د ملګرو ملتونو د ماشومانو صندوق(یونیسف) د تازه بشري وضعیت په اړه راپور ښیي، چې د روان کال په جولای  کې د ۱۴ ولایتونو ناڅاپي سېلابونو د څه باندې زر کورنیو ژوند اغېزمن کړی دی.

د یونیسف د راپور له مخې، سېلابونو په ټوله کې ۱۱۶۸ کورنۍ زیانمنې کړې او ۱۱۶۴ کورونه یې ویجاړ یا زیانمن کړي دي.

راپور زیاتوي، د نورستان په مرکز پارون کې د سېلابونو له کبله ۲۳ کسان مړه شوي او د شاوخوا زر کورنیو د اوبو رسولو خدمتونه ګډوډ شوي دي.

یونیسف ویلي، چې د اساسي روغتیایي چوپړتیاوو د وړاندې کولو لپاره یې له ۲۳۹۳ ثابتو او ۱۶ ګرځنده روغتیایي مرکزونو سره مرسته کړې او په ټول افغانستان کې یې د ناروغیو ۲۴۵ پېښو ته رسېدنه کړې ده.

د دې ادارې د څرګندونو له مخې؛ د جولای په میاشت کې شاوخوا ۱۸۳ زره له پېنځه کلونو کم عمره ماشومان د شري پر وړاندې واکسین شوي دي.

د اوبو، حفظ‌الصحې او روغتیا په برخه کې شاوخوا ۹۶ زره او ۳۰۰ کسانو د څښاک پاکو اوبو ته لاسرسی موندلی، له ۸۹ زره ډېرو کسانو له بنسټیزو حفظ‌الصحې خدمتونو ګټه اخیستې او ۱۸۰ زره او ۸۱۴ کسانو ته د اوبو او حفظ‌الصحې اړین توکي برابر شوي دي.

یونیسف او شریکانو یې په جولای کې شاوخوا ۱.۱ میلیون ماشومان د سختې خوارځواکۍ له پلوه هم کتلي، چې ۱۰۴ زره او ۶۰۲ ماشومان د خوارځواکۍ د درملنې لپاره بستر شوي دي.

د راپور له مخې، په همدمره وخت کې ۱۰.۳ میلیون له شپږ څخه تر ۵۹ میاشتو عمر لرونکو ماشومانو ته د ای ويټامین بشپړونکي درمل هم ورکړ شوي دي.

یونیسف ټینګار کړی، چې د بشري ننګونو له شتون سره – سره په افغانستان کې زیانمنو ماشومانو او کورنیو ته د روغتیا، تغذیې، اوبو او حفظ‌الصحې خدمتونو د رسولو هڅې روانې دي.

د پاکستان د لاهور سترې محکمې په یوه لنډمهاله حکم کې چارواکو ته امر کړی، چې د پنجاب ایالت له طبي پوهنځیو څخه د ۱۳ افغان زده‌کړیالانو له ایستلو ډډه وکړي.

دا پرېکړه قاضي خالد اسحاق د یو شمېر زده‌کړیالانو، چې صبیحه دفتاني او وحیده اسد رسول هم په کې دي؛ د عریضې له څېړلو وروسته صادره کړې ده.

دغو زده‌کړیالانو په خپله عریضه کې له طبي پوهنځیو څخه د دوی د ایستلو اړوند پرېکړې ننګولې دي.

په قضیه کې ویل شوي، چې افغان زدهکړیالان د پنجاب په بېلابېلو طبي پوهنځیو کې پر زده‌کړو بوخت دي او یو شمېر یې د طب د زده‌کړو په څلورمو او پېنځمو کلونو کې دي.

محکمې د پاکستان د روغتیايي علومو له پوهنتون، د پاکستان له طبي او غاښونو شورا او اړوند طبي پوهنځیو هم غوښتي، چې په راتلونکې غونډه کې د دغې قضیې په اړه خپل ځوابونه وړاندې کړي.

دا حکم په داسې وخت کې صادر شوی، چې د پاکستان د افغان طبي زده‌کړیالانو برخلیک له نامعلوم حالت سره مخ دی. تېره میاشت هم د لاهور سترې محکمې افغانستان ته د افغان طبي زده‌کړیالانو د ستنولو د پرېکړې پلي کېدا ځنډولې وه.

د نوي حکم له مخې، دغه ۱۳ افغان زدهکړیالان به د قضیې له  څېړنې او د اړوند چارواکو د ځوابونو ترلاسه کېدا پورې له طبي پوهنځیو څخه له ایستل کېدا خوندي وي.

د افغانستان بهرنیو چارو وزیر امیرخان متقي د قرغزستان بهرنیو چارو له وزیر ژینبېک کولوبایف سره ټیلیفوني خبرې کړې دي.

د قرغزستان بهرنیو چارو وزارت د بهرنیو چارو وزارت د خبرپاڼې له مخې؛ د سپټمبر پر څوارلسمه په دې ټیلیفوني خبرو کې دواړو لوریو د افغانستان او قرغزستان ترمنځ د عملي همکاریو پر روانو چارو خبرې وکړې.

دواړو لوریو د سوداګرۍ، اقتصادي او پانګیزو همکاریو پر  پراختیا ځانګړې پاملرنه کړې ده.

په خبرپاڼه کې راغلي؛ په دې خبرو کې افغان لوري قرغزستان ته د شانګهای همکاریو ټولنې د سرمشریزې او شپږمو نړیوالو کوچي لوبو د بریالي تنظیم او همدارنګه د ملګرو ملتونو په امنیت شورا کې د غیر دایمي غړي په توګه د دغه هېواد د ټاکل کېدا له کبله مبارکي ویلې ده.