د بریټانیا دفاع وزارت داسې اسناد موندلي، چې ښيي د دغه هېواد پوځي ځواکونه ښايي په افغانستان کې پر «دراندو جرمونو»؛ لکه وژنو او د سختو بدني زیانونو تورن شي. دا موضوع په لندن کې د بریټانیا په عالي محکمه کې وړاندې شوې ده.

په محکمه کې د وړاندې شویو څرګندونو له مخې؛ د دغو ادعاوو په اړه څېړنې تر هغې ځنډول شوې دي، چې د «افغانستان د څېړنې» پر نوم د پراخو څېړنو پایلې څرګندې شي.

په دغو څېړنو کې د ۲۰۱۰ او ۲۰۱۳زېږدیزو کلونو ترمنځ د بریټانیا د ځانګړو ځواکونو له‌خوا د افغانانو د ناقانونه وژنو ادعاوې او له هغې وروسته د دغو پېښو د پټولو ادعاوې څېړل کیږي.

دغه قضیه د بریټانیا د شاهي پوځي پولیسو له‌خوا د ترسره شویو څېړنو د ناکافي‌والي ادعاوې هم څېړي.

د محکمې وروستۍ غونډه د یوه لوړپوړي بریټانوي سرتېري له قضیې سره تړاو لري، چې د «IIA126 شاهد» په مستعار نوم پېژندل کیږي. نوموړي د څېړنیزې کمیټې له هغې پرېکړې سره مخالفت کړی، چې ده او د ده وکیلانو ته یې ځینو شواهدو ته لاسرسی محدود کړی دی.

د دغه سرتېري مشر وکیل کیټ ګرینج استدلال کړی، چې دغه محدودیتونه د هغه موکل ته د هغو شواهدو د کتلو مخه نیسي، چې د یوه کس د سر پر ډزو د ویشتلو له ادعا سره تړاو لري. د ادعا له مخې، دغه کس ښايي د ډزو پر مهال ویده و او پېښه د یوه «قصدي نیولو عملیات» پر مهال شوې ده.

د څېړنې کمیټې له دې حقوقي غوښتنې سره مخالفت کړی او څرګندوي، چې دغه محدودیتونه د هغو شاهدانو د هویت خوندي کولو لپاره اړین دي، چې شواهد یې ډېر حساس بلل کیږي.

د څېړنې کمیټې وکیل جاناټان ګلاسون محکمې ته ویلي: د داسې اسنادو موندل، چې د دراندو جرمونو د احتمالي ترسره کېدا نغوته کوي؛ دا معنا نه لري، چې حتماً به کوم مشخص کس له جنایي تور سره مخ شي.

د دغو ادعاوو په اړه څېړنې روانې دي او تمه ده، چې محکمه به د وروستۍ حقوقي دعوې په اړه خپله لیکلې پرېکړه په بل وخت کې صادره کړي.

د اسلامي امارت د کرنې، اوبولګولو او مالدارۍ وزیر عطاءالله عمري د ازبکستان د کرنې وزارت پر بلنه تاشکند ته تللی دی.

ټاکل شوې، نوموړی د وچې په منځ کې د پرتو هېوادونو، خوړو خوندیتوب او دوامدارې پراختیا موخو د تخنیکي نړیوال فورم په غونډه کې ګډون وکړي، چې د اوکټوبر له اوومې څخه تر اتمې به جوړه شي.

د افغانستان د کرنې وزارت ویلي، د دې سفر پر مهال به له ازبکستان سره د کرنې، اوبولګولو، مالدارۍ، سوداګرۍ او پانګونې په برخو کې د دوه‌اړخیزو او سیمه‌ییزو همکاریو پر پراختیا هم خبرې وشي.

همداراز، افغان پلاوی به د ګډون کوونکو هېوادونو له چارواکو او استازو سره د کرنیزو محصولاتو د سوداګرۍ پراختیا، صادراتو، د پانګونې راجلبولو او د مسلکي پوهې او تجربو د لېږد په اړه هم خبرې وکړي.

د روسیې بهرنیو چارو وزیر سرګې لاوروف ویلي، د افغانستان او پاکستان ترمنځ پر وروستیو ترینګلتیاوو سربېره دواړه هېوادونه د خپلو اړیکو عادي کول غواړي.

لاوروف د سې‌شنبې پر ورځ په مسکو کې یوې خبري غونډې ته ویلي، د کابل او اسلام‌آباد ترمنځ اختلافاتو د افغانستان په اړه د مسکو فارمټ پر وروستۍ غونډه هم اغېز کړی او دواړه لوري ونه‌توانېدل، چې د وروستۍ ګډې خبرپانې پر سر هوکړې ته ورسېږي.

هغه دغه وضعیت« ناخوښ» وباله؛ خو څرګندوي، چې باید موضوع له خپلې کچې لوړه ونه‌ښودل شي.

د روسیې بهرنیو چارو وزیر په افغانستان او پاکستان کې د داعش ډلې فعالیتونو ته د نغوتې پر وخت وویل، دغه ډله په دواړو هېوادونو کې بریدونه کوي؛ کابل او اسلام‌آباد له ستونزو سره مخ کوي.

لاوروف زیاته کړې:« هیڅ شک نه‌لرم، چې افغانستان او پاکستان دواړه د خپلو اړیکو عادي کول غواړي.»

هغه ویلي، روسیه به د دواړو هېوادونو ترمنځ د شته ستونزو د اواري لپاره خپلې هڅې روانې وساتي.

لاوروف ټینګار کړی، چې له سیمې بهر هېوادونه باید د دې سیمې په چارو کې له لاسوهنې لاس واخلي.

هغه څرګندوي؛ افغانستان او د سیمې هېوادونه اوس هم د« لویدیځو هېوادونو د تاوتریخجنې لاسوهنې» له پایلو سره مخ دي او همدا موضوع په سیمه کې د اوسنیو ستونزو د رامنځته کېدو یو عامل دی.