(Last Updated On: کب ۵, ۱۴۰۲)امریکا جمعې پر ورځ پر روسیې پراخ بندیزونه ولګول، چې له ۵۰۰ حخه ډېر افراد او بنسټونه رانغاړي.
رویټرز راپور ورکړی، چې دا بندیزونه د اوکراین پر خاوره د روسیې د پوځي برید د دوهیم کال او د روسیې د حکومت ضد مخالف الکسي نوالني د وژنې له کبله لګول شوي دي.
د امریکا ولسمشر جو بایډن ویلي؛ له دې کړنې یې موخه داده، چې د روسیې د فډراسیون ولسمشر ولادیمیر پوتین به د بهرني یرغل او کورني مخالفت د ځپلیو له کبله ډېر نور څه هم له لاسه ورکړي.
ولسمشر بایډن وایي: دا بندیزونه به هغه کسان، چې د ناولني له زنداني کولو سره تړاو لري او دغه راز د روسیې مالي سکتور، دفاعي صنعتي اډې، د تدارکاتو شبکې او د نړۍ د څو وچو په یو شمېر هېوادونو کې سرغړونکي پر نښه کړي.
په واشنګټن کې د روسیې سفیر اناتولي انتونوف ویلي: ایا واشنګټن له پامه غورځولې، چې بندیزونه مونږ له منځه وړلی نهشي؟!
دغه راز د نړۍ اووه سترو اقتصادونو، اروپايي اتحادیې او استرالیا یو ائتلاف اعلان کړی، چې غواړي د روسیې د خامو تېلو د یو بیلر ۶۰ ډالره بیه نوره هم راکمه کړي.
بایډن ویلي، چې پوتین د ۴۷ کلن ناوالني د مړینې مسوول دی، خو د روسیې حکومت په دې پېښه کې لاس لرل رد کړل.
ولسمشر بایډن د پنجشنبې پر ورځ ویلي وه، چې په کالیفورنیا ایالت کې یې د ناولني له کونډې او لور سره په شخصي توګه لیدنه کړې ده.
په سان فرانسیسکو ښار کې د ناولني له میرمنې یولیا او لور داشا ناولني سره له لیدو وروسته بایډن خبریالانو ته وویل، چې د پوتین مخالف “یو باور نه کیدونکی زړور سړی” و.
د ناولني له مړینې وروسته یو شمېر اروپايي حکومتونو روسي ډیپلوماټان احضار کړل او د کریملین د دغه سخت مخالف د مړینې له کبله یې پر هغوی نیوکې وکړې.
اروپایي ټولنې، بریټانیا او کاناډا هم پر روسیې لو لړ بندیزونه ولګول.
امریکا او متحدینو یې د جګړې له پیل راپدیخوا د روسیې پر وړاندې یو لړ اقدامات پلي کړي، چې په کې د مالي شتمنیو بندول، د پرمختللي تخنیکي صادراتو محدودول او د روسیې د تېلو صادراتو د پلور بیې ته د رسمي حد ټاکل شامل دي.
د بهرنیو چارو وزارت ۲۵۰ اشخاص، د سوداګرۍ وزارت ۹۰ شرکتونه او خزانې وزارت نږدې ۳۰۰ کسانو او بنسټونه د بندیزونو په نوملړ کې راوستي دي.
د ۲۰۲۲ ز.کال د فبرورۍ پر ۲۴ وسیې پر اوکراین برید وکړ او له همغې ورځې راپدیخوا د روسیې پر ضد د متحدینو کمپپاین روان دی. امریکا او متحدینو یې بېلابېل بنسټونه تر بندیز لاندې راوستي دي.
په دې جګړه کې زرګونه کسان وژل شوي، دوه اعشاریه دوه ټریلونه صادرات خنډیدلي دي.
