تازه خبرونه
ترکیې افغانستان ته څه باندې ۵۰۰ ټنه بشري مرستې استولي
په افغانستان کې د ترکیې سفیر ويلي، د زلزله ځپلیو او راستنېدونکیو لپاره د ترکيې د بشردوستانه مرستو څه باندې ۳۰ واګونونه د هرات د تورغونډۍ بندر ته رارسېدلي دي.
د ترکيې سفير جنګ اونال، چې د اسلامي امارت چارواکو ته د دغې مرستې د لېږدولو په موخه د تورغندۍ بندر ته تللی و؛ ټينګار کړی، چې د ترکيې دولت او خلک د افغانستان له خلکو سره ولاړ دي او د دوی مرستې به دوام ولري.
نوموړی وایي: په اوسني وخت کې، چې افغانستان مرستې ته اړتیا لري، مونږ په ټولو امکاناتو سره د افغانستان د خلکو تر څنګ ولاړ یوو او تر هغې، چې اړتیا وي مرسته به کوو. مونږ هیله لرو، چې زلزلې ځپلې کورنۍ خپلو کورونو ته ولاړې شي. ژر تر ژره د دوی لپاره کورونه جوړ شي او هغه کسان، چې له بهر څخه راغلي او کډوال دي؛ د دوی ستونزې باید حل شي او خپلو کورونو ته ولاړ شي.
دغه راز زیاتوي؛ له دې مرستو څخه به څه باندې ۳۰۰ ټنه په هرات کې پر زلزله ځپلیو کورنیو ووېشل شي او ۲۰۰ ټنه به پر هغو کډوالو ووېشل شي، چې له پاکستان څخه پر زوره ایستل شوي دي.
دا د ترکیې د بشردوستانه مرستو اتمه ټولګه ده، چې دغه هېواد ته را استول کیږي، له دې مخکې هم د هرات له زلزله ځپلیو کورنیو ته د ترکیې مرستې رسیدلې وې.
د اسلامي امارت د افغاني سرې میاشتې ټولنې عملیاتي مرستیال عبدالطیف ثابت ویلي، په دغو مرستو کې خیمې، خوراکي توکي، جامې او د حفظ الصحې مواد شامل دي.
د ترکیې د حکومت د بشري مرستو دغه لویه ټولګه په داسې حال کې هېواد ته داخلیږي، چې زلزلې ځپلې کورنۍ او له پاکستان او ایران څخه راایستل شوي افغان کډوال بېړنیو خوراکي توکو، جامو او خیمو ته اړتیا لري.
تازه خبرونه
د ازبکستان بشري مرستې بلخ ته راورسېدې
نن پنجشنبه ( د غویي شپږمه ) له ازبکستان څخه د بشري مرستو یوه ټولګه د بلخ په سوداګریز بندر حیرتان کې د دې ولایت سیمهییزو چارواکو ته وسپارل شوه.
د سیمهییزو چارواکو د څرګندونو له مخې؛ په دغو مرستو کې ۶۰ ټنه خوراکي توکي( اوړه، غوړي، غنم، بوره او غوښه ) شته، چې د ازبکستان د سرخاندریا د والي لهخوا د بلخ چارسمبالي والي ته سپارل شوې ده.
د سرخاندریا والي د دغو مرستو موخه د افغانستان له خلکو ملاتړ یاد او د دواړو هېوادونو ترمنځ يې د ښو اړيکو پر پراختيا ټينګار څرګند کړ.
په تېرو دوه کلونو کې دا څووم ځل دی، چې ازبکستان افغانستان ته دا ډول مرستې را لیږي.
کابل او تاشکند دا مهال ښې اقتصادي او سیاسي اړیکي لري او دا دواړه هېوادونه په پام کې لري، چې په روان کال کې د افغان ټرانس د اوسپنې پټلۍ کار هم پیل کړي.
تازه خبرونه
په سیمه او هېواد کې امنیتي پېښې وارداتي دي – امیر خان متقي
نن پنجشنبه ( د غویی شپږمه ) د اسلامي امارت بهرنیو چارو وزارت چارسمبالي امیرخان متقي د افغان-قزاق نندارتون د پرانیستې په مراسمو کې د افغانستان او سیمې امنیتي پېښې وارداتي یادې کړې دي.
نوموړي په دې اړه په خپلو خبرو کې ویلي: متاسفانه زمونږ درې ګاونډي هېوادونه په نوبت سره؛ په یوه هېواد کې د داعش لپاره بشري قوه او افراد تیاریږي؛ مونږ او تاسې ولیدل، چې د نړۍ په بېلابېلو برخو کې یې پېښې تر سره کړې.
بل هېواد د هغې لارې پر سر پروت دی، چې امن خرابوونکي افراد ترې راتېریږي.
او بل هېواد بیا په خپله خاوره کې دوی ته د مرکزیت، د تمویل او پلان جوړونې مراکز ورکړي دي. که دا درې هېوادونه خپل مسوولیت ادا کړي؛ په افغانستان او سیمه کې هیڅ مشکل نشته.
ویل کیږي، چې بد امني پر ګډه همکارۍ او همغږۍ له منځه وړل کیږي.
تازه خبرونه
له اسلامي امارت سره نړیوالې اړیکې ورځ تر بلې پراخیږي – ذبیح الله مجاهد
د اسلامي امارت ویاند ذبیح الله مجاهد افغانستان ته د ګڼشمېر ډیپلوماټیکو استازو راتګ او نورو هېوادونو ته د افغان لوړ پوړیو چارواکو سفرونو ته په نغوته کې ويلي، چې اسلامي امارت په پراخه کچه منل شوی؛ اړیکې ورسره خوندي او لیدنې یې روانې دي.
ذبیح الله مجاهد زیاته کړې؛ له اسلامي امارت سره د نړۍ د هېوادونو اړیکې ورځ تر بلې پراخېږي او اغېزمنتیا یې مخ پر ډېرېدو ده.
د اسلامي امارت ویاند ټینګار کړی: د ځینو خلکو او کړیو دا تصور، چې افغانستان انزوا ته تلی او اقتصاد یې مخ پر خرابېدو دی او له نورو هېوادونو سره یې اړیکې نشي خوندي کېدی؛ ټول دروغ ثابت شول.
د نوموړي د څرګندونو له مخې؛ اوس څرګنده شوه، چې افغانستان له سیاسي او اقتصادي پلوه د ودې او پراختیا پر لوري چټک ګامونه اخلي او دا هڅې به نورې هم ګړندۍ شي.
-
تازه خبرونه4 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ2 days ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
نړۍ4 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
تازه خبرونه4 days ago
راشد خان د افغان بیسیم سوداګریز سفیر شو
-
لوبی2 days ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
لوبی4 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
سیمه ییز خبرونه3 days ago
د غزې په شمال کې د قحطۍ خطر ډېر دی
-
سیمه ییز خبرونه2 days ago
امریکا دې د بشري حقونو په اړه دوه ګوني سیاست ودروي – ترکیه