په ۲۰۲۶ فوټبال نړیوال جام کې د سرو کارتونو شمېر بې‌ساری زیات شو؛ ځکه د دې پړاو لوبڅاران قوانین کلک پلي کوي.

د سیالیو له ۲۷ لوبو وروسته لوبڅارانو ۱۲ مستقیم سره کارتونه ورکړي، چې دا شمېر د قطر ۲۰۲۲ او روسیه ۲۰۱۸ د نړیوالو جامونو د ټولو سرو کارتونو له مجموعې هم زیات دی. په دغو دواړو نړیوالو جامونو کې ټولټال اته سره کارتونه ورکړ شوي وه.

په سیالیو کې د لوبغاړو د شړلو شمېر د آلمان ۲۰۰۶ نړیوال جام د ۲۸ سرو کارتونو ریکارډ ته نږدې کېږي.

د فیفا پخواني لوبڅار او د «فاکس سپورټ» د قوانینو شنونکي مارک کلاټنبرګ ویلي؛ د سرو کارتونو د زیاتوالي لامل د لوبغاړو هغه ناسمې پرېکړې دي، چې د جزا ساحې دننه او شاوخوا یې د فشار پر مهال ترسره کوي.

هغه زیاته کړې:« د لوبغاړو چلند کومه ځانګړې ستونزه نه‌لري؛ خو تر فشار لاندې ناسمې پرېکړې کوي. له بلې‌خوا، د لوبډلو په نوملړ کې د ۲۶ لوبغاړو له شاملېدا سره ځینې مدافعان آسانه تاکتیکي خطاوې کوي؛ ځکه پوهېږي، چې پر څوکیو ناست نور بدیلونه هم لري.»

په دې نړیوال جام کې یو شمېر سرو کارتونو د لوبو پر پایلو هم مستقیم اغېز کړی دی. د امریکا د ملي لوبډلې بریدګر فولارین بالوګون د بوسنیا او هرزګوینا پر وړاندې هم ګول وواهه او هم له لوبې وشړل شو. دا پېښه د ۲۰۰۶ نړیوال جام تر پایلوبې، چې زین‌الدین زیدان په کې شړل شوی و؛ د لومړي ځل لپاره په حذفي پړاو کې تکرار شوې ده.

د پاراګوای میګل آلمیرون، د اکواډور پیرو اینکاپیه او د یوروګوای اګوسټین کانوبیو هم هغه لوبغاړي وه، چې د ویډیويي مرستیال لوبڅار (VAR) له ارزونې وروسته یا د ناسپورټي چلند له کبله سره کارتونه ورکړ شول.

د سویلي افریقا او مکسیکو د پرانیستونکې لوبې پر مهال هم درې لوبغاړي وشړل شول. د سویلي افریقا هافبک تمبا زوانه، چې فیفا یې حرکت تاوتریخجن وباله؛ د سور کارت ترڅنګ د درېیو لوبو بندیز هم ترلاسه کړ.

د عراق مدافع ربین سولاکا هم د سینیګال پر وړاندې د ګول د یوه څرګند فرصت د مخنیوي له کبله د نړیوال جام د تاریخ له چټکو سره کارتونو څخه یو ترلاسه کړ. همدارنګه د بلجیم مدافع ناټان انګوي د ایران پر بریدګر مهدي طارمي د خطرناک ټکر له کبله له لوبې وشړل شو.

د سرو کارتونو زیاتوالي د سیالیو پر بهیر څرګند اغېز کړی او ګڼې لوبډلې یې اړ کړي، چې د لوبې یوه برخه پر یوه لوبغاړي ترسره کړي؛ داسې څه، چې د څو لوبو پر پایلو یې هم مستقیم اغېز کړی دی.

په وروستیو نړیوالو جامونو کې د سرو کارتونو شمېر:

۲۰۲۶: ۱۲ سره کارتونه (ټول مستقیم)

۲۰۲۲: ۴ سره کارتونه (یو مستقیم)

۲۰۱۸: ۴ سره کارتونه (دوه مستقیم)

۲۰۱۴: ۱۰ سره کارتونه (اووه مستقیم)

۲۰۱۰: ۱۷ سره کارتونه (۹ مستقیم)

۲۰۰۶: ۲۸ سره کارتونه (۹ مستقیم)

لېونل مسي یو ځل بیا په ۲۰۲۶ فوټبال نړیوال جام سیالیو کې غوره وځلېد او پخپل شپږم ګول یې ارجنټاین د اردن پر وړاندې ۳ ـ ۱ نه یوازې بریا ته ورساوه، بلکې لوبډله له ډله‌ییز پړاو هم بریالۍ ووتله.

سره له دې، چې د ارجنټاین د بل پړاو لوبېدل مخکې له مخکې یقیني شوي وه؛ د دې لوبډلې روزونکي لېونل سکلوني په لومړني ترکیب کې پراخ بدلونونه راوستل او ۹ نوي لوبغاړي یې ولوبول. مسي لوبه له احتیاطي څوکۍ پیل کړه؛ خو په دوه‌یمه نیمایي کې میدان ته کښته شو او د ښکلي آزاد ګوزار پر مټ یې د خپلې لوبډلې درېیم ګول وواهه.

ارجنټاین د مسي لوبې ته له داخلېدو مخکې هم پر لوبه بشپړ برلاسی و. جیوواني لو سیلسو په نولسمه دقیقه کې د آزاد ګوزار له لارې لومړی ګول وکړ او ورپسې لاوټارو مارټینز د ویډیويي مرستندویه پرېکړې (VAR) له تائید وروسته د پنالټۍ دوه‌یم ګول هم وواهه.

اردن د دوه‌یمې نیمایي په پیل کې د موسی التماري پر ګول یو ګول بېرته جبران کړ؛ خو ارجنټاین بیا هم پر لوبه واکمن پاتې شو او مسي د لوبې په وروستیو لس دقیقو کې پخپل ګول د خپلې لوبډلې بریا نوره هم پیاوړې کړه.

له دې بریا سره ارجنټاین له درې لوبو د بشپړو ۹ امتیازونو پخپلولو د خپلې ډلې په سر کې ځای ونیو. مسي د ډله‌ییز پړاو په ټولو درې لوبو کې ګولونه وهلي او د غوره ګول‌وهونکي د نوماندانو له مخکښو لوبغاړو ګڼل کېږي.

ارجنټاین به د یو‌شپاړسم پړاو په سیالۍ کې له کېپ ورډ سره مخامخ شي؛ هغه لوبډله، چې له تمې پورته لوبو پر مټ یې د وروستیو ۳۲ لوبډلو پړاو ته لاره موندلې ده.

لیونل مسي د دوشنبې پر ورځ د اتریش پر وړاندې د ارجنټاین په ۲–۰ بریا کې دوه ګولونه ووهل او د نړیوال جام د تاریخ د تر ټولو ډېرو ګولونو ریکارډ یې جوړ کړ.

د ارجنټاین لوبډلمشر په دې حساسه لوبه کې دواړه ګولونه ووهل او خپل ټول ګولونه یې په نړیوال جام کې ۱۸ ته ورسول، چې له دې سره یې د جرمني د میروسلاو کلوزې د ۱۶ ګولونو ریکارډ مات کړ.

مسي، چې څو ورځې وروسته ۳۹ کلن کېږي. نوموړي سره له دې، چې د لوبې په پیل کې یې یوه پنالټي ضایع کړه؛ خو په مهمو شېبو کې یې ښه لوبه وکړه. د هغه کړنې ارجنټاین ته دا زمینه برابره کړه، چې د نړیوال جام په سیالیو کې خپل قوي پیل وساتي او د ۳۲ غوره لوبډلو پړاو ته ووځي.

مسي اته ځله د طلایي‌توپ ګټونکی پاتې شوی، په نړیوال جام کې یې په پرله‌پسې شپږو لوبو کې ګولونه وهلي او د دې پړاو د پېنځه ګولونو له لرلو سره د طلایي‌توپ د سیالۍ په مخکښو لوبغاړو کې دی.

د افغانستان فوټبال مینه‌وال کولی شي د نړیوال جام سیالۍ پر ژوندۍ بڼه د آریانا ټلویزیون له لارې وګوري.