د افغانستان کرکټ ملي لوبډلې په متحده عربي اماراتو کې د درې‌اړخیزو یو ورځنیو سیالیو په لړ کې بنګله‌دېش ته د اووه ویکټو پر توپیر ماتې ورکړه او پایلوبې ته یې لار ومونده. دا په نړیوالو یو ورځنیو سیالیو کې د بنګله‌دېش پر وړاندې د افغانستان پرله‌پسې پېنځمه بریا ده.

افغانستان د ۱۶۱ منډو هدف د درې لوبغاړو پر سوځېدا او په ۳۵.۳آورونو کې پوره کړ. د لوبډلې لوبډلمشر رحمت شاه د ۶۷ منډو پر جوړولو په دې بریا کې مهم رول ولوباوه.

له دې مخکې د افغانستان توپ‌اچوونکو د لوبډلې د بریا زمینه برابره کړې وه.

راشد خان د بنګله‌دېش څلور لوبغاړي وسوځول او یمین احمدزي او عظمت‌الله عمرزي دوه ـ دوه ویکټې واخیستې.

بنګله‌دېش د ټولو لوبغاړو پ سوځېدا ۱۶۰ منډې جوړې کړې.

بنګله‌دېش کمزوری پیل درلود او په لومړیو اووه آورونو کې یې د یوازې ۲۸ منډو په جوړولو څلور لوبغاړي له لاسه ورکړل.

یمین احمدزي تنزیډ حسن او سومیا سرکار په دوه پرله‌پسې توپونو وسوځول او عظمت‌الله عمرزي هم نجم‌الحسین شانټو او توحید هریډووی له ډګره بهر کړل.

له دې کمزوري پیل وروسته، پرویز حسین ایمان او سیف حسن د ۹۳ منډو ملګرتیا جوړه کړه او هڅه یې وکړه، چې د خپلې لوبډلې منډې زیاتې کړي.

ایمان په ۹۶ توپونو د پېنځه څلوریزو او دوه شپږیزو پر مرسته ۷۰ منډې جوړې کړې او د بنګله‌دېش تر ټولو ډېرې منډې جوړوونکی لوبغاړی شو؛ خو راشد خان یې ویکټه واخیسته. سیف حسن ۳۵ منډې جوړې کړې او محمد نبي وسوځاوه.

راشد خان وروسته د بنګله‌دېش د توپ‌وهونکو د وروستۍ برخې لوبغاړي یو پر بل پسې وسوځول او د څلور ویکټو پر اخیستو یې بنګله‌دېش يې په ۱۶۰ منډو کې ورداوه.

افغانستان هم د هدف د پوره کولو په پیل کې له ستونزو سره مخ شو؛ رحمان‌الله ګربز او صدیق‌الله اتل د تسکین احمد پر توپ‌اچونه وسوځېدل، خو ابراهیم ځدراڼ او رحمت شاه د درېیمې ویکټې لپاره د ۵۶ منډو ملګرتیا جوړه کړه او د لوبې بهیر یې د افغانستان پر ګټه بدل کړ. ځدراڼ د مستفیض‌الرحمان له‌خوا له سوځېدا مخکې ۳۴ منډې جوړې کړې وې.

وروسته رحمت شاه او حشمت‌الله شهیدي د ۶۶ منډو ملګرتیا جوړه کړه او افغانستان یې بریا ته ورساوه. شهیدي پر ۵۴ توپونو ۳۶ منډې او رحمت شاه پر ۹۰ توپونو د پېنځه څلوریزو پر مرسته ۶۷ منډې جوړې کړې او تر پایه ونه‌سوځېدل.

له دې بریا سره افغانستان د جمعې پر ورځ د زیمبابوې پر وړاندې پایلوبې ته لار ومونده او بنګله‌دېش له درې‌اړخیزو سیالیو بهر شو.

افغانستان د متحده عربي اماراتو د یو ورځنیو لوبو د درې‌اړخیزې سیالۍ په لړ کې د صدیق‌الله اتل د سلیزې او د راشد خان د څلور ویکټو پر مټ زمبابوې ته د ۱۵۸ منډو پر توپیر ماتې ورکړه.

افغان لوبډلې لومړی توپوهنه وکړه او د ټولو لوبغاړو پر سوځېدا یې ۲۹۴ منډې جوړې کړې.

صدیق‌الله اتل ۱۰۲ او ابراهیم ځدراڼ ۹۰ منډې وکړې.

دغو دوه لوبغاړو د دوه‌یمې ویکټې لپاره د ۱۴۰ منډو ملګرتیا جوړه کړه او افغانستان یې په پیاوړي دریځ کې ودراوه؛ خو د لوبډلې وروستي شپږ لوبغاړي یوازې د ۳۵ منډو پر جوړولو وسوځېدل.

زمبابوی لوبډله د هدف پوره کولو لپاره ښه ونه‌ځلېده او په ۳۸.۴آورونو کې یې د ټولو لوبغاړو پر سوځېدا یوازې ۱۳۶ منډې جوړې کړې.

راشد خان د افغانستان په توپ‌اچونه کې وځلېد او د ۱۷ منډو په بدل کې یې څلور ویکټې واخیستې.

رایان برل ۳۱ او سکندر رضا ۴۸ منډې وکړې. دا دواړه د زمبابوې له هغو مهمو لوبغاړو څخه ول، چې لوبډلې ته یې ۷۹ منډې جوړې کړې؛ خو وسوځېدل.

فضل‌الحق فاروقي او عظمت‌الله عمرزي هم په لومړیو کې ویکټې واخیستې او زمبابوې یې د ۴۳ منډو پر جوړولو د څلور لوبغاړو له سوځېدا سره مخ کړه.

افغان توپ‌اچوونکو تر پایه پر سیالې لوبډلې فشار وساته او د هغو د منډو جوړولو مخه یې ونیوله.

د صدیق‌الله اتل ۱۰۲ منډې وکړې، چې دا یې په یو ورځنیو نړیوالو سیالیو کې درېیمه سلیزه وه؛ خو ابراهیم ځدراڼ خپلې سلیزې ته ونه‌رسېد او پر ۹۰ منډو وسوځېد.

له دې بریا سره افغانستان د درې‌اړخیزې سیالۍ پایلوبې ته د لار موندلو په سیالۍ کې پاتې شو.

د افغانستان او زمبابوې لوبډلې هره یوه دوه نومرې لري. د چارشنبې پر ورځ به له بنګله‌دېش سره د افغانستان وروستۍ ډله‌ییزه لوبه پایلوبې ته د پاتې لارموندونکي لوبډلې برخلیک روښانه کړي.