د امریکا کانګرس یوه تازه راپور خبرداری ورکړی، چې « پاکستان اوس هم د ځینو ترهګرو ډلو د فعالیت مرکز پاتې شوی؛ دغو ډلو له څو کلونو راپدېخوا په ځانګړي توګه پر جمو او کشمیر تمرکز کړی دی.»

په دې راپور کې، چې د ۲۰۲۶ ز.کال د مارچ پر پېنځه‌ویشتمه خپور شوی؛ د شاوخوا ۱۵ وسله‌والو ډلو نومونه یاد شوي، چې «ډېری یې امریکا د بهرنیو ترهګرو ډلو» په توګه پېژني. د بېلګې په توګه د لشکر‌طیبه، جیش‌محمد، حرکت‌الجهاد‌اسلامي، حرکت‌المجاهدین او حزب‌المجاهدین نومونه اخیستل شوي، چې د راپور له مخې اوس هم هڅې روانې دي.

په راپور کې راغلي؛ لشکر‌طیبه، چې په ۱۹۸۰ لسیزه کې جوړه شوې او په ۲۰۰۱ ز.کال کې د ترهګریزې ډلې په توګه نومول شوې؛ اوس هم د پاکستان په پنجاب او د پاکستان تر ادارې لاندې کشمیر کې فعاله ده. ویل کیږي، چې دې ډلې پر ۲۰۰۸ ز.کال د هند د ممبي په بریدونو کې رول لوبولی و، چې ۱۶۶ کسان یې ووژل.

په راپور کې د جیش‌محمد ډلې هڅو ته هم نغوته(اشاره) شوې، چې په ۲۰۰۰ ز.کال کې مسعود اظهر رامنځته کړه او په ۲۰۰۱ ز.کال کې یې د هند پر پارلمان برید وکړ.

په راپور کې راغلي: د پراخو پوځي عملیاتو او سلګونو استخباراتي عملیاتو سره – سره ډېری ترهګرې ډلې، چې د امریکا او ملګرو ملتونو تر بندیزونو لاندې دي؛ اوس هم د پاکستان په خاوره کې فعالې دي.

په راپور کې دا هم راغلي، چې پاکستان په وروستیو کلونو کې د ترهګریزو فعالیتونو د محدودولو لپاره ځینې ګامونه پورته کړي؛ خو «په ځینو پاکستاني مذهبي مدرسو کې د افراطي نظریاتو د تدریس په اړه اندېښنې اوس هم پاتې دي.»

د “جیو‌نیوز” د راپور له مخې؛ ټاکل شوې، چې د افغانستان او پاکستان ترمنځ د سولې ګډه جرګه د روان کال  د مارچ پر یودېرشمه په پېښور کې جوړه او ترمنځ یې د سولې، ثبات او خبرو اترو د پیاوړتیا لپاره یو ګډ چوکاټ رامنځته شي.

دا جرګه په داسې وخت کې ترسره کیږي، چې د افغانستان او پاکستان ترمنځ په وروستیو میاشتو کې تاوتریخوالی ډېر شوی دی.

د دې راپور له مخې؛ د خیبر پښتونخوا ایالت مرکزي دفتر پخواني رییس او د “سپایر-خیبر پښتونخوا” بنسټ مسوول ارباب شهزاد خان دا موضوع د اصلاح غوښتونکي ملتپال غورځنګ له مشر حاجي سهراب علي خان سره په یوه ګډه خبري غونډه کې اعلان کړه.

هغه ویلي، چې په جرګه کې به مشهور سیاسي مشران، قومي مشران، دیني عالمان، د مدني ټولنې غړي، سوداګر او د رسنیو استازي ګډون وکړي.

د نوموړي د څرګندونو له مخې؛ یو شمېر سیاسي شخصیتونه، چې پخوا یې د افغانستان او پاکستان ترمنځ د اړیکو د ښه کولو او سولې د رامنځته کولو لپاره کار کړی هم دې غونډې ته بلل شوي دي.

ارباب شهزاد خان ټینګار کړی، چې جرګه به د تلپاتې سولې د ترلاسه کولو لپاره پر متقابل درناوي، باور جوړونې او جدي خبرو اترو راوڅرخیږي.

هغه زیاته کړې؛ د جرګې په پای کې د سولې د ملاتړ لپاره یوه ګډه خبرپاڼه هم خپريږي او د افغانستان او پاکستان دواړو حکومتونو ته به واستول شي.

د نوموړي د څرګندونو له مخې؛ د دې جرګې د ترسره کولو بنسټیزه موخه د پاکستان او افغانستان ترمنځ د سولې او ثبات لپاره د ګډې لارې رامنځته کول او د خبرو اترو بهیر پیاوړې کول دي.

هغه دا ټینګار هم کړی، چې د پاکستان او افغانستان ترمنځ د لوړې کچې تاوتریخوالي په پام کې نیولو سره د داسې جرګې ترسره کول په اوسني وضعیت کې یوه “بېړنۍ اړتیا” ګڼل کیږي.

ارباب شهزاد خان ویلي، چې د مارچ پر یودېرشمه په پېښور کې له جرګې وروسته به د سولې ورته جرګې په کویټه او نورو سیمو کې هم ترسره شي، چې ټول ښکېل اړخونه د سولې په بهیر کې راونغاړل شي او د سیمې د تاوتریخوالي د کمولو لپاره لار اواره شي.

هغه ویلي، چې د دې جرګې ګډونوال به د افغانستان او پاکستان له مشرانو وغواړي، چې سمدستي اوربند وکړي، د تاوتریخوالي کچه راټیټه کړي او د خبرو اترو او ډیپلوماټیکو لارو څخه خپل ټول اختلاف حل کړي.

دا په داسې حال کې ده، چې د دواړو هېوادونو ترمنځ تر دې دمه له خبرو اترو سره – سره کړکېچ دوام کړی؛ خو د سولې جرګې تنظیموونکي هیله لرلې، چې دا غونډه به د کړکېچ کمولو او د کابل او اسلام‌آباد ترمنځ د رغنده خبرو اترو د پیل لپاره یو بنسټ چمتو او رامنځته کړي.

تورخم دروازه له نږدې یوې میاشتې بندېدا وروسته نن ماسپښین ۲ بجې هېواد ته د راستنېدونکو کډوالو لپاره پرانیستل شوه.

د راپورونو له مخې، د دې لارې د بیا پرانستلو سره، له پاکستان څخه د افغان کډوالو د راستنیدو پروسه بیا پیل شوې او ډیری کورنۍ د دې لارې له لارې هیواد ته ننوتلي دي.

تورخم دروازه د افغانستان او پاکستان ترمنځ یوه سوداګریزه لار ده، چې په وروستیو نږدې څو اوونیو کې د پاکستانیو پوځیانو د تاوتریخوالي له کبله تړلې وه.

د دې دروازې بندېدا د کډوالو لپاره د پام وړ ننګونې رامنځته کړي او د تګ راتګ مخه یې نیولې وه.