بدخشان ته د هوايي چلند يوه خصوصي شركت الوتنې پيل كړې

افق شرق هغه هوايي شركت دى، چې بدخشان ته يې په لومړي ځل خپلې الوتنې پيل كړې دي.

د افق شرق هوايي شركت مسوولين وايي:

د شل ميليون دالرو په پانگونه مو د هېواد ليرې پراته ولايتونه، چې د ځمكني ترانسپورت له ستونزو سره مخ ول، له مركز سره ونښلول.

دوى وايي:

له مركزسره د ولايتونو واټن او ترانسپورتي ستونزو دولتي او اقتصادي چارې زيانمنې كړې دي.

د بدخشان والي شاه ولي الله اديب دې ولايت ته الوتنې د خلكو په ژوند كې مثبت گام گڼلى او وايي:

له دې وروسته به دا خلك د ناروغانو او اړو كسانو د ليږدولو په برخه كې ستونزې ونه لري.

بدخشان يو غرنى ولايت او خلك يي تل د مواصلاتي لارو د بندوالي له كبله له ستونزو سره مخ وي.

په ولسي جرگه كې د بدخشان استازې فوزيه كوفي هم دا يو غوره اقدام بولي او وايي:

د نوموړي شركت مسوولين دې ولسواليو ته د الوتنو او د كرايو په ټيټوالي كې پاملرنه وكړي.

د افق شرق د هوايي شركت عامل رييس جاهد عظيمي وايي:

اوس مو په اوونۍ كي يوځل بدخشان ته الوتني پيل كړي، چې په ترانسپورتي برخه كې  د خلكو ستونزي اوارې شي.

نوموړي ژمنه وكړه، چې:

له خپلو امكاناتو سره سم به د كرايي په لږوالي او د الوتنو په زياتوالي غور وكړو.

افق شرق د باختر له  هوايي شركت وروسته، چې د تېرو جگړو له كبله له فعاليت څخه ولويد، د ملكي هوايي چلند دوه يم هوايي شركت دي، چې يوازې كورنۍ الوتنې كوي.

د يادونې وړ ده، چې اوس په افغانستان كې د هوايي چلند په برخه كې  يو دولتي او درې خصوصي شركتونه فعاليت كوي.