تازه خبرونه
حکومت په ټاکنو کې ناقانونه لاسوهنه کوي- د مرکو پایله
د ولسي جرګې ۹۰ په سلو کې غړیو د افغانستان د آزادو او عادلانه ټاکنو له بنسټ سره د خبرو پر وخت ویلي، چې حکومت په ټاکنو کې ناقانونه لاسوهنه کوي.
دغه بنسټ د ولسي جرګې له اتیا غړیو سره خبرې کړي، چې څلور پنځوس په سلو کې پخپل وخت د ټاکنو په تر سره کیدو بې باوره دي او شپږ شپېته په سلو کې بیا د رڼو ټاکنو د تر سره کولو لپاره د کمیسیونونو په تیاریو باور نلري.
د افغانستان د آزادو او عادلانه ټاکنو د بنسټ یا فیفا لخوا د ولسي جرګې له غړیو سره د راتلونکیو ټاکنو په اړه له تر سره شویو مرکو په ډاګه شوې، چې: ۹۰ په سلو کې حکومت په ناقانونه لاسوهنه تورنوي، ۵۴ په سلو کې د امنیت په اړه ډاډه نه دي، ۴۴ په سلو کې د کمیسیون پر ناپېیلتوب شکمن دي، ۵۳ په سلو کې ډاډمن نه دي، چې ټاکنې به پخپل وخت تر سره شي، ۶۶ په سلو کې د کمیسیونونو له کړنو ناراضه دي، ۸۷ په سلو کې د رایو له پخوانیو کارتونو سره مخالف دي، ۶۳ په سلو کې د رایو د حوزو له بدلون سره مخالف دي او ۴۷ په سلو کې له نړیوالو غوښتي، چې د ټاکنو مسوولیت کمیسیونونو ته وسپاري.
د افغانستان د آزادو او عادلانه ټاکنو بنسټ د څېړنې مسوول محمد حسن وفايي وایي، د ټاکنو د بهیر په اړه ۹۱ سلنه ولسي استازیو د پوښتنو ځواب دا و، چې ملي وحدت حکومت په ټاکنیز بهیر کې لاسوهنه کوي او یا یې د قانون مخالف دي.
له بلې خوا دغه بنسټ اندېښنه ښيي، چې په ټاکنو خپلواک کمیسیون کې اختلافونه هم د اندېښنې وړ دي.
د افغانستان د آزادو او عادلانه ټاکنو د بنسټ د ځوانانو او ښځو مسووله مریم اروین وایي، ولسي استازي، مدني ټولنې او سیاسي ګوندونه د پارلماني او ولسوالیو شوراګانو د ټاکنو پر ځنډیدو او ناسم چمتووالي اندېښمن دي.
د آزادو او عادلانه ټاکنو د بنسټ د پروګرامونو مسوول محمد نعیم اصغري د ټاکنو خپلواک کمیسیون هڅې په تېر یو کال کې د ډاډ وړ نه بولي او وایي، چې دغه کمیسیون مدیریتي او ظرفیتي کمزورۍ لري.
د مهالوېش له مخې؛ ټاکل شوې، چې د ولایتي شوراګانو او پارلمان ټاکنې د ۱۳۹۷ کال د چنګاښ میاشتې پر شپاړسمه تر سره شي؛ خو روانو کړاوونو او ستونزو ته په کتو څارونکي بنسټونه ډاډه نه دي، چې ټاکنې پخپل وخت وشي.
خبریال: شبیراحمد صالح
تازه خبرونه
اسلامي امارت به نړیوالو فشارونو ته تسلیم نشي – مولوي عبدالکبیر
د ریاست الوزراء سیاسي مرستیال مولوي عبدالکبیر د سې شنبې پر ورځ (د غویی یوولسمه) د کابل پولیتخنیک د زدهکړیالانو د فراغت په مراسمو کې څرګنده کړې، چې اسلامي امارت به نړیوالو فشارونو ته تسلیم نشي او نه به د هیچا پر فرمایش کار وکړي.
د کابل پولیتخنیک پوهنتون د زدهکړیالانو د فراغت مراسم د اسلامي امارت د چارواکو په حضور کې ترسره شول؛ خو ډېر پر سیاسي خبرو راڅرخېدل.
نوموړي په دې مراسمو کې زیاته کړې، چې د سیمې ټرانزیټ له افغانستان پرته ناشوني دی او چارسمبالی حکومت ترې ګټه پورته کوي.
د اسلامي امارت دغه لوړپوړي چارواکي ویلي، چې چارسمبالی حکومت له یوې خوا د پروژو پر پلي کېدا او له بلې خوا د کانونو پر استخراج کار کوي.
هغه دغه راز هېواد ته د مهاجرینو د راستنېدو لپاره د شرایطو پر برابرولو هم ټینګار وکړ.
د امربالمعروف او نهی عن المنکر او شکایتونو اورېدو وزارت چارسمبالي محمد خالد حنفي ویلي، اسلامي امارت په هېواد کې د عصري علومو د پراختیا مخالف ندی او غربي هېوادونه د اسلامي امارت پر خلاف په دې اړه منفي تبلیغات کوي.
د لوړو زدهکړو وزارت چارسمبالي ندا محمد ندیم ټینګار کوي، چې اسلامي امارت د جګړې په ډګر کې بریالی شوی؛ د اقتصاد، روغتیا او پوهنې په ډګرونو کې به هم بریاوې ترلاسه کړي.
له بلېخوا د لوړو زدهکړو وزارت یو شمېر نورو چارواکو ويلي؛ دغه وزارت هڅه کوي، چې د علمي او تحصیلي پراختیا په برخه کې پرمختګ وکړي او له نړیوالو معیارونو سره برابر شي.
د کابل پولیتخنیک پوهنتون د فراغت له دې پړاو څخه د ۱۷ څانګو ۵۳۷ زدهکړیالان فارغ شول او د اسلامي امارت د چارواکو لهخوا د فراغت سندونه ورکړ شول.
تازه خبرونه
افغان ـ ترکمن چارواکو په هرات کې د نورالجهاد سب سټیشن چارې وارزولې
د افغانستان برښنا شرکت څرګنده کړې، چې د دې شرکت د رهبرۍ او ترکمن پلاوي ترمنځ د هرات نورالجهاد سب سټېشن د پاتې تخنیکي چارو د ژر بشپړېدو، فعالېدو او پرانیستلو په اړه ګډه ناسته ترسره شوه.
د افغانستان برښنا شرکت عملیاتي رییس عبدالرحمن رحماني په دې ناسته کې ویلي؛ اوسمهال د نورالجهاد سب سټیشن چارې د بشپړېدو په حال کې دي او ټاکل شوې د دواړو لوریو ترمنځ د تخنیکي مسایلو له حل کېدلو وروسته نوموړی سب سټیشن فعال او ګټې اخیستنې ته وسپارل شي.
دغه راز د ترکمنستان نړیوالو پروژو رییس مراد آرتیکوف ویلي؛ د نورالجهاد سب سټیشن چارې د دواړو لوریو ترمنځ په ښې همغږۍ ترسره شوي او ډېر ژر به بشپړې شي.
د آرتیکوف د څرګندونو له مخې؛ ټاکل شوې د تجهیزاتو او نورو تخنیکي مسایلو پروتوکول هم په راتلونکیو ورځو کې تائید او وروستی شي.
ویل کیږي، چې د نوموړې پروژې له پرانیستې سره به هرات ته د ترکمنستان وارداتي برښنا کچه لوړه او زرګونه نوي پېرودونکي د برښنا له انرژۍ څخه برخمن شي.
تازه خبرونه
له ترهګرۍ سره په مبارزه کې له اسلامي امارت سره همکارۍ ته چمتو یوو- ایران
په کابل کې د ایران سفارت د دوشنبې پر ورځ ( د غویی لسمه) د هرات ولایت په یوه جوماتن کې له وسلهوال برید وروسته څرګنده کړې، چې له ترهګرۍ سره په مبارزه کې له اسلامي امارت سره همکارۍ ته چمتو دی.
یاد سفارت دا غبرګون په هرات ولایت کې د شیعهګانو پر جومات له وسلهوال برید وروسته څرګند کړی دی.
دا سفارت دا برید “ترهګریزه پېښه” بولي او په کلکه یې غندلې ده.
د دغه سفارت په خبرپاڼه کې راغلې، چې ايران غواړي د دغه «جرم» عاملين وپېژني او سزا ورکړي.
دغه سفارت زیاته کړې؛ ایران له ترهګرۍ سره د مبارزې په برخه کې له اسلامي امارت سره د همکارۍ د پیاوړتیا لپاره خپل چمتووالی اعلانوي.
د کورنیو چارو وزارت ویاند عبدالمتین قانع ويلي؛ تېره شپه (دوشنبه د ثور لسمه) د هرات ولایت د ګذرې ولسوالۍ په شهرک سیمه کې ناڅرګندو وسلهوال پر لمونځ کوونکیو د کلاشینکوف ډزې کړي، چې ۶ ملکي وګړي یې وژلي او یو بل ټپي دی.
قانع زیاته کړې، چې د دې پېښې جزئیات به وروسته وړاتندې شي.
تر اوسه کومې ډلې یا شخص د دې پېښې مسوولیت پر غاړه ندی اخیستی.
-
تازه خبرونه2 days ago
د بغلان ولایت د غوري سمنټو تولید زیات شوی
-
تازه خبرونه2 days ago
ترکمنستان د ټاپي پروژې بشپړولو ته ژمن دی – امانوف
-
سیمه ییز خبرونه2 days ago
په عراق کې به همجنسبازان پر۱۵ کاله بند شي –پارلمان
-
لوبی2 days ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل
-
سیمه ییز خبرونه1 day ago
د دوبۍ واکمن د هوایي ډګر د نوي ټرمینل جوړولو لپاره ۳۵ میلیارډ ډالر تصویب کړل
-
تازه خبرونه2 days ago
له پاکستان څخه دې د افغان کډوالو د جبري ایستلو چټکتیا راکمه شي
-
تازه خبرونه1 day ago
تېر کال د ۳۵ میلیون ډالرو پر ارزښت پراختیايي او بشري پروژې ترسره شوي
-
لوبی1 day ago
اټک انرژي او موج ساحل د دوشنبې د ورځې لوبې وګټلې