تازه خبرونه
هالندي ځواکونه په افغانستان کې له یوه بریده ژوندي پاتې کسانو ته تاوان ورکوي
د هالند حکومت اعلان کړی، چې په افغانستان کې د هالندي ځواکونو لخوا د ۲۰ ملکي وګړیو د وژل کېدو په اړه به د محکمې د پرېکړې پر وړاندې استیناف غوښتنه ونکړي.
د اسوشیېتد پرس خبري آژانس د راپور له مخې؛ د هاګ ښار یوې سیمه ییزې محکمې د تېر کال په نومبر میاشت کې د هالند له حکومته وغوښتل، چې د روزګان ولایت په چوره ولسوالۍ کې د ۲۰۰۷ ز. کال له هوایي بریده ژوندي پاتې شویو کسانو ته تاوان ورکړي.
د هالند دفاع وزارت هغه مهال ادعا وکړه وه، چې د هوايي برید له کبله په نښه شوې ودانۍ کې د اسلامي امارت ځواکونه ول؛ خو محکمې په ډاګه کړې؛ د هالند پوځ دومره معلومات نلرل، چې دغه ځای پر نښه کړي.
د هالند دفاع وزیر کایسا اولونګرین د جمعې په ورځ د خپل هېواد د پارلمان غړیو ته په یوه لیک کې څرګنده کړې، چې له پېښې ۱۵ کاله تېر شوي او اوس د وضاحت لپاره ډېر اسناد نشته.
هغه وایي، چې دوی به د محکمې د پرېکړې په اړه استیناف غوښتنه ونکړي او د رامنځته شویو زیانونو تاوان به ورکړي.