د قطر بهرنیو چارو وزارت څرګنده کړی، چې د دغه هېواد چارواکو د جرمني له ډیپلوماټانو سره د افغانستان د وضعیت په اړه بحث او خبرې کړې دي.

د قطر بهرنیو چارو وزارت د یکشنبې د ورځې ( د تلې دوه‌ویشتمه) د خبرپاڼې له مخې؛ په دې کتنه کې د افغانستان پر وروستیو بدلونونو په ځانګړي توګه د دغه هېواد پر امنیتي وضعیت او بشري شرایطو خبرې وشوې.

د خبرپاڼې له مخې؛ د قطر بهرنیو چارو وزارت ځانګړي استازي فیصل بن عبدالله الحنزاب په قطر کې د جرمني له سفیر لوټر فریشلاډر او د آلمان د اړیکو د دفتر او د افغانستان لپاره د سفارت له چارسمبالي رالف ډیټیر راینهارډ سره وکتل.

په دې غونډه کې د افغانستان وروستي بدلونونه په ځانګړي توګه امنیتي، بشري، اقتصادي او سیاسي مسایل وارزول شول.

د هالینډ یوه چارواکي ویلي، هېواد یې له ازبکستان سره د هغو افغان کډوالو د ایستلو پر یوه تړون غور کوي، چې د پناه غوښتنې غوښتنلیکونه یې رد شوي دي.

هالینډي رسنۍ NL Times د یکشنبې پر ورځ ( د تلې دوه‌ویشتمه ) راپور ورکړ؛ د هالنډ حکومت په دې اړه څېړنه کوي: آیا کولی شي ازبکستان قانع کړي، چې رد شوي کډوال ومني که نه.

دغه راز ویل شوي؛ جرمني په دې وروستیو کې له ازبکستان سره هوکړې ته رسېدلی، چې دغه هېواد ته افغان کډوال ولېږي.

د دې رسنۍ د څرګندونو له مخې؛ د چارشنبې پر ورځ د هالینډ د پناه غوښتنې وزیر ماریولین فابر د دغه هېواد په پارلمان کې ویلي؛ کابینه په دې غور کوي، چې له ازبکستان سره څه ډول تړون وکړي. نوموړي په دې اړه جزئيات ورنکړل.

همدارنګه د ځینو سویسي رسنیو د راپورونو له مخې؛ دغه هېواد په دې وروستیو کې دوه افغان کډوال، چې مجرم پېژندل شوي وه؛ ایستلي او بېرته یې کابل ته استولي دي.

له دې مخکې جرمني تېره میاشت ۲۸ افغان کډوال، چې مجرم پېژندل شوي وه، بېرته افغانستان ته ولېږدول.

د سویسي رسنیو د راپورونو له مخې، دې هېواد له خپلې خاورې دوه افغان کډوال ایستلې دي.

له ۲۰۱۹ ز. کال وروسته دا لومړی ځل دی، چې سویس افغان کډوال وباسي.

د جمعې پر ورځ (د تلی شلمه) د سویس د مهاجرت وزارت د آلمان اوونیزې سانټاګبلیک ته د دغو دوه افغان مهاجرو د اخراج په اړه خبر ورکړ.

ځینو سویسي رسنیو د دغه هېواد د عدلیې او پولیسو د وزارت د څرګندونو له مخې دغه موضوع تائید کړې او ویلي یې دي، چې دغه افغانان «سرغړونکي» وه.

د سویس حکومت دغو دوه افغانانو ته له ایستلو مخکې ۵۰۰ سویسي فرانکه، چې ۵۸۳ امریکايي ډالر کېږي؛ ورکړي دي.

دا په داسې حال کې ده، چې د اګست پر دېرشمه د جرمني د کورنیو چارو وزارت ۲۸ افغانان د دوی د څرګندونو له مخې پر بېلابېلو جرمونو تورن ول؛ افغانستان ته ولېږل.