د اسلامي امارت مالیې وزارت په افغانستان کې د انجوګانو او موسساتو په اړه د سیګار وروستی راپور له حقیقته لرې ګڼي او رد یې کړ.

په هغې اعلاميه کې، چې پرون (يکشنبه د سلواغې ١٦) د دغه وزارت لخوا خپره شوې راغلي: د افغانستان لپاره د امريکا د ځانګړي تفتش دفتر سيګار د امريکا کانګرس ته په خپل درې مياشتني راپور کې ادعا کړې؛ د افغانستان اسلامي امارت له هغو ادارو او بنسټونو څخه، چې د بشري مرستو په برخه کې کار کوي؛ د جواز د فیس، مالیې او اداري فیسونو تر نامه لاندې پیسې ترلاسه کوي او افغانستان ته د عوایدو لویه برخه چمتو کوي.

د افغانستان اسلامي امارت د مالیې وزارت یاد راپور له حقیقته لرې ګڼي او هغه پوره ردوي.

په اعلاميه کې ويل شوي: ماليې وزارت هغه موسسې او انجوګانې، چې د بشري مرستو په برخه کې فعال دي؛ مالیه ورته بښلې.

د مالیې وزارت دغه راز زیاته کړې، چې د هېواد په ټولو ګمرکونو کې د دغو موسسو لخوا پر وارد شویو توکو ګمرکي تعرفه صفر ته رسېدلې او د یادو بنسټونو مالونه له مالیې پرته هېواد ته داخلېږي.

د دغه وزارت د معلوماتو له مخې، له بهرنيو موسسو او بنسټونو څخه يوازې د جواز پیسې اخيستل کېږي، چې هغه کمه اندازه ده او قانوني چوکات لري او له نورو هېوادونو سره انډول وي او د افغانستان پر ملي عايد هیڅ اغېز نکوي.

مالیې وزارت ډاډ ورکړی، چې د مالیې وزارت په ګډون د اسلامي امارت ټول ارګانونه د هغو ادارو او انجوګانو لپاره، چې د بشري مرستو په برخه کې فعالیت کوي اداري، مالي او امنیتي اسانتیاوې برابروي او په دې برخه کې خپلو ټولو ژمنو ته ژمن دي او د بشردوستانه مرستو په وېش او لیږلو کې دوی ورسره همکار دي.

پاکستانيو رسنیو خبر ورکړی، چې پاکستان او افغانستان د دوه ګونه مالیاتو د مخنیوي د کنوانسیون مسوده لاسلیک کړې ده.

د دی نيوز ورځپاڼې د څرګندونو له مخې؛ د پاکستان او افغانستان پلاويو په تېرو درې ورځو کې د دوه ګونه مالياتو د مخنيوي کنوانسيون په اړه د خبرو اترو د درېيم پړاو لپاره په اسلام‌آباد کې سره وکتل.

په دې غونډه کې د افغان پلاوي مشري د مالیې وزارت د عوایدو د عمومي ریاست د حقوقي او پالیسۍ خدمتونو رییس ندا محمد صدیقي کوله او د عوایدو د فدرالي بورد د نړیوالو مالیاتي فعالیتونو عمومي رییس ساجدالله صدیقي د پاکستاني لوري مشري کوله. دواړو پلاویو د ۲۰۲۱ ز. کال په دسمبر کې د اسلام‌آباد پر کوربتوب د خبرو اترو د دوه‌م پړاو پر پاتې ټولو مسلو بشپړې خبرې وکړې.

خبرې اترې په دوستانه فضا کې ترسره شوې اودواړو لوریو خپل نظریات وړاندې کړل. له بشپړو خبرو وروسته دواړو لوریو د افغانستان او پاکستان ترمنځ د دوه ګونه مالیاتو د مخنیوي لپاره د کنوانسیون پر مسودې هوکړه وکړه.

د غونډې په پای کې د پاکستان د عوایدو د فدرالي بورد رییس عاصم احمد پاکستان ته د افغان پلاوي د سفر له کبله مننه وکړه او هیله یې څرګنده کړه، چې د دوه ګونه مالیاتو د مخنیوي کنوانسیون به د دواړو هېوادونو ترمنځ اقتصادي اړیکې نورې هم پیاوړې کړي.

د افغانستان لپاره د پاکستان ځانګړي استازي محمد صادق د دغې طرحې لاسلیکول یو بل اړین ګام بللی دی.

محمد صادق تویت کړی: له دې پړاوه تېرېدو شاوخوا ۱۲ کاله ونیول. پانګوال، قراردادیان او د دواړو خواوو سوداګر به د پام وړ ګټه ترې پورته کړي.

د افغانستان د اوسپنې پټلۍ ریاست څرګنده کړې، چې د حیرتان – ازبکستان د ریلګاډي له لارې د مالونو لیږد رالېږد تر بلې خبرتیا پورې ځنډول شوی دی.

د افغانستان اسلامي امارت ویاند ذبیح الله مجاهد په ډاګه کړې، چې د حیرتان – ازبکستان د ریلګاډي پټلۍ په موقتي توګه تړل شوې ده.

هغه زیاته کړې، چې د افغانستان د ریلپټلۍ په تخنیکي او عملیاتي برخو کې کومه ستونزه نشته او د ازبکستان لخوا تړل شوې ده.

مجاهد د ریلګاډي پټلۍ تړل لنډمهاله ګڼي او له سوداګرو يې وغوښتل، چې صبر زغم ولري او د اړتيا وړ توکي د آقینې- اندخوى د ریلګاډي پټلۍ له لارې وارد کړي.

د افغانستان د ریلګاډي ادارې د حیرتان – ازبکستان د ریلپټلۍ د موقتي بندیدو د علت له بیانولو سره ویل چې دا اداره له تېرو درې میاشتو راپدیخوا د ریلپټلۍ د ټولو چارو د مدیریت په سپارلو بوخته ده او په راتلونکیو دوه ورځو کې به یو پلاوی افغانستان ته راواستوي. له افغانستان څخه به ازبکستان ته ولاړ شي، چې پدې اړه وروستی هوکړه لیک لاسلیک کړي.

د افغانستان د ریلپټلۍ ویاند زیاته کړې: د دغه هوکړه لیک له لاسلیکولو وروسته به د حیرتان- مزارشریف له لارې د ترانسپورت بهیر یو ځل بیا پیل شي او په عادي توګه به دوام وکړي.

د افغانستان د اوسپنې پټلۍ ادارې تېره میاشت اعلان وکړ، چې د افغان لوري او د ازبکستان د ریلګاډي د چارواکو تر منځ د خبرو اترو په پایله کې د حیرتان – مزار شریف د ریلګاډي د پټلۍ مسوولیت له ازبکستان څخه افغانستان ته سپارل شوی دی.

د افغانستان د اوسپنې پټلۍ ادارې په یوه خبرپاڼه کې څرګنده کړې، چې د دې هوکړه لیک له مخې به د حيرتان- مزارشريف د رېلپټلۍ د غزولو مسووليت، چې له تېرو يوولس کلونو راپدیخوا د سوګديانا ترانس نومي ازبکي شرکت لخوا پر مخ وړل کېده، چې د یوه منظم مهالوېش له مخې به د افغانستان اوسپنې پټلۍ ادارې ته ولېږدول شي.