تازه خبرونه
امیر خان متقي په راروانه اوونۍ کې د چین او پاکستان د بهرنیو چارو له وزیرانو سره ګوري
رویترز خبري آژانس د بهرنیو دیپلوماتانو د څرګندونو له مخې څرګنده کړې، چې د ملګرو ملتونو د امنیت شورا د بندیزونو کمیتې د اسلامآباد په غوښتنه پاکستان ته د افغانستان اسلامي امارت د بهرنیو چارو د وزیر امیرخان متقي له سفر سره هوکړه کړې ده.
د دغه راپور له مخې: امیر خان متقي، چې د ملګرو ملتونو په تور نولړ کې راغلی؛ راتلونکې اوونۍ به په اسلامآباد کې د پاکستان او چین د بهرنیو چارو له وزیرانو سره وګوري.
د افغانستان اسلامي امارت د بهرنیو چارو وزیر د ملګرو ملتونو د امنیت شورا د بندیزونو په نوملړ کې د شاملیدو له کبله هیڅ هېواد ته د سفر حق نهلري.
په ملګرو ملتونو کې د پاکستان استازي په یوه لیک کې د امنیت شورا د بندیزونو د کمیتې له ۱۵ غړیو غوښتي، چې د افغانستان اسلامي امارت د بهرنیو چارو وزیر ته لنډمهاله اجازه ورکړي، چې د مې له ۶ تر ۹ پاکستان ته درې ورځنی سفر وکړي. په دې سفر کې به د پاکستان او افغانستان د بهرنیو چارو له وزیرانو سره وګوري.
په دغه لیک کې پاکستاني استازي دا نهده څرګنده کړې، چې په دې غونډه کې به کوم مسایل مطرح شي. د پاکستان استازولۍ ویلي، چې حکومت به یې د افغانستان اسلامي امارت د بهرنیو چارو د وزیر د سفر ټول لګښتونه پر غاړه واخلي.
دا غوښتنه په داسې حال کې کېږي، چې د نړۍ د ۲۳ هېوادونو او سازمانونو ځانګړي استازي د ملګرو ملتونو پر کوربتوب په قطر کې د افغانستان له اسلامي امارت سره د اړیکو پر څرنګوالي خبرې کوي.
د ملګرو ملتونو ویاند ستیفن دوجاریک ویلي، چې د تړلیو دروازو ترشا په دې غونډه کې به پر مهمو مسلو لکه د بشري حقونو په ځانګړي توګه د ښځو او نجونو حقونه، ټولګډونه حکومتولۍ، له ترهګرۍ سره د مبارزې او مخدره موادو قاچاق خبرې وشي.
د افغانستان بهرنیو چارو وزارت د ویاند مرستیال حافظ ضیا احمد تویت کړی، چې د روانې اوونۍ په پای کې به د افغانستان اسلامي امارت د بهرنيو چارو وزير مولوي امير خان متقي پر مشرۍ يو سياسي او تجارتي پلاوی د پاکستان پلازمېنې اسلامآباد ته ولاړشي.
په دې غونډه کې د چين، فرانسې، جرمني، هند، اندونيزيا، ايران، جاپان، قزاقستان، قرغزستان، ناروې، پاکستان، قطر، روسيې، سعودي عربستان، تاجکستان، ترکيې، ترکمنستان، متحده عربي اماراتو، بريتانيا، امريکا، روسيې، ازبکستان هېوادونو، اروپايي ټولنې او د اسلامي همکاریو ټولنې استازيو ګډون کړی دی.
تازه خبرونه
ملګرو ملتونو د دې ټولنې په عمومي ناسته کې د افغانستان د رایې حق وځنډاوه
ملګرو ملتونو د دې ټولنې په عمومي ناسته کې د افغانستان او پېنځه نورو هېوادونو د رايې ورکولو حق لنډمهالی ځنډولی دی.
دې ټولنې په اوبپاڼه کې لیکلي، چې افغانستان دې ټولنې ته د کلني غړیتوب حقالعضویت له پامه غورځولی دی.
دا خبر په ملګرو ملتونو کې د افغانستان دایمي استازولۍ هم تائید کړی دی.
دې ټولنې دا هم ویلي، چې د دې ټولنې د منشور د ۱۹ مادې له مخې: هر هغه غړي هېواد، چې د دوه کلونو یا له دې د ډېر وخت لپاره د غړیتوب حقالعضویت سپارلی نهوي؛ د دې ټولنې په عمومي ناسته کې د رایې ورکولو له حق څخه بې برخې پاتې کیږي.
د ملګرو ملتونو د څرګندونو له مخې؛ افغانستان د ۲۰۲۲ او ۲۰۲۳ کلونو لپاره د غړیتوب حقالعویت ندی ورکړې له همدې کبله د دې ټولنې پوروړی دی.
د ملګرو ملتونو د غړیتوب کلنی حق العضویت دوه میلیون ډالره دی.
د راپورونو له مخې؛ له دې مخکې په ملګرو ملتونو کې د غړیتوب کلنی حقالعضویت د افغانستان بهرنیو چارو وزارت پرې کاوه.
د ملګرو ملتونو په اوبپاڼه کې د ورکړ شویو معلوماتو له مخې؛ افغانستان، اکواډور، کومورس، وینزویلا، سومالیا او ساو تومه هغه هېوادونه دي، چې له دوه کلونو پر تېرېدو یې هم د غړیتوب حقالعضویت ندی ورکړی.
دا په داسې حال کې ده، چې ملګرو ملتونو ټولنې په تېرو دوه کلونو کې د افغانستان د دایمي استازي په توګه د افغانستان د لنډمهالي حکومت یا اسلامي امارت د نومول شوي استازي سهیل شاهین له منلو ډډه کړې ده.
تازه خبرونه
د افغانستان سیلاب ځپلیو ته مو د مرستو چمتووالی نیولی – ټوماس ویسټ
د افغانستان لپاره د امريکا ځانګړي استازي ټوماس ويسټ د افغانستان په بغلان، بدخشان، سمنګان، تخار، غور، هرات او نورو ولایتونو کې د وروستيو سيلابونو پر اوښتو زيانونو خپله خواشيني څرګنده کړې ده.
ټوماس ویسټ د دوشنبې پر ورځ ( د غویی څلیریشتمه ) په خپله ایکس پاڼه کې لیکلي، چې د امریکا متحدین په افغانستان کې د سېلاب ځپلیو لپاره د خوراکي توکو او اوبو په ګډون بېړنۍ مرستې رسوي.
دغه راز د افغانستان لپاره په قطر کې د امریکا سفارت چارسمبالې کرن ډیکر هم ویلي: امریکا سیلاب ځپلیو ته د بېړنیو مرستو د جلبولو، د خپلو همکارانو له لارې د خوراکي توکو او طبي تجهیزاتو د برابرولو لپاره له نورو سره یوځای کیږي.
د هېواد په يو شمېر ولايتونو په تېره بيا په بغلان کې د مرګوني سېلابونو راوتو ځايي اوسېدونکیو ته ځاني او مالي زيانونه اړولي دي.
د وروستیو څرګندونو له مخې؛ د بغلان په دوه ولسوالیو کې له ۳۰۰ ډېر کسان مړه شوي دي.
تازه خبرونه
ملا برادر د بغلان ولایت له سیلاب ځپلیو سیمو لیدنه وکړه
د ریاست الوزراء اقتصادي مرستيال ملا عبدالغني برادر د دوشنبې پر ورځ ( د غویی څلیریشتمه) د دغه ولايت د مرکز په ګډون له سېلاب ځپلیو سيمو ليدنه وکړه.
ملا برادر د زیانمنو سیمو له لیدنې وروسته د دې ولایت په مرکز کې له مسوولینو او کاري کمیټو له استازو سره په ناسته کې لازمې سپارښتنې وکړې.
نوموړي زیاته کړې: په هغو ولسوالیو کې، چې مونږ له نږدې ولیدلې اوښتي زیانونه ډېر دي؛ نو له همدې کبله اړینه ده، چې دغه بنسټونه د بې ځایه شویو خلکو لپاره د خوراکي توکو، درملو او سرپناه په برابرولو کې خپلې هڅې ګړندۍ کړي او سیلاب ځپلیو سیمو ته د مرستو رسولو بهیر نور هم چټک کړي.
په تېرو څو ورځو کې د افغانستان شمالي او لویديځ ولايتونه د ويجاړونکيو او مرګونو سېلابونو شاهدان دي.
د یو لړ څرګندونو له مخې؛ یوازې په بغلان کې له ۳۰۰ ډېر کسان مړه شوي دي. په تخار کې هم له ۲۰ ډېرو کسانو خپل خوږ ژوند له لاسه ورکړی دی.
تر اوسه د مالي زیانونو پوره کچه په ډاګه شوې نده؛ خو ویل کېږي، چې د سیلابونو له کبله سلګونه کورونه ویجاړ شوي او کرنیزو ځمکو ته پوره زیانونه رسېدلي دي.
-
تازه خبرونه2 days ago
الله ګل مجاهد د قتل پر تور ونیول شو
-
تازه خبرونه2 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
سوداگري2 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه2 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه1 day ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه1 day ago
د حج او اوقافو وزارت چارسمبالي د ترکیې له ولسمشر سره وکتل
-
تحول5 days ago
تحول: له نړۍ سره د افغانستان د ډیپلوماټیکو اړیکو د ښه کېدو هڅې
-
نړۍ1 day ago
په برازیل کې د سیلابونو له کبله د مړو شویو شمېر ۱۴۳ کسانو ته پورته شو