونو وروسته، چې په کې لږ تر لږه ۶۰ کسان ووژل او زرګونه نور یې تېښتې ته اړ کړل. دا په ۱۹۹۹ کې د هند او پاکستان د وروستۍ ښکاره شخړې راپدېخوا تر ټولو ناوړه تاوتریخوالی و.

د روسیې ولسمشر ولادمیر پوتین یو میاشتې اوږده اوربند وړاندیز ته له پاملرنې پرته له اوکراین سره د مستقیمو خبرو اترو وړاندیز کړی دی.

پوتین نن سهار یوه رسنیز کنفرانس ته د سولې د هغو خبرو اترو د بیا پیل غوښتنه وړاندې کړه، چې د ۲۰۲۲ کال په اپریل کې د دواړو هېوادونو ترمنځ پیل شوې وې.

دا خبرې اترې پر اوکراین د روسیې د یرغل له پیل څخه څو اوونۍ وروسته پیل شوې وې.

پوتین ویلي: “مونږ جدي خبرو اترو ته ژمن یوو. د خبرو اترو موخه د دې بحران د اصلي لاملونو له منځه وړل او د تاریخي حقایقو په پام کې نیولو سره د تلپاتې سولې ټینګول دي. »

هغه دغه راز زیاته کړې، چې ډېر ژر به د ترکیې له ولسمشر رجب طیب اردوغان سره په استانبول کې د خبرو اترو د منځګړیتوب لپاره ګډ کار وکړي.

د اوکراین ولسمشر ولادیمیر زیلینسکي دفتر او د اوکراین د بهرنیو چارو وزارت سمدلاسه د رویټرز د وړاندیز په اړه نظر غوښتنې ته ځواب ونه وایه.

له اوکراین سره د مستقیمو خبرو اترو لپاره د پوتین وړاندیز له هغې څو ساعته وروسته راپورته شو، چې د شنبې پر ورځ په کیف کې لویو اروپايي قدرتونو له پوتین څخه د ۳۰ ورځني غیر مشروط اوربند د هوکړې غوښتنه وکړه او یادې نویو بندیزونو ته تینګ شي.

دا په داسې حال کې دهو چې د امریکا ولسمشر ډونالډ ټرمپ د روسیې د ولسمشر ولادمیر پوتین د هغه وړاندیز په اړه، چې په استانبول کې به له اوکراین سره مستقیمې خبرې اترې وکړي؛ ویلي: “دا د روسیې او اوکراین لپاره یوه ښه ورځ کېدای شي او دا ګام د دواړو هېوادونو ترمنځ د سولې د ترلاسه کولو لپاره یو ښه فرصت دی او د اوسني شخړې د حل پیل کېدای شي.”