د عامې روغتیا وزیر نورجلال جلالي ويلي، د اسلامي همکاریو ټولنې له پلاوي سره یې د افغانستان د روغتیايي نظام د اړتیاوو، د ساري ناروغیو د مخنیوي او د اسلامي هېوادونو ترمنځ د روغتیا په برخه کې د همغږۍ او همکاریو د پیاوړتیا په اړه خبرې کړې دي.

د عامې روغتیا وزارت د خپرې شوې خبرپاڼې له مخې، نورجلال جلالي د اسلامي همکاریو ټولنې د سرمنشي له مرستیال سفیر طارق علي بخیت او مل پلاوي سره په خپل کاري دفتر کې لیدلي دي.

په دې لیدنه کې جلالي د ولسوالیو پر کچه روغتونونو ته د اړینو تجهیزاتو د برابرولو، د روغتیايي کارکوونکو د ظرفیت لوړولو او د روغتیا په برخه کې له اسلامي هېوادونو سره د هوکړه‌لیکونو د لاسلیک لپاره د زمینې برابرولو غوښتنې او وړاندیزونه یاد پلاوي ته وړاندې کړي دي.

دغه راز نوموړي د سرطان او زړه ناروغیو د درملنې، روغتونونو ته د اړینو تجهیزاتو د برابرولو، د زړه پر سوري ناروغۍ د اخته ماشومانو د جراحي عملیاتو او په دې برخه کې د مالي ملاتړ په اړه خبرې کړې دي.

د اسلامي همکاریو ټولنې پلاوي په یادو برخو کې د پرله‌پسې همکارۍ ډاډ ورکړی او څرګندوي، چې هڅه به وکړي د روغتیا په برخو کې د هر اړخیزې همغږۍ او همکاریو زمینه برابره کړي.

د اسلامي همکاریو ټولنې د سرمنشي مرستیال سفیر طارق علي بخیت ویلي، چې د زړه له ستونزو سره د مخ یو شمېر ماشومانو د جراحي عملیاتو لګښتونه به پر غاړه واخلي.

د افغانستان بهرنیو چارو وزارت پر ریاض او د سعودي عربستان پر نورو هوايي ډګرونو د وروستیو بریدونو په اړه اندېښنه څرګنده کړې او په دغو بریدونو کې یې د ملکي وګړو وژل او ټپي کېدل خواشینوونکي بللي دي.

د دغه وزارت د ویاند عبدالقهار بلخي په خبرپاڼه کې راغلي، چې د ملکي وګړو پر ژوند او امنیت هر ډول برید د غندنې وړ دی.

په خبرپاڼه کې راغلي، چې د تاوتریخوالي زیاتوالی او د جګړې پراخېدل د ټولې سیمې امنیت او ثبات له ګواښ سره مخ کوي.

د بهرنیو چارو وزارت له ټولو ښکېلو لوریو غوښتي، چې له تاوتریخوالي ډډه وکړي، د کړکېچ د زیاتېدا مخه ونیسي او د ملکي وګړو د خوندیتوب لپاره اړینې هڅې وکړي.

دا په داسې حال کې ده، چې د سعودي عربستان د چارواکو د څرګندونو له مخې، د ریاض پر ملک خالد نړیوال هوايي ډګر په وروستي برید کې یو تن وژل شوی او ۱۲ نور ټپیان شوي دي.

#آریانانیوز#افغانستان #سعودي‌عربستان #بهرنیوچارووزارت

د کډوالو او راستنېدونکو چارو وزیر مولوي عبدالکبیر د افغانستان لپاره د اروپايي ټولنې له نوي استازي نیکولا بیلومو سره په لیدنه کې راستنېدونکو افغانانو ته د مرستو، د هغوی د بیا مېشتېدا او د ستونزو د بنسټیز حل لارو په اړه خبرې کړې دي.

د کډوالو او راستنېدونکو چارو وزارت د څرګندونو له مخې؛ نیکولا بیلومو د اسلامي امارت له لوري د میلیونونو افغانانو د راستنېدا بهیر ښه مدیریت ستایلی او څرګندوي، چې د شاوخوا اته میلیون کسانو راستنېدا ښايي ګڼې ستونزې او پېچلي حالتونه رامنځته کړي؛ خو اسلامي امارت د دغه بهیر په مدیریت کې بریالی پاتې شوی دی.

د اروپايي ټولنې نوي استازي ډاډ ورکړی، چې دغه ټولنه به له افغانانو سره خپلې بشري مرستې روانې ساتي.

نوموړي زیاته کړې، اروپايي ټولنه چمتو ده، چې د راستنېدونکو افغانانو د ستونزو د حل او د اغېزمنو کاري فرصتونو د برابرولو په برخه کې همکاري وکړي.

په دې لیدنه کې د راستنېدونکو او افغان کډوالو په اړه اروپايي ټولنې خپل وړاندیزونه هم وړاندې کړي دي.

د کډوالو او راستنېدونکو چارو وزیر مولوي عبدالکبیر د اروپايي ټولنې له استازي او مل پلاوي هرکلی کړی او د اړمنو کورنیو لپاره یې د نړیوالو بنسټونو له مرستو مننه کړې ده.

نوموړي نیکولا بیلومو ته د نوې دندې مبارکي ویلې او وایي، چې اسلامي امارت په افغانستان کې د اروپايي ټولنې له حضور ملاتړ کوي.

مولوي عبدالکبیر ویلي، چې اسلامي امارت د راستنېدونکو افغانانو د ستونزو پر دایمي حل تمرکز لري او تر اوسه یې د هغو د مېشتولو لپاره ۸۰ ښارګوټي په پام کې نیولي دي.

د نوموړي ویلي، د اړتیاوو له مخې د دغو ښارګوټو د جوړولو او پراختیا بهیر روان دی.

د کډوالو او راستنېدونکو چارو وزیر له اروپايي ټولنې غوښتي، چې د راستنېدونکو لپاره د ښارګوټو د جوړولو په برخه کې مرسته وکړي او زیاتوي؛ اسلامي امارت د بې‌سرپرسته راستنېدونکو او ښځو وضعیت ته ځانګړې پاملرنه کوي.