د چاپېریال ساتنې د نړیوالې ورځې په مناسبت د ریاست الوزراء اداري مرستیال ويلي، د افغانستان چاپېریال په تېرو څلور لسیزو کې د بېلابېلو وسلو پر کارولو زیانمن شوی دی او هغه هېوادونه، چې تر ټولو ډېر زرغون ګاز تولیدوي باید له زیانمنو هېوادونو سره همکاري وکړي.
د رییس الوزرا اداري مرستیال عبدالسلام حنفي وایي؛ د اقلیم بدلون د افغانستان نیمایي ځنګلونه له منځه وړي او اوبه مدیریت شوې ندي؛ خو اسلامي امارت د ځمکې د سمسورتیا او چاپېریال د ککړتیا د مخنیوي لپاره منظم پلانونه لري.
په افغانستان کې د ملګرو ملتونو ځانګړې استازې روزا اتونبایوا ويلي، افغانستان د بل هر هېواد پر پرتله د اقليمي بدلون له کبله ډېر زيانمن شوی دى.
هغه وایي: نن مونږ د چاپېریال نړیواله ورځ په داسې حال کې نمانځو، چې زمونږ د سیارې او افغانستان لپاره ډېره مهمه نېټه ده. د افغانستان په شمال ختیځ کې وروستیو سېلابونو ته وګورئ، چې هر څه یې له منځه یوړل، سړکونه، کورونه، پلونه او څه باندې شل زره کسانو کورونه له لاسه ورکړل. مونږ له دې بحران سره د مقابلې لپاره لاسونه سره یو کړل.
د طبیعي پېښو پر وړاندې د مبارزې وزارت ويلي، په هېواد کې وروستیو سېلابونو ۲۹۳ کسان مړه کړي ۲۶۶ نور ټپیان شوي، څه باندې څلور زره کورونه څه نا څه او یا بشپړ ویجاړ شوي او سلګونه زره جریبه ځمکه هم ویجاړه شوې ده.

د افغانستان زعفرانو د نهم ځل لپاره د “بلجیم د ذایقي نړیوال انسټیټیوټ” لخوا په نړۍ کې لومړی مقام وګاټه.

دې انسټیټیوټ د هرات زعفرانو لابراتواري ازموینې ترسره کړي، چې په پایله کې یې د افغانستان زعفران تر ټولو خوندور زعفران وپېژندل شول. دا بنسټ هر کال د نړۍ د ټولو هېوادونو زعفران ارزوي، چې سږ کال یې د افغانستان زعفران یو ځل بیا د نړۍ تر ټولو غوره زعفران ونومول.

نن چارشنبه د غبرګولي شپارلسمه د افغانستان بانک چارسمبالي هدایت الله بدري د ملګرو ملتونو پراختیايي پروګرام له رییس سټیفن راډریکز سره د افغانستان بانک پر بېلابېلو موضوعاتو خبرې وکړې.

د افغانستان بانک ویلي؛ په دې لیدنه کې هدایت الله بدري بانکي سکټور، اسلامي بانکوالي، د اداینو برېښنایي کول او کوچني مالي تمویلات د اقتصادي پرمختګ په برخه کې د ارزښت وړ یاد کړل او د دې برخو پیاوړتیا یې د اوسني عصر اړتیا وګڼله.

بدري ویلي؛ د افغانستان بانک بریالی شوی، چې بانکي سکټور په ښه ډول مدیریت کړي، د اسلامي بانکوالۍ د پراختیا په برخه کې د پام وړ ګامونه پورته کړي، د اداینو د برښنایي کولو په برخه کې عملي اقدامات تر سره او د کوچنیو مالي تمویلاتو د پیاوړتیا لپاه منظم قوانین او مقررات رامنځته او خپل مثبت رول ولوبوي.

نوموړي زیاته کړې؛ مونږ باور لرو، چې مناسبو مالي خدمتونو ته لاسرسی کولی شي د ټیټ عاید لرونکیو خلکو په اقتصادي پیاوړتیا او د بېوزلۍ په کمولو کې مهم رول تر سره کړي.

په دې غونډه کې د ملګرو ملتونو د پراختیايي پروګرام رییس سټیفن راډریکز د افغانۍ د ثبات، انفلاسیون د کنترول، بانکي سکټور د مدیریت او د ټولیز اقتصاد په پرمختګ کې د افغانستان بانک د لاسته راوړنو د ستاینې ترڅنګ د بانکي سکټور، اسلامي بانکوالۍ د پراختیا، کوچنیو مالي تمویلاتو، اداینو د برښنايي کولو او یو شمېر نورو برخو کې د همکارۍ ژمنه وکړه.

ویل کیږي، چې د افغانستان بانک له ټولو مرسته کوونکیو بنسټونو سره د غوره اړیکو غوښتونکی دی او هیله لري، چې مرسته کوونکي بنسټونه به خپلې مرستې د بېکارۍ د کچې پر کمولو او نویو دندو رامنځته کولو راوڅرخوي.