د مالداویا ولسمشرې مایا ساندو د افغانستان اسلامي امارت یوه پلاوي ته د ویزې پر ورکړې نیوکه کړې او څرګندوي، چې دغه سفر د حکومت د ځینو چارواکو له لوري د اسلامي امارت په اړه د خپل هېواد له پالیسۍ د ناپوهۍ له کبله ترسره شوی دی.

ساندو له «جورنال ټي‌وي» سره په مرکه کې ویلي، د مالداویا د کرنې وزارت یوه مرستیال د افغان پلاوي د ویزې له غوښتنې وړاندې د خپل هېواد د حکومت له لوري د اسلامي امارت په اړه د پالیسۍ په اړه څېړنه نه‌وه کړې.

د نوموړې د څرګندونو له مخې؛ د بهرنیو چارو وزارت چارواکو هم د ویزې غوښتنه د لېږونکي لوړپوړي مقام له کبله داسې انګېرلې وه، چې غوښتنه له مخکې تائید شوې ده.

د مالداویا ولسمشرې دغه موضوع «د شرم وړ» بللې او د دې پرېکړې پر مسوولو چارواکو یې د انضباطي چلند غوښتنه کړې ده.

ساندو ویلي:« زما د معلوماتو له مخې؛ د کرنې وزارت یوه مرستیال دا نه‌وه څېړلې، چې د افغانستان د رژیم په اړه د مالداویا جمهوریت پالیسي څه ده. دا موضوع د حیرانتیا وړ ده.»

هغې زیاته کړې؛ حکومت ورته ویلي، چې د ورته پېښو له تکرار څخه د مخنیوی لپاره به له مسوولو چارواکو سره انضباطي چلند وشي.

له دې مخکې د مالدووا د کرنې وزارت مرستیال واسیله ساربن ویلي وه، چې د افغان پلاوي سفر د یوه مالداوي شرکت د غوښتنې له مخې ترسره شوی دی.

د نوموړي د څرګندونو له مخې، دغه شرکت کرنیز محصولات تولیدوي او خپل محصولات ازبکستان ته صادروي او غوښتل یې، چې په افغانستان کې هم خپل د پلور بازار پراخ کړي.

ساربن ویلي، افغان استازو د دغو محصولاتو د تولید له بهیر سره د بلدتیا لپاره مالداویا ته د سفر غوښتنه کړې وه.

د افغان پلاوي مشري د کرنې، اوبو لګولو او مالدارۍ وزارت مرستیال صدر اعظم عثماني کوله.

سعودي عربستان، پاکستان او ترکیې د جمعې پر ورځ په مکه کې ګډه دفاعي هوکړه لاسلیک کړه؛ دا په داسې حال ده، چې په سیمه کې شخړو د فارس خلیج د تېلو پر صادرونکو هېوادونو د توغندیزو بریدونو څپه رامنځته کړې ده.

د امریکا او اسرائیلو له‌خوا د فبرورۍ پر اته‌ویشتمه پر ایران له برید وروسته، چې په سیمه کې یې کلونه اوږد تاوتریخوالی زیات کړ؛ ایران او متحدانو یې پر سعودي عربستان او د فارس خلیج پر نورو هېوادونو توغندیز بریدونه کړي او د دغو هېوادونو د انرژۍ د لېږد بهیر یې هم ګډوډ کړی دی.

د ګډې اعلامیې له مخې؛ د دې هوکړې موخه د هر ډول تېري پر وړاندې د ګډ مخنیوي ځواک پیاوړي کول دي.

په اعلامیه کې راغلي، چې پر یوه هېواد هر ډول وسله‌وال برید به پر ټولو درې هېوادونو برید ګڼل کېږي.

که څه هم په اعلامیه کې د «مکې ګډې دفاعي هوکړې» په چوکاټ کې د هر لوري د ژمنو او مسوولیتونو په اړه جزئیات ورکړ شوي نه‌دي؛ خو ټینګار شوی، چې دا هوکړه د ګډ امنیت د پیاوړتیا او په سیمه او له هغې ورهاخوا د سولې، امنیت او ثبات د ټینګښت لپاره شوې ده.

د ترکیې یوه چارواکي دغه هوکړه دفاعي بللې او ویلي یې دي، چې دا تړون د کوم ځانګړي لوري پر ضد نه‌دی جوړ شوی؛ د سیمې نورو هېوادونو ته هم د یوځای کېدا لپاره پرانیستی دی او هیڅ یوه موجوده دوه‌اړخیزه یا څو اړخیزه هوکړه نه لغوه کوي او نه یې ځای نیسي.

دغه درې هېوادونه پر ځانګړي توګه د اسرائیلو د مخ پر زیاتېدونکو پوځي دریځونو او همدارنګه د شیعه او انقلابي تمایل لرونکي ایران د دریځونو په اړه اندېښمن دي. دا په داسې حال کې ده، چې د دوی پخوانی متحد، امریکا، په سیمه کې د بې‌ثباتۍ د کابو کولو له ننګونو سره مخ دی.